Bhadrawahi Bible
यहोशू 7
आकान अर्पण कियोरी चीज़ां नेइतां पाप केरते
पन इस्राएली लोकेईं यहोवा जो च़ाढ़नेरी चीज़ां केरे बारे मां धोखेबाज़ी की, मतलब यहूदारे गोट्ले मरां आकाने ज़ैन जेरह खानदाने मरां जेब्देरू पोट्लड़ू ते कर्मीरू मट्ठू थियूं, तैनी यहोवा जो अर्पण कियोरी चीज़न मरां किछ आनोरू थियूं, एस्से वजाई सेइं यहोवारो क्रोध इस्राएली लोकन पुड़ भड़को।
यहोशूए यरीहो नगरेरां आई नंव्वेरे नगरेरे नेड़े ज़ैन बेतावेन नंव्वेरे ठारारे नेड़े बेतेल नगरेरे पूर्वेरे पासे, किछ मड़द एन ज़ोइतां भेज़े, “गेइतां मुल्खेरो भेद घिन्तां इरां एज्जा।” ते तैन मड़देइं गेइतां आई नगरेरो भेद घिन्तां आनो। ते तैनेईं यहोशू कां वापस गेइतां ज़ोवं, “सब लोक तैड़ी न गान, कोई दूई ट्लाई हज़ार सिपाही गेइतां आई नगरे ज़ींती सकतन; सब इस्राएली सिपेहिन तैड़ी गानेरी तकलीफ न दे, किजोकि आई नगर बड्डू नईं।” यहोशूए लगभग 3000 सिपाही आई नगरे पुड़ हमलो केरनेरे लेई भेज़े; पन तैना आई नगरेरे रानेबालां केरे सामनेरां नेश्शी जे, तैखन आई नगरेरे सेनां तैन केरे लगभग 36 सिपाही मारे, ते अपने फाटके करां घोड़ां केरि खानी1 तगर तैन केरो पीछो केरतां उतरैई मां तैन्न मारते जे। तैखन इस्राएली सिपाही बड़े डेरि जे।
ज़ैखन यहोशूए इस गल्लरे बारे मां शुनू त तैनी हारारो दुख बांदो केरनेरे लेई अपना लिगड़ां छ़िंदां, ते तै ते इस्राएली बुज़ुर्ग लोक यहोवारे सन्दूखेरे सामने तुत्तरेरे भारे झुकतां ज़मीनी पुड़ ड्लवझ़ां तगर पेवरे राए; ते तैनेईं अपने-अपने दोग्गे पुड़ दुख बांदो केरनेरे लेई मित्ती छ़डी। ते यहोशूए प्राथना की ते ज़ोवं, “हे, प्रभु यहोवा, तीं अपने इना लोक यरदन दरियारे पार किजो आने? कुन असां एमोरी लोकां केरे कब्ज़े मां केरतां नाश केरनेरे लेई आनोरेम? रोड़ू भोथू कि अस सुखे सेइं यरदन दरियारे उस पार राहोरे भोथे! ओ, प्रभु अवं कुन ज़ोईं, ज़ैखन इस्राएलेरी सेना इश्शे दुश्मन्न करां दूर नश्शी! किजोकि कनानी बल्के इस मुल्खेरे सारे रानेबाले एन शुन्तां असन घेरेले, ते इश्शू नवं धेरती पुड़ेरां मिटेई छ़डेले; फिरी तू अपने महान नंव्वेरे लेई कुन केरेलो?”
यहोवा परमेशरे यहोशू सेइं ज़ोवं, “उठ, खड़ो भोइ गा, तू किजो एस तरीके सेइं तुत्तरेरे भारे ज़मीनी पुड़ पेइतां दुख मनाने लगोरोस? इस्राएली लोकेईं पाप कियोरोए; ते ज़ै करार मीं तैन सेइं कियोरो थियो, तै तैनेईं ट्लोड़ी छ़डोरोए, तैनेईं अर्पण कियोरी चीज़न मरां किछ ऐनोरीन, ते बल्के च़ोरी भी की, ते तैनेईं धोखो केरतां तैना अपने सामाने छ़ुपेइतां रेखोरिन। एस वजाई सेइं इस्राएली अपने दुश्मना केरे सामने खड़े न रेही सखन; तैना अपने दुश्मन्न करां नशतन, एल्हेरेलेइ कि तैना एप्पु अर्पण कियोरी चीज़ां बेनि जेवरेन। ते अगर तुस अपने दरमियाने मरां अर्पण कियोरी चीज़ां नाश केरतां न छ़डेले, त अवं तुसन सेइं साथी अग्रोवं न रेइलो। उठ, प्रजारे लोकन पवित्र केर,” तैन सेइं ज़ो; झ़ेझ़ां तगर अपने-आपे पवित्र केरतां रखा; किजोकि इस्राएली लोकां केरो परमेशर यहोवा इन ज़ोते, “हे इस्राएल, तेरे दरमियाने मां अर्पण कियोरी चीज़ आस; एल्हेरेलेइ ज़ांतगर