Bhadrawahi Bible
दानिय्येल 11
“दारा नंव्वेरे मादी राज़ेरे पेइले साले मां तैस हिम्मत देनेरे लेई ते ताकत देनेरे लेई अवं खड़ो भोइ जेव।
“ते हुनी अवं तीं सेइं सच़्च़ी गल ज़ोताईं। हेर, फारस रियासती मरां हुनी ट्लाई राज़े खड़े भोल्हे; ते च़ेवरोवं राज़ो बाकी राज़न करां जादे दौलतमन्द भोल्हो; ज़ैखन तै दौलतरी वजाई सेइं बड़ो ताकतबर भोल्हो, तैखन तै सैरी लोकन यूनानेरे रियासतरे खलाफ उभारेलो। तैखन अक शक्तिशाली राज़ो खड़ो भोल्हो, ज़ै अपनि हुकूमत बधालो, ते अपने मेर्ज़रे मुताबिक कम केरतो रालो। ते तैसेरी हुकूमत ज़मनेरां बाद तैसेरू राज़ ट्लूटी गालू ते च़ेवरे पासन बेंटोइतां अलग-अलग भोइ गालू; न तैन केरि औलादी मैल्हेलू न तैसेरो दबदबो रालो, तैसेरी हुकूमत ज़ीलना ढ्लूड़तां होरन दित्ती गाली।
उत्तर ते दक्षिणेरे राज़न जो खबरदारी
“तैखन दक्षिण मुल्खेरो राज़ो1 ताकतबर भोल्हो; पन तैसेरो अक हाकिम शक्तिशाली भोइतां हुकूमत केरेलो, इड़ी तगर कि तैसेरी हुकूमत बड़ी भोइ गाली। किछ सालां केरे बीतनेरां बाद, तैना दूईये एप्पु मांमेइं समझोतो केरेले, दक्षिण मुल्खेरे राज़ेरी कुई उत्तर मुल्खेरे2 राज़े जो ड्लाई गाली ते शैन्तरो करार कियो गालो, पन तैसारी शक्ति बनोरो राली ते न तै राज़ो ते न तैसेरू नवं रालू; पन तै कौन्श अपने पुज़ाने बालन ते अपने बाजी ते अपने सम्भालने बालन समेत अलग की गाली।
“पन तैसारे खानदाने मां अक मैन्हु पैदा भोल्हो ज़ै तैसारी ठारी पुड़ एज्जेलो; तै सेना समेत उत्तरेरे राज़ेरे क़िले पुड़ हमलो केरेलो, ते तैन सेइं जंग केरतां कामयाब भोल्हो। तैखन तै तैन केरि बनेवरी देबतां केरि मूरती, ते सोन्ने चैंदरी कीमती चीज़ां थुसोड़तां मिस्रे जो नेलो; ते किछ सालन तगर तै उत्तरेरे राज़े सेइं मिलोरो रालो। तैखन तै राज़ो दक्षिण मुल्खेरे राज़ेरी हुकूमती पुड़ हमलो केरेलो, पन अपने मुल्खे जो वापस गालो।
“तैसेरां मट्ठां जंगरी तियारी केरेलां, ते अक बड़ी सेना अकोट्ठी केरेले, ते एक्की बगनेबाले दरियाएरे बराबर बेनतां मुल्खे मांमेइं निस्तां गाले, ते वापस एइतां तैसेरे मज़बूत क़िले तगर जंग केरेले। तैखन दक्षिण मुल्खेरो राज़ो बड़े क्रोधे सेइं निसेलो, ते उत्तर मुल्खेरे राज़े सेइं लड़ेलो ते बड़ी सेना अकोट्ठी केरेलो पन जंग हैरी गालो। तैस सेना हैरेइतां तै बड़ू घमण्ड केरेलो, ते तै लखेइं लोकन मारेलो, पन तै लगातार कामयाब न भोल्हो। किछ सालां केरे बाद उत्तर मुल्खेरो राज़ो अक होरि सेना अकोट्ठी केरेलो, ज़ै पेइली सेनाई करां जादे भोल्ही, ते किछ सालना बाद अक भारी सेना एन्हतां चढ़ाई केरेलो।
“तैन दिहाड़न मां बड़े लोक दक्षिण मुल्खेरे राज़ेरे खलाफ खड़े भोइ गाले; तेरे लोकन मरां ज़ुलम केरनेबाले खड़े भोल्हे, ज़ैस सेइं इस दर्शनेरी गल पूरी भोइ गाए; पन तैना ठोकर खेइतां न बिछ़ड़ेले। तैखन उत्तर मुल्खेरो राज़ो एइतां दमदमो बन्धेलो, ते मज़बूत नगरे पुड़ कब्ज़ो केरेलो। ते दक्षिण मुल्खेरे न त प्रधान खड़े राले ते न बड़े बहादर; किजोकि कोन्ची खड़े रानेरी हिम्मत न राली। तैखन ज़ै भी तैन केरे खलाफ खड़ो भोल्हो, तै अपनि मर्ज़ी पूरी केरेलो, ते तै हथ्थे मां