Bhadrawahi Bible
होशे 9
इस्राएली केरे पापेरो न्याय
हे इस्राएल, तू मुल्खे-मुल्खेरे लोकां केरो ज़ेरो खुशी मां मसत न भो! किजोकि तू अपने परमेशरे शैरतां वेश्या बनी। तीं अन्नेरी हर एक्की खलाड़ी मां वेश्यापनेरी कमाई खुशी सेइं नेही। तैना न त खलाड़रे अन्ने सेइं रज़्ज़ेले, ते न कुण्डेरे दाछ़रे रस्से सेइं; ते नंव्वो दाछ़रो रस घटने सेइं तैना धोखो खाएले। इस्राएली लोक यहोवारे मुल्खे मां रेई न बटेले; पन एप्रैम मिस्रे मांजो वापस च़लो गालो, ते तैना अश्शूरे मां अशुद्ध चीज़ां खाले।
तैना यहोवारे लेई दाछ़रे रस्सेरी च़ढ़तल न देले, ते तैन केरां बलिदाना तैस पसंद एज्जेलां। तैन केरि रोट्टी मातम केरनेबालां केरि ज़ेरि रोट्टी भोल्ही; ज़ेत्रे तैस खाएले तैना सब अशुद्ध भोइ गाले; किजोकि तैन केरि खानेरी चीज़ां सिर्फ तैन केरि ढ्लुख मिटानेरे लेई भोल्ही; तैना यहोवारे भवने मां न एज्जी बटेली।
ठहरावरे तिहारां केरे मौके पुड़, ते यहोवा तिहारे दिहाड़े तुसां कुन केरेले? हेरा, तैना सत्यानाश भोनेरे डरेरे मारे च़ले गाले; पन तैड़ी मेरि गाले ते मिस्री तैन केरि लाशां अकोट्ठी केरेले। ते मोप1 नगरेरे रानेबाले तैन्न दबेले। तैन केरि मन पसंद चैंदरी चीज़ां शढ्ली मां पेली; ते तैन केरे डेरन मां कंटे उगेले।
सज़ारे दिहाड़े एवरेन; बदलो नेनेरे दिहाड़े एवरेन, इस्राएले ई पतो लग्गेलो। तैन केरे बड़े अधर्म ते बड़े दुश्मनेरे वजाई सेइं नबी त बेवकूफ, ते ज़ैस मैन्हु पुड़ आत्मा उतरते, तै पागलेरो ज़ेरो भोल्हो।2
एप्रैमेरो पहरदार मेरे परमेशरे सेइं साथी थियो; पन नबी सेभी बत्तन मां शिकैरेरू जाले, ते तै अपने परमेशरेरे घरे मां दुश्मन भोवरोए। तैना गिबा नगरेरे दिहाड़ां केरे ज़ेरे अचानक बिगड़ी जेवरेन; एल्हेरेलेइ परमेशर तैन केरे पाप याद केरतां तैन सज़ाह देलो।3
यहोवा ज़ोते, मीं इस्राएली लोक एन्च़रे लाहे, ज़ेन्च़रे कोन्ची जंगले मां दाछ़; ते तुश्शे दादे-पड़दादन पुड़ एरी नज़र की ज़ेन्च़रे फैगेरे पेइले फलन पुड़ नज़र की गातीए। पन तैनेईं बालपोर पहाड़े कां गेइतां अपने आपे शरमरी वजा भोनेरे लेई अर्पण किये, ते ज़ैस पुड़ फिदा भोइ जेवरे थिये, तैना तैसेरे ज़ेरे भिट्टे भोइ जे। एप्रैमेरी शान-ओ-शोकत उडरते च़ुड़ोलू केरि ज़ेरि खतम भोइ गाली; न त केन्चेरू ज़र्म भोल्हु, ते न केन्चेरे पेटे मां गर्भ ठहरेलू, ते न कोई कौन्श दोज़ींती भोल्ही! चाए तैना अपने बाल बच्चां केरू पालन पोशन केरतां बड्डे भी केरन, फिरी भी अवं तैन्न इड़ी तगर बेऔलाद केरेलो कि कोई भी न बच़ेलो। ज़ैखन अवं तैन करां दूर भोईं, तैखन तैन पुड़ अफ़सोस! ज़ेन्च़रे मीं सोर लाव, तेन्च़रे अवं एप्रैमे भी मन पसंद ठैरी बस्सोरो हेरेलो; फिरी भी तैस अपने बच्चां केरे मारने बालां केरे सामने जंगी मां गानू पेलू। हे यहोवा, तैन्न सज़ाह दे! तू कुन सज़ाह देलो? ऐह, कि तैन केरि कौन्शां केरू गर्भ बिछ़ड़ी गाए, ते तैन केरू दुद्ध शुक्की गाए।
तैन केरि सारी बुराई गिलगाल नगरे मांए; तैड़ी मीं तैन सेइं नफरत भोइ जेई। तैन केरे बुरे कम्मां केरि वजाई सेइं अवं तैन अपने घरेरां केढतां छ़डेलो। ते फिरी अवं तैन सेइं प्यार न रेखेलो, किजोकि तैन केरे सब हाकिम बगावत केरनेबालेन।
एप्रैम त तबाह भोइ जेवरोए, तैन केरां ज़ीलां भी शुकोरन, तैन मां फल न लग्गेलो। चाहे तैन केरि कौन्शां बच्चे भी ज़ान फिरी भी अवं तैन केरे ज़र्मोरे ट्लारे बच्चन मैरी छ़डेलो।
मेरो परमेशर तैन निकम्मो ठहरालो, किजोकि तैनेईं तैसेरी नईं शुनोरी। तैना गैर कौमन मां दरबदर फिरते राले।
Source notes (3)
- Footnote मोप इन नगर पुराने उत्तरी मिस्रेरी राजधानी थी।
- Cross-reference लूक. 21:22.
- Cross-reference न्या. 19:22-30.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.