Bhadrawahi Bible
होशे 2
एल्हेरेलेइ तुसां लोक अपने इस्राएली ढालन सेइं अम्मी1 ते एपनी इस्राएली बेइन्न सेइं रुहामा2 ज़ोथ।3
परमेशरेरे अविश्वासी लोक
मेरे बच्चव, “एपनी अम्मा इस्राएले समझ़ाथ, किजोकि तै मेरी कौन्श नईं, ते न अवं तैसारो मुन्श आईं। तै अपने तुत्तरे पुड़ वेश्यापन ते अपने छ़ैती केरे दरमियान व्यभिचार अलग केरे;4 नईं त अवं तैसारां लिगड़ां खोलतां ज़ेन्च़रे ज़र्मते बार नग्गी थी, तेन्च़रे केरेलो, ते तैस अवं बियाबानेरी ज़ेरि ते कने खुशक ज़मीनरी ज़ेरि बनेइलो, ते अवं तैस ट्लिशी सेइं मारेलो। तैसारे बच्चन पुड़ भी अवं कोई दया न केरेलो, किजोकि तैना कुकर्मेरे बच्चेन। तैन केरि अम्मा वेश्यापन कियूं, ज़ैसारे गर्भे मां तैना पे, तैसां शरमरे काबल कम कियोरूए। तैसां ज़ोवं, ‘मेरे यार ज़ैना मीं रोट्टी-पानी, उन, सन, ते दाछ़रो रस देतन; अवं तैन्ने पत्ती च़लेली।’ एल्हेरेलेइ हेरा, अवं तैसारी बत्ती5 कंटेइं सेइं घेरेलो, ते एरहो बाड़ खड़ो केरेलो कि तैस बत न मैल्हेली। तै अपने यारन पत्ती च़लने सेइं भी तैस तैना न मैल्हेले। तैखन तै अपने आपे सेइं ज़ोली, ‘अवं अपने पेइले मुन्शे कांजो फिरी वापस गाली, किजोकि मेरी पेइली हालत अज़्ज़ेरे हालती करां रोड़ी थी।’ तै एन न थी ज़ानती, कि अन्न, नंव्वो दाछ़रो रस ते तेल अव्वें तैस देतो थियो, ते तैसेरे लेई सोन्नू ते चाँदी ज़ैस तै बाल देबतेरी पूज़ा केरनेरे लेई इस्तेमाल केरती थी अव्वें देतो थियो। एल्हेरेलेइ अवं एपनी फसलरे मौके अपनु अन्न, ते नंव्वे दाछ़रे रस्से वापस नेइलो, ते अपनि उन्ना ते सन भी वापस नेइलो ज़ैस सेइं तै अपनो आप ढकतीए। एल्हेरेलेइ अवं तैसेरे यारा केरे सामने तैस नग्गी केरेलो, ते मेरे हथ्थे करां कोई तैस छुटेई न बटेलो। ते अवं तैसारे तिहारन, नंव्वों चाँद, ते आरामेरी दिहैड़ी ते सब ठहरावरां तिहारां केरो खातमों केरतां छ़डेलो। अवं तैसारे दाछ़रे बुट ते फैगेरे बुट, ज़ैन केरे बारे मां तै ज़ोतीए एन मेरे यारेईं मीं दित्तोरूए। तैन अवं एन्च़रे उज़ाड़ेलो कि जंगल भोइ गालू, ते जंगली जानबर तैन्न खाएले। तैना दिहाड़े ज़ैन मां तै बाल देबतेरे मूरती केरे लेई गुग्गल बलतीए, ते नथ ते हार गले मां लेइतां अपने यारन पत्ती गातीए, ते मीं बिसरी गातीए, तैन दिहैड़ी केरि सज़ाह अवं तैस देइलो, यहोवा एन ज़ोते।
परमेशर अपने लोकन पुड़ दया केरते
“एल्हेरेलेइ हेरा, अवं तैस बियाबाने मां नेइलो, ते अवं तैस सेइं शैन्तरी गल्लां केरेलो। तैड़ी अवं तैस दाछ़री बागां देइलो, ते आकोर नंव्वेरे वैदी उमीदरू दार बनेइलो ते तैड़ी तै मीं सेइं एरी गल्लां केरेली ज़ेरि एपनी जुवैनरे दिहाड़न मां मतलब ज़ेन्च़रे मिस्र मुल्खेरां च़ले एजनेरे मौके केरती थी। ते यहोवा एन ज़ोते कि तैस मौके तू मींजो मुन्श ज़ोली ते हे मालिक न ज़ोली। किजोकि एजने बाले वक्ते मां अवं तैस बाल देबतां केरू नवं न घिन्ने देइलो; ते न तैन केरां नव्वां फिरी याद न रालां। ते तैस मौके अवं तैन केरे लेई जंगली जानबरन ते अम्बरेरां च़ुड़ोलू ते ज़मीनी पुड़ पेटेरे भारे च़लनेबाले जीपन सेइं करार केरेलो, ते धनुष ते तलवार ट्लोड़तां जंग तैन केरे मुल्खे मरां दूर केरेलो; ते एरहु केरेलो कि तैना लोक बे फिक्र भोइतां झ़ुलेले। अवं हमेशारे लेई तीं अपनि कौन्श बनेइलो, ते ई वाधो तीं सेइं धार्मिकता ते न्याय ते करुणा ते दया सेइं केरेलो। ई वाधो सच़्च़ैई सेइं कियो गालो, ते तू यहोवा पिशानेली।
“यहोवा एन ज़ोते कि अवं तैस वक्त अम्बरेरी शुन्तां अपने लोकन जुवाब देइलो, ते तै धेरतरी शुन्तां तैस जुवाब देलो। ते धरती अन्न, नंव्वो दाछ़रो रस ते ताज़े तेलेरी शुन्तां तैन्न जुवाब देली, ते तैना यिज्रेले जुवाब देले। अवं इस्राएले अपने लेई मुल्खे मां बेलो, ते लोरुहामा पुड़ दया केरेलो, ते लोअम्मी सेइं ज़ोलो, तुस मेरे लोकथ, ते तैना ज़ोले, ‘हे इश्शे परमेशर।’”6
Source notes (6)
- Footnote अम्मी मतलब मेरे अपने लोक
- Footnote रुहामा मतलब मेरे ज़ैन पुड़ दया की।
- Cross-reference 1 पत. 2:10.
- Footnote मतलब वेश्यापन ते व्यभिचार केरनो बन्द केर।
- Footnote तैसारी बत्ती या तुश्शी बत
- Cross-reference रोम. 9:25;1 पत. 2:10.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.