होशे 1

1यहूदा प्रदेशेरे राज़े उज्जियाह, योताम, आहाज, ते हिजकिय्याहेरे राज़ केरनेरे दौरान ते इस्राएल मुल्खेरे राज़े योआशेरे मट्ठे यारोबामेरे राज़ केरनेरे दौराने मां यहोवा बेरी एरे मट्ठे होशे1 नेबी सेइं गल्‍लां केरतो राव।

होशेरी बेवफा कौन्श

2ज़ैखन यहोवा होशे नेबेरे ज़िरिये इस्राएले सेइं गल्‍लां केरनी शुरू की, तैखन तैनी होशे सेइं ज़ोवं, “गा एक्‍की वेश्या सेइं ड्लाह बना, ते तैसारे कुकर्मेरी औलाद अपनि बना, किजोकि इस मुल्खेरे लोक यहोवा पत्ती च़लनू शैरतां होरि देबतां केरि पूज़ा केरतां वेश्यारां ज़ेरां कम्मां केरतन।” 3एल्हेरेलेइ होशे गेइतां दिबलैमेरी कुई गोमेरी सेइं ड्लाह बनाव, ते तै तैस सेइं दोज़ींती भोइ जेई ते तैसां एक्‍की मट्ठे ज़र्म दित्तू।

4तैखन यहोवाए होशे सेइं ज़ोवं, “तैसेरू नवं यिज्रेल रख; किजोकि अवं जल्दी येहूएरे खानदाने यिज्रेलेरे कत्लेरी सज़ाह देइलो, ते अवं इस्राएलेरे खानदानेरू राज़ नाश केरेलो। 5तैस मौके अवं यिज्रेलेरी वैदी मां इस्राएलेरे सेनारी ताकत खतम केरेलो।”

6गोमेर फिरी दोज़ींती भोइ ते तैस अक कुई भोइ। तैखन यहोवा होशे सेइं ज़ोवं, “तैसारू नवं लोरुहामा2 रख; किजोकि अवं इस्राएलेरे घराने पुड़ फिरी कधे दया केरतां तैन केरो पाप कोन्ची तरीके सेइं माफ़ न केरेलो।3 7पन यहूदारे लोकन पुड़ अवं दया केरेलो, ते तैन छुटकारो देइलो; ते तैन केरो छुटकारो अवं धनुषे या तलवारी या जंगी सेइं या घोड़न या सुवारन सेइं नईं, पन अवं तैन केरो परमेशर यहोवा एप्पु तैन्न छुटकारो देइलो।”4

8ज़ैखन गोमेरां लोरुहामारू दुद्ध छुटावं, तैखन तै फिरी दोज़ींती भोइ ते तैस अक होरू मट्ठू भोवं। 9तैखन यहोवाए होशे सेइं ज़ोवं, “एसेरू नवं लोअम्मी5 रख। किजोकि तुसां मेरे लोक नईं, ते न अवं तुश्शो परमेशर रेइलो।”

इस्राएलेरू दुबारां आबाद भोनू

10फिरी भी इस्राएली लोकां केरि गिनती समुन्दरेरी रेतरे बराबर भोल्ही, ज़ैन केरि नाप केरनी ते गिनती केरनी नामुमकिन आहे; ते ज़ैस जगाई पुड़ तैन सेइं एन ज़ोवं गातू थियूं, “कि तुसां मेरे लोक नईं,” तैस्से जगाई पुड़ तैन जो ज़ींते परमेशरेरां मट्ठां ज़ोवं गालू।6

11तैखन यहूदी ते इस्राएली लोक दूईये अकोट्ठे भोइतां अपनो अक प्रधान च़ुनतां मुल्खे मरां निस्सी एज्जेले; किजोकि यिज्रेलेरी दिहाड़ी खास भोल्ही।