सत्यानाश केरतां शानदार मुल्खे मां भी खड़ो भोल्हो ते तैसेरो सामनो केरनेबालो कोई न रालो। तैखन उत्तर मुल्खेरो राज़ो, अपने हुकूमतरे पूरे शेक्ति समेत, काई सिद्धे लोकन साथी एन्हतां एज्जेलो, ते अपने मेर्ज़ी सेइं कम केरेलो। ते तै दक्षिण राज़े अक कौन्श एल्हेरेलेइ देलो कि तैसेरी हुकूमत बिगड़ी गाए; पन तै कायम न राली, न तैस राज़ेरी भोल्ही। तैखन तै जज़ीरां केरे पासे बेदलोई गालो, ते तैन मरां केही जज़ीरन पुड़ कब्ज़ो केरेलो; पन तैसेरो अक सेनापति तैसेरो घमण्ड मटेइतां छ़डेलो; बल्के तैसेरे घमण्डेरे मुताबिक तैस बदलो देलो। तैखन तै अपने मुल्खेरे क़िलां केरे पासे फिरेलो, ते तै जंगी मां हारेलो, ते कोन्ची तैसेरो पतो न मैल्हेलो।
“तैखन तैसेरी ठारी पुड़ेरां कोई एरहो खड़ो भोल्हो, ज़ै तैस खूबसूरत रियासती मां अंधेर केरनेबाले खूब घुमालो; ते थोड़े दिहाड़े बीतनेरां बाद तै बगैर जंगरे नाश भोइ गालो।
“तैसेरी ठारी पुड़ेरां अक घटिया मैन्हु खड़ो भोल्हो, ज़ेसेरी शाही इज़्ज़त पेइली त न भोल्ही; फिरी भी तै सुखेरे वक्त एइतां चिकनी-चुपड़ी गल्लां केरे ज़िरिये राज़ हासिल केरेलो। फिरी अक ज़बरदस्त सेनाई सेइं लोक, बल्के करारेरो प्रधान भी तैसेरे सामनेरां भी भेटकां नाश भोल्हे। किजोकि तै तैस सेइं करार केरने पुड़ भी धोखो केरेलो, ते थोड़े ज़ेरे लोक नेइतां चढ़ाई केरेलो ते कामयाब भी भोल्हो। सुखेरे वक्त तै सूबेरे खूबसूरते करां खूबसूरत ठारन पुड़ चढ़ाई केरेलो; ते ज़ैन कम न तैसेरे दादे-पड़दादे केरे पूर्वज केरते थिये, तैस तै केरेलो; ते लुटोरो धन-दौलत तैन मां बड़ी बंटेलो। तै किछ वक्ते मज़बूत नगरन पुड़ कब्ज़ो केरनेरे लेई साज़िश केरतो रालो। तैखन तै अक बड़ी ज़बरदस्त सेना नेइतां दक्षिण मुल्खेरे राज़ेरे खलाफ अपनि हिम्मत ते ताकत मज़बूत केरेलो, ते दक्षिण मुल्खेरो राज़ो अक बड़ी ज़बरदस्त सेना नेइतां लड़ाई मां उतरी गालो; पन तै मुकाबलो न केरि बटेलो किजोकि लोक तैसेरे खलाफ योजना बनाले। तैसेरे शाही आदालतरे लोक भी तैस हाराले; ते अगर तैसेरी सेना हड़ेरी ज़ेरि एज्जेली, फिरी भी तैसेरे बड़े लोक मेरि गाले। तैखन तैन दूईये राज़ां केरे दिल बुरैइारे पासे लग्गेले, एड़ी तगर कि तैना एक्की मेज़े पुड़ बिशतां एक्की होरि सेइं झूठ ज़ोले, पन तैस सेइं किछ न बनेलू; किजोकि एन सेभी गल्लां केरो खातमों ठीक मौके पुड़ भोने बालोए। तैखन उत्तर मुल्खेरो राज़ो बड़ी धन-दौलत लुटतां अपने मुल्खे जो वापस गालो; ते तैसेरो दिल पवित्र करारेरे खलाफ भोल्हो, ते तै अपनि मर्ज़ी पूरी केरतां अपने मुल्खे जो वापस गालो।
उत्तर मुल्खेरो राज़ो परमेशरेरी निन्दा केरते
“परमेशरेरे ठहरावरे मौके पुड़ तै फिरी एक्की फेरे दक्षिण मुल्खे पुड़ हमलो केरेलो, पन तै पेइले फेरेरो ज़ेरो इस फेरे कामयाब न भोइ बटेलो। किजोकि कित्ती लोकां केरां ज़िहाज़ां तैसेरे खलाफ एज्जेलां ते तैना उदास भोइतां वापस गालां; ते पवित्र लोकन पुड़ अपनो क्रोध भड़कालो। तै वापस गेइतां ज़ैन लोकेईं पवित्र करारेरे ट्लोड़ोरोए तैन केरि मद्दत केरेलो। तैखन तैसेरे मद्दतगार खड़े भोइतां, मज़बूत पवित्र ठार अपवित्र केरेले, ते रोज़ेरी