Bhadrawahi Bible
होशे 3
इस्राएल परमेशरेरे पासे एइते
एक्की बार फिरी यहोवा मीं सेइं ज़ोवं, “हुनी गेइतां एक्की एरे कौन्शी सेइं प्यार केर, ज़ै बदचलन भोने पुड़ भी अपने प्यार केरनेबालेरी ट्लारी भोए, किजोकि तैस तरीके सेइं अगर इस्राएली बखले देबतां केरे पासे फिरे, ते किशमिशेरी टिक्कन सेइं प्यार रखतन, फिरी भी यहोवा तैन सेइं प्यार केरते।”
तैखन मीं अक कौन्श चैंदरे 15 सिक्के1 ते डैढ होमेर जौ2 देइतां घिन्नी। मीं तैस सेइं ज़ोवं, “तू काही च़िरे तगर मीं सेइं साथी बिश्शां; ते न वेश्यापन केरां, ते न कोन्ची मड़देरी कौन्श बेना; ते अवं भी तीं सेइं वफादारी केरेलो।” किजोकि इस्राएली लोक बड़े च़िरे तगर बगैर राज़े, बगैर हाकिमे, बगैर बलिदाने, बगैर पवित्र खम्भां केरे, ते बगैर एपोद या कुल देबतां केरे बिश्शोरे राले। तैसेरां बाद तैना अपने परमेशर यहोवा ते दाऊदेरे खानदाने मरां राज़े फिरी तोपेले, ते आखरी वक्ते मां यहोवा कां, ते तैसेरी कीमती चीज़ां हासिल केरनेरे लेई थरकते एज्जेले।
Source notes (2)
- Footnote चैंदरे 15 सिक्के 170 ग्राम चाँदी
- Footnote डैढ होमेर जौ लगभग 150 किल्लो जौ
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.