Bhadrawahi Bible
दानिय्येल 12
आखरी दिहाड़ां केरि नबूवत
“तैस्से मौके मीकाएल नंव्वेरो स्वर्गदूतां केरे प्रधान, ज़ै तेरे कौमी ढ्लां केरि मद्दत केरनेरे लेई खड़ो रहतो थियो, तै उठेलो। तैखन एरी मुसीबतरो मौको भोल्हो, ज़ेरो कोन्ची कौमरे पैदा भोने करां लेइतां अज़ तगर कधे नईं भोवरो; पन तैस मौके तेरे लोकन मरां ज़ेत्रां केरां नंव्वां परमेशरेरी किताबी1 मां लिखोरन, तैना बेंच़ी गाले। ते ज़ैना ज़मीनी मां दबोरेन तैन मरां बड़े लोक ज़ींते भोल्हे, बड़े लोक हमेशारी ज़िन्दगरे लेई, ते बड़े एपनी बदनैमरे लेई ते बड़े भिट्टे ठहरनेरे लेई।2 तैखन अक्लमन्दा केरि चमक अम्बरेरी ज़ेरि भोल्ही, ते ज़ैना बड़े लोकन धर्मी बनातन, तैना तारां केरे ज़ेरे लौ देते राले।3 पन हे दानिय्येल, तू इस किताबी पुड़ मोहर लेइतां एन वचन दुनियारे आखरी तगर बन्द केरतां छ़ड। ते बड़े लोक पुछ़ेले ते तोपेले, ते तैस सेइं ज्ञान भी बेधी गालू।”
तैखन मीं दानिय्येले कुन लावं कि दूई मड़द4 मेरे सामने खड़ेन, अक त दरियाएरे इस पासे, ते होरो दरियाएरे उस पासे। तैखन ज़ै मैन्हु ज़ैस सनेरां लिगड़ां लगोरां थियां ते दरियाएरे पैनी पुड़ खड़ो थियो, तैस तैन मैन्हन मरां एक्के पुछ़ू, “एना हैरान केरनेबैली चीज़ां केरो अन्त केइस तगर भोल्हो?” तैखन ज़ैस मैन्हु ज़ैस सनेरां लिगड़ां लगोरां थियां ते दरियाएरे पैनी पुड़ खड़ो थियो, ते तैनी मेरे शुनते अपने देइने ते बांए अपने दूईये हथ सुर्गेरे पासे खड़े केरतां, हमेशा ज़ींते रानेबाले परमेशरेरी कसम खेइतां ज़ोवं, “ई हालत सड़े ट्लाई कालन तगर राली; ते ज़ैखन पवित्र लोकां केरि शक्ति ट्लुटतां खतम भोइ गाली, तैखन इनां गल्लां पूरी भोल्ही।”5 एना गल्लां त अवं शुनतो थियो पन मीं कोई समझ़ न अई। तैखन मीं ज़ोवं, “हे मेरे मालिक, एन गल्लां केरो आखरी फल कुन भोल्हो?” तैनी जुवाब दित्तो, “हे दानिय्येल च़लो गा; किजोकि एना गल्लां आखरी ज़माने तगर बन्द कियोरिन ते एन पुड़ मोहर लेवरीए। बड़े लोक त अपने आपे निर्मल ते उज़ले केरेले, ते साफ भोइ गाले, पन बुरे लोक बुराई केरेले; ते बुरे लोकन मरां कोई भी इनां गल्लां न समझ़ेलो; पन ज़ैना अक्लमन्दन तैन्ना समझ़ेले। ज़ैखन करां रोज़ेरी होमबलि बन्द की गाली, ते तै भिट्टी चीज़ उज़ाड़तीए; खड़ी की गाली, तैखन करां बाद 1290 दिहाड़े बीती गाले। धने तै मैन्हु ज़ै बलगते-बलगते 1335 दिहाड़न तगर पुज़्ज़ी गाए। पन तू गेइतां अपने ज़िन्दगरे आखरी तगर रुकोरो रा; ते तू आराम केरतो रालो; ते दुनियारे आखरी मां तू अपनो हिस्सो हासिल केरेनेरे लेई ज़ींतो भोल्हो।”
Source notes (5)
- Footnote परमेशरेरी किताबी ज़िन्दगरी किताब। निर्ग. 32:2-33; भज. 69:28; प्रका. 3:5.
- Cross-reference यूह. 5:28-29.
- Cross-reference मत. 13:43.
- Footnote दूई मड़द दूई स्वर्गदूत
- Cross-reference प्रका. 10:5-7.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.