होमबलि बन्द केरि देले। ते तैना तैस भिट्टी चीज़ी खड़ी केरेले ज़ै उज़ाड़ केरतीए। ते ज़ैना लोक दुष्ट भोइतां तैस करारे ट्लोड़ेले, तैन्न तै चिकनी-चुपड़ी गल्लां ज़ोई-ज़ोइतां भक्तिहीन केरेलो; पन ज़ैना लोक अपने परमेशरेरू ज्ञान रखेले, तै हिम्मत बधेइतां बड़ां कम्मां केरेले। ते लोकन शिखालनेबाले अक्लमन्द मैन्हु बड़े लोकन समझ़ाले, किछ च़िरे तगर तैना तलवार, अग्गी मां फुकोइतां, ते गुलाम बेनतां ते लुटतां बड़े दुखे मां पेवरू राले। ज़ैखन तैना दुखे मां पेले तैखन थोड़े सम्भालाले, पन बड़े लोक चिकनी-चुपड़ी गल्लां ज़ोई-ज़ोई तैन सेइं मिलेले; ते अक्लमन्दन मरां बड़े बिछ़ड़ेले, ते एल्हेरेलेइ बिछ़ड़ेले कि परखे गान; ई हालत आखरी वक्ते तगर बनोरी राली, किजोकि इन सब गल्लां केरो अन्त परमेशरेरे ठहरावरे वक्ते मां भोने बालोए।
“तैखन तै राज़ो एपनी मेर्ज़रे मुताबिक कम्मां केरेलो, ते अपनो आप सेभी देबतन करां उच्चो ते बड़ो ठहरेलो; बल्के होरि देबतां केरे ईश्वरां केरे खलाफ आजीब गल्लां केरेलो। ते ज़ांतगर परमेशर क्रोधित न भोइ गाए, तगर तैस राज़ेरू कम कामयाब भोतू रालू; किजोकि ज़ैन किछ निश्चो केरतां सोचोरूए तैन ज़रूर पूरू भोनेबालू आहे। तै अपने बुज़ुर्गां केरे देबतेरी कोई फिक्र न केरेलो, ते न कौन्शां केरे पियारेरी कोई परवाह केरेलो ते न कोन्ची देबतेरी; किजोकि तै अपने आपे सेभन करां बड्डो बनेलो। तै अपने ठैरी कायम रेइतां मज़बूत गढ़ां केरे देबतां केरि इज़्ज़त केरेलो, एक्की एरे देबते ज़ैस तैसेरे दादे-पड़दादे भी ज़ानते थिये, तै सोन्नू, चाँदी, मणि ते कीमती चीज़ां च़ैढ़तां तैसेरी आदर केरेलो। तैस बेगाने देबतेरी मद्दती सेइं मज़बूत क़िलन पुड़ हमलो केरेलो, ते ज़ै तैस मन्नेलो तैस इज़्ज़त देलो, एरे लोकन तै बड़े लोकन पुड़ हुकूमत देलो, ते अपने फैइदेरे लेई अपने मुल्खेरे ज़मीनी बंटेलो।
उत्तरी राज़ेरी ज़ीत
“आखरी वक्ते मां दक्षिण मुल्खेरो राज़ो तै लड़ाई मां घसीटतां नेलो; पन उत्तर मुल्खेरो राज़ो बड़े रथ-सुवार घोड़, ते ज़िहाज़न समेत तैस पुड़ हमलो केरेलो; इस तरीके सेइं तै बड़े मुल्खन मां फैली गालो, ते तैन मरां निस्सी गालो। तै तैस खूबसूरत इस्राएल मुल्खे मां भी एज्जेलो, ते बड़े मुल्ख उज़ड़ी गाले, पन एदोमी, मोआबी, ते खास-खास अम्मोनी वगेरा कौमां केरे मुल्ख तैसेरे हथ्थे करां बेच़ी गाले। तै काही मुल्खन पुड़ अपनि हुकूमत ज़मालो ते मिस्र मुल्ख भी न बच़ेलो। तै मिस्र मुल्खेरे सोन्ने चैंदरे खज़ाने ते सब कीमती चीज़ां केरेलो मालिक भोल्हो; ते लूबी ते कूशी लोक भी तैस पत्ती भोइ गाले। तैस्से वक्ते तै पूरब ते उत्तर पासन खबर शुन्तां घबरालो, ते बड़े क्रोधे मां एइतां तै काही लोकां केरो नाश केरनेरे लेई निस्सेलो। ते तै भूमध्य-सागर ते सिय्योन पहाड़ेरे दरमियान अपनो शाही तेम्बु खड़ो केरेलो; एत्रू केरने पुड़ भी तैसेरो अन्त एज्जेलो, ते कोई तैसेरी मद्दत न केरेलो।
Source notes (2)
- Footnote दक्षिण मुल्खेरो राज़ो मतलब मिस्र मुल्खेरे दक्षिणेरो राज़ो।
- Footnote उत्तर मुल्खेरे मतलब सीरिया
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.