Bhadrawahi Bible
होशे 5
इस्राएल ते यहूदारो न्याय
यहोवा इन भी ज़ोते, हे याजकव, ऐह गल शुना! हे इस्राएलेरे घराना, ध्यान देइतां शुना! हे राज़ेरे घराना, तुसां भी ध्यान देथ! किजोकि तुश्शो न्याय कियो गालो; किजोकि तुसां मिस्पा नगरे मां फंदो, ते ताबोर पहाड़े पुड़ फैलेवरू जाल बेनि गा। तैन बगावत केरनेबाले लोकेईं बड़ो खून कियोरोए, एल्हेरेलेइ अवं तैन सेभन सज़ाह देइलो।
अवं एप्रैमेरो भेद ज़ानताईं, ते इस्राएलेरी हालत भी मीं करां छ़पोरी नईं; हे एप्रैम, तीं वेश्यापन कियूं, ते इस्राएल अशुद्ध भोवरोए।
तैन केरां कम्मां तैन्न अपने परमेशरेरे पासे फिरने न देन, किजोकि वेश्यापन केरनेबाली आत्मा तैन मां रहतीए; ते तैना यहोवा न ज़ानन।
इस्राएलेरू घमण्ड तैन केरे खलाफ गवाही देते, ते इस्राएल ते एप्रैम अपने पापेरे वजाई सेइं ठोकर खाएले, यहूदा भी तैन सेइं साथी ठोकर खालो। तैना बलिदान केरनेरे लेई अपना गोरू गब्बां घिन्तां यहोवा तोप्पने च़लेले, पन तै तैन न मैल्हेलो; किजोकि तै तैन करां दूर भोवरोए। तैना यहोवा सेइं वफादार न राए; किजोकि तैना तैन केरे बच्चे तैसेरे नईं। हुनी तैन केरे नंव्वे चाँदेरां तिहारां तैन ते तैन केरे उडारन चट केरतां छ़डेलां।1
गिबा नगरेरे पहाड़े पुड़े नरशिंगो बज़ाथ, ते रामाह नगरेरे पहाड़े पुड़ तुरही बज़ाथ। बेतावेन नगरे मां जंगरू एलान केरतां ज़ोथ; हे बिन्यामीन, अग्रोवं च़ल! सज़ारे दिहाड़े एप्रैम तबाह भोइ गालो; ज़ैन भोनू पक्कू आहे, मीं तैसेरो सन्देश इस्राएलेरे सब गोट्लन दित्तोरोए। यहूदा प्रदेशेरे हाकिम तैन केरे ज़ेरे भेवरेन ज़ैना अपनि हद अग्रोवं बद्धातन; अवं अपनि जलजलाहट तैन पुड़ पैनेरी ज़ेरि डोलेलो। एप्रैमे पुड़ ज़ुलम कियो जेवरोए, तैनी मुकदमो हारो; किजोकि तै पूरे दिले सेइं तैस हुक्मे पुड़ च़लो। एल्हेरेलेइ अवं एप्रैमेरे लेई कीड़ेरो ज़ेरो ते यहूदारे लोकां केरे लेई शड़नेरो ज़ेरो भोल्हो।
ज़ैखन एप्रैमे अपनि बिमारी, ते यहूदा अपनो ज़खम लाव, तैखन एप्रैम मद्दतरे लेई अश्शूरे कां जेव, ते यारेब राज़े जो समाद भेज़ो। पन न तै तुसन बझ़ेइं सकते, ते न तुश्शे ज़खम ठीक केरि सखते। किजोकि अवं एप्रैमेरे लेई शेर, ते यहूदारे लेई जुवान शेर बनेलो। अवं तैन एप्पु छ़िन्दी छ़डेलो; ज़ैखन अवं तैन सेल्हतां नेइलो, तैखन मेरे पंजे करां कोई न छुटेई बटेलो।
फिरी ज़ांतगर तैना लोक अपने पाप मेनतां मेरू दर्शन न तोपेले, तांतगर अवं एपनी ठारी पुड़ जो वापस न गालो, ते ज़ैखन तैना मुसीबती मां पेले, तैखन दिले सेइं मीं तोपेले।
Source notes (1)
- Footnote हमलो केरनेबालो या तैन केरां बुरां कम्मां तैन तबाह केरेलां।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.