तू अर्पण कियोरी चीज़ एप्पु करां दूर न केरस, तांतगर तू अपने दुश्मना केरे सामने खड़ो न रेही सकेलो। एल्हेरेलेइ कालां झ़ेझ़ां तुस गोट्ले-गोट्लेरे मुताबिक नेड़े खड़े किये गाले; ते ज़ैस गोट्ले यहोवा ट्लालो तै एक्की-एक्की कुले नेड़े आने; ते ज़ैस कुले यहोवा ट्लाए तै घरानो-घरानो नेड़े एज्जे; फिरी ज़ैस घराने यहोवा ट्लाए तैस मरां अक-अक मड़द नेड़े एज्जे। तैखन ज़ैस मैन्हु मां यहोवा जो अर्पण कियोरी चीज़ मैल्हेली, तै ते ज़ैन किछ तैस कां भोल्हु तैन सब अग्गी मां छ़ेडतां फुक्कू गालू; किजोकि तैनी यहोवारो करार ट्लोड़ोरोए, ते इस्राएले मां बुरू कम कियोरूए।”
यहोशूए होरसां झ़ेझ़ां सुबेलो उठतां इस्राएली लोकां केरे गोट्ले-गोट्लेरे मुताबिक मिलापे बाले तेम्बु कां नेड़े आने, ते यहूदारो गोट्ल ट्लेइयोई जेव। तैखन तैनेईं यहूदारे खानदानेरे सारे लोक नेड़े आने, ते जेरह खानदानेरो कुल ट्लाव जेव; फिरी जेरह खानदानेरो घरानेरो अक-अक मड़द नेड़े आनो, ते जब्दी ट्लेइयोई जेव। तैखन यहोशूए तैसेरे घरानेरो अक-अक मड़द नेड़े खड़ो कियो, ते यहूदा गोट्लेरो आकान, ज़ैन जेरह खानदानेरे जेब्देरू पोट्लड़ू ते ज़ैन कर्मीरू मट्ठू थियूं, ट्लेइयोई जेवं। तैखन यहोशू आकाने सेइं ज़ोने लगो, “हे मेरे मट्ठां, इस्राएलेरे परमेशर यहोवारी आदर केर, ते ज़ैन तीं कियोरू तैसेरे सामने अपने पापे मन्न; ते ज़ैन किछ तीं कियोरूए तैन मीं सेइं ज़ो, ते मीं करां किछ न छ़ुपा।” आकाने यहोशू जुवाब दित्तो, “सच़्च़े मीं इस्राएलेरे परमेशर यहोवारे खलाफ पाप कियोरोए, ते इस तरीके सेइं कियोरूए। कि ज़ैखन अस यरीहो नगरे मां थिये, मीं लूटी मां बाबेल मुल्खेरो अक खूब रोड़ो चोगो, ते दूई किल्लो करां जादे चाँदी, ते लगभग अधो किल्लो सोन्नेरी अक इट लाही, तैखन मीं तैसेरू लालच़ केरतां तैन छ़ुपाव; तैन मीं अपने डेरे हैठ देबतां छ़ड्डू, ते सेभन करां बुन चाँदी रख्खोरीए।”
तैखन यहोशूए किछ दूत भेज़े, ते तैना तैस डेरे मां दौड़ते जे; ते कुन हेरू, कि तैना चीज़ां तैसेरे डेरे मां देबतां छ़ेड्डी, ते सेभन करां बुन चाँदी आए। तैन तैनेईं डेरे मरां केढतां यहोशू ते सारे इस्राएली लोकां केरे सामने एइतां यहोवारे सामने रेखी छ़डू। तैखन सारे इस्राएली लोकन समेत यहोशू जेरह खानेरे आकाने, ते तै चाँदी ते चोगो ते सोन्नेरी इट, ते तैसेरां मट्ठां कुइयां, ते तैसेरे दांत, ते गधे ते भैड्डां-छ़ेल्ली, ते तैसेरे डेरे, बल्के ज़ैन किछ तैसेरू थियूं तैन सब किछ आकोर नंव्वेरी बुनीयें वैदी मां नियूं। तैखन यहोशूए तैस सेइं ज़ोवं, “तीं असन किजो दुख दित्तोरोए? अज़्ज़ेरे दिहाड़े यहोवा तीं दुख देलो।” तैखन सारे इस्राएली लोकेईं तैस पुड़ पथराव कियो; ते तैसेरे मैन्हु ते तैसेरी सैरी चीज़ां फुक्की छ़ेडी। ते तैनेईं तैस पुड़ घोड़ां केरो अक बड्डो ढेर लाव, ज़ै अज़ तगर हेजू भी ढेर आहे; तैखन यहोवारो भड़कोरो क्रोध ठंडो भोइ जेव। एस्से वजाई सेइं तैस ठारारू नवं अज़ तगर आकोर वादी2 पेवरूए।
Source notes (2)
- Footnote खानी शबारीम
- Footnote आकोर वादी मुसीबतरी वादी
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.