Bhadrawahi Bible
होशे 4
इस्राएलेरे खलाफ परमेशरेरो क्रोध
हे इस्राएली लोकव, यहोवारू वचन शुना; इस मुल्खेरे लोकन सेइं यहोवारो मुकदमोए। इस मुल्खे मां न त कोई सच़्च़ाई आहे, न तैसेरी करुणा ते न कोई परमेशरेरू ज्ञाने।1 इड़ी श्राप देने, झूठ ज़ोने, कत्ल केरने, च़ोरी केरने, ते व्यभिचार केरनेरां अलावा होरू किछ न भोए; एना कानूनेरी हद पार केरतां कुकर्म केरतन ते खूने-खून भोतो रहते। एल्हेरेलेइ ई मुल्ख मातम केरेलो, ते धेरतरे जानबरन, ते अम्बरेरे च़ुड़ोलन समेत सब तैसेरे रानेबाले कमज़ोर भोइ गाले; ते समुन्दरेरी मेछ़ली भी नाश भोइ गैली।
यहोवा ज़ोते, हेरा, कोई मैन्हु बेंस न केरे, न कोई मैन्हु होरि पुड़ इलज़ाम लाए, किजोकि तेरे लोक त याजकन सेइं बेंस केरनेबालां केरे ज़ेरेन। तू भर दुपहरेईं ठोकर खालो, ते राती नबी भी तीं सेइं साथी ठोकर खाएले। अवं तेरी अम्मरो नाश केरेलो। मेरू ज्ञान न भोनेरी वजाई सेइं मेरे लोक नाश भोए; तीं मेरू ज्ञान घटिया समझ़ेरूए, एल्हेरेलेइ अवं भी तीं अपने याजक पदे करां हटेइलो। एल्हेरेलेइ कि तीं अपने परमेशरेरो कानून शारोरोए, एल्हेरेलेइ अवं भी तेरे खानदाने शैरेलो।
ज़ेत्री याजकां केरि तैधात बद्धती जेई, तेत्रे तैना मेरे खलाफ पाप केरते च़ले; अवं भी तैन केरे शान-ओ-शोकतरे बदले तैन्न शरमिन्दा केरेलो। तैना याजक मेरे लोकां केरि पापबलि खातन, ते इस लालच़े मां रहतन कि मेरे लोकां केरे पाप बधन। एल्हेरेलेइ ज़ै लोकां केरि हालत भोल्ही, तैए हालत याजकां केरि भी भोल्ही; अवं तैन केरे चाल च़लनेरी सज़ाह देइलो, ते तैन केरे कम्मां केरे मुताबिक तैन्न बदलो देइलो। तैना खाने त खाएले, पन रज़्ज़ेले न, तैना वेश्यागमन त केरेले, पन तैन केरे बच्चे न भोल्हे, किजोकि तैनेईं यहोवारे पासे मन लानो छ़ेडी दित्तोरोए।
इस्राएलेरी मूरती पूज़ा
वेश्यागमन ते पुरानी शराब ते नंव्वी शराब, इना ट्लाए अक्ल भ्रष्ट केरतन। मेरे लोक लेकड़रे मूरती करां सलाह नेतन, ते तैन केरि लेकड़री सोटी एजने बाले वक्तेरे बारे मां ज़ोतीए। किजोकि वेश्यापन केरनेबाली आत्मा तैना टपलावरेन, ते तैना अपने परमेशरेरे अधीन भोनू शैरतां वेश्यापन केरतन। बंज़, चिनार ते निक्के बंज़ बुट्टां केरि छाव रोड़ी भोतीए, एल्हेरेलेइ तैना तैन्न हैठ ते पहाड़ां केरि च़ोटी पुड़ बलिदान केरतन, ते पहैड़न पुड़ गुग्गल बालतन। एल्हेरेलेइ तुश्शी कुइयां वेश्या ते तुश्शी नुश्शां व्यभिचारिणी भोइ जेई। ज़ैखन तुश्शी कुइयां वेश्यापन ते तुश्शी नुश्शां व्यभिचार केरन, तैखन अवं तैन्न सज़ाह न देइलो; किजोकि लोक एप्पु वेश्यान कां अकैल्ले मां गातन, ते देवदेसन सेइं साथी बलि देतन; ज़ैना लोक बे समझ़न, तैना नाश भोइ गाले।
हे इस्राएल, अगर तू वेश्यापन केरतस, फिरी भी यहूदा दोषी न बने। गिलगाले मां न एज्जा, ते न बेतावेने जो गाथ; ते यहोवारी कसम ज़ोइतां कसम न केरा। किजोकि इस्राएले ज़िद्दी बेछ़री ज़ेरि जिद कियोरीए, हुनी कुन यहोवा तैन्न गबड़ेरे ज़ेरे खुल्ले डुल्ले मैइदाने मां च़रेलो?
एप्रैम मूरतन सेइं मिली जेवरोए; एल्हेरेलेइ तैस अकैल्ले छ़ेडी देथ। ज़ैखन तैना दाछ़रो रस पी छ़डतन तैखन वेश्यागमन केरने मां लेग्गी गातन; तैन केरे प्रधान शरमिन्दा भोने सेइं जादे प्यार केरतन। आँधी तैन्न अपने फंघन पुड़ छ़ुइतां नेली, ते तैन केरे देबतां केरे बलिदाना केरि वजाई सेइं तैना शरमिन्दे भोइ गाले।
Source notes (1)
- Cross-reference प्रका. 6:10.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.