Bhadrawahi Bible
होशे 10
इस्राएली केरो पाप ते तैन केरि गुलामी
होशे नबी ज़ोते, इस्राएल अक फलदार दाछ़री ज़ेरि बागे, ज़ैस मां बड़े फल भी लगोरेन, पन ज़ेन्च़रे-ज़ेन्च़रे तैसारे फल बेडोन, तेन्च़रे-तेन्च़रे तैसां जादे देबतां केरे लेई वेदी बनेई ज़ेन्च़रे-ज़ेन्च़रे तैसेरी ज़मीन सुधरती जेई, तेन्च़रे तैना पूज़ा केरनेरे लेई खूबसूरत खम्भे बनाते जे। तैन केरो मन बेंटोरोए; हुनी तैना दोषी ठहरेले। तै तैन केरि वेदन ट्लोड़ेलो, ते तैन केरे पूज़ा केरनेरे खम्भां केरे टुक्ड़े-टुक्ड़े केरेलो। हुनी तैना एक्की होरि सेइं ज़ोले, “इश्शो कोई राज़ो नईं, किजोकि असेईं यहोवारो डर नईं मन्नोरो; एल्हेरेलेइ राज़ो हुनी इश्शू कुन केरि सकते?” इश्शे राज़े गल्लां बनातन ते झूठी कसम खेइतां करार केरतन; एल्हेरेलेइ उडारेरे सींथन मां धँतूरेरी ज़ेरि सज़ाह फुलेली फलेली। सामरिया नगरेरे रानेबाले लोक बेतावेनेरे बछ़ड़ां केरे सोन्नेरे मूरती केरि पूज़ा केरेले, ते तैसेरे लोक तैसेरे लेई मातम केरेले; ते तैसेरे पुजारी ज़ैना तैसेरी वजाई सेइं मसत भोते थिये तैसेरे प्रताप हासिल केरनेरे लेई एल्हेरेलेइ मातम केरेले किजोकि तै तैन करां च़लो जेवरोए। तै अश्शूरे जो नियो गालो, ते यारेब राज़े कां पेश कियो गालो। एप्रैम शरमिन्दा भोल्हो, ते इस्राएल भी ज़ैन तैनी कियोरू तैसेरे वजाई सेइं शरमिन्दा भोल्हो।
सामरिया अपने राज़े समेत पैनेरे बुलबुलेरो ज़ेरो मिटी गालो। आवेन देबतेरे उच्ची ठारां ज़ैना इस्राएलेरे पापन, तैना नाश भोइ गाले। तैन केरि वेदन पुड़ करेर, बुट ते झ़ैल्लां लग्गेलां; ते तैस वक्त लोक पहाड़न सेइं ज़ोले, असन छ़ुपाथ, ते पहैड़न सेइं ज़ोले असन पुड़ बिछ़ड़ा।1 यहोवा ज़ोते, हे इस्राएल, तू गिबारे दिहाड़ां केरो देंतो पाप केरतो एवरोस; तैना तैस्से मां बनोरे रान; कुन तैना गिबा मां बुरे मैन्हु सेइं साथी लड़ैई मां न फसेले? ज़ैखन मेरी मर्ज़ी भोल्ही तैखन अवं तैन सज़ाह देइलो, ते मुल्खे-मुल्खेरे लोक तैन केरे खलाफ अकोट्ठे भोल्हे; किजोकि तैना अपने दूईये पापन मां फसोरेन।
एप्रैम सुधारोरी बछ़ी आहे, ज़ै फसल मडने सेइं खुश भोतीए, पन मीं तैसारे खूबसूरत मेट्टू पुड़ जुऊं रखोरूए; अवं एप्रैमे पुड़ सुवार च़ाढ़ेलो; यहूदा हल च़लालो; ते याकूब हेंगो दीलतां ढैल्लां भन्नेलो। अपने लेई धार्मिकतारू बीज़ बेथ, ते करुणारे मुताबिक फसल केट्टी बटेले; अपनि खिल्ली ज़मीन बेथ; हेरा, हुन्ना यहोवा पत्ती च़लनेरो वक्ते, ताके तै एज्जे, ते तुसन पुड़ धार्मिकता बरसाए।2
पन तुसेईं बुरैइारे लेई ऊडारां बेआं, ते ज़ुलमेरी फसल कट्टी; ते तुसेईं धोखेरे फल खाए। एन एल्हेरेलेइ भोवं किजोकि तुसेईं अपने बुरे नीती पुड़, ते अपने बड़े बहादर सिपेहिन पुड़ भरोसो रखोरो थियो। एल्हेरेलेइ तुश्शे लोकन मां हंगामो भोल्हो, ते तुश्शे सब क़िले एरे नाश किये गाले ज़ेन्च़रे बेतर्बेल नगर जंगरे वक्ते शल्मन राज़ेरे ज़िरिये नाश कियूं जेवं; तैस वक्ते अम्मा अपने बच्चन समेत तल्ले शारी जेवरी थी। तुश्शे बड़े बुरैइारे वजाई सेइं बेतेले सेइं भी इस तरीके सेइं बर्ताव कियो गालो। झ़ेझ़ भोंते इस्राएलेरो राज़ो पूरे तरीके सेइं जंगी मां नाश भोइ गालो।
Source notes (2)
- Cross-reference लूक. 23:30;प्रका. 9:6.
- Cross-reference यिर्म. 4:3.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.