Bhadrawahi Bible
इब्रानियों 7
मलिकिसिदक महायाजक
ई मलिकिसिदक शालेमेरो राज़ो ते परमप्रधान परमेशरेरो याजक थियो, ज़ैखन अब्राहम राज़न मैरतां वापस एवरो थियो, त मलिकिसिदके तैस सेइं मिलतां तैसेरी बड़ी आदर की ते तैस बरकत दित्ती। अब्राहमे तैस तैन सेब्भी चीज़ां केरो दशोवं हिस्सो दित्तो ज़ैना तैनी कब्ज़ो केरतां ऐनोरी थी। मलिकिसिदकेरो नंव्वेरो मतलब धार्मिकतारो राज़ोए, ते शालेमेरो मतलब शैन्तरो राज़ो। तैसेरो न कोई बाजी, न अम्मा, न तैसेरू कोई वंशे, न तैसेरे ज़रमनेरे बारे मां न तैसेरे मरनेरे बारे मां लिखेरूए। तै परमेशरेरे मट्ठेरो ज़ेरोए तै हमेशारे लेई याजक बनोरो रहते।
पन हुनी इस पुड़ ध्यान देथ मलिकिसिदक केत्रो महान थियो। ज़ैस पूर्वज अब्राहमे कब्ज़ो कियोरी चीज़ां केरो दशोवं हिस्सो दित्तो। मूसेरे कानूनेरे मुताबिक ज़ैना लेवेरे खानदाने मरां थिये यानी ज़ैना याजक ठहराए गातन, तैन हुक्म दित्तो जेवरोए कि तैना इस्राएली लोकन यानी अपने लोकन करां दशोवं हिस्सो नेन, हालांकी तैना भी अब्राहमेरी वंशे मरां आन। पन मलिकिसिदक ज़ै लेवी केरे वंशे मरां न थियो फिरी भी अब्राहमे करां दशोवं हिस्सो नियो, ते तैस बरकत दित्ती ज़ैस सेइं परमेशरे वाधो कियो थियो। अस पक्कू ज़ानतम कि ज़ै बरकत देते तै बरकत मैल्हने बाले करां महाने। ते याजक ज़ैना दशोवं हिस्सो नेतन तैना तैन मैन्हु आन ज़ैना मरतन, पन मलिकिसिदक एन करां भी महाने, किजोकि पवित्रशास्त्र ज़ोते कि तै ज़ींतोए। बल्के अस ज़ोई सकतम कि लेवी भी ज़ै दशोवं हिस्सो नेते, अब्राहमेरे ज़िरिये मलिकिसिदक जो दशोवं हिस्सो दित्तो। एल्हेरेलेइ कि ज़ैस मौके मलिकिसिदक लेवेरे पूर्वज अब्राहमे सेइं मुलाकात की, तैस मौके लेवी ज़र्मोरो भी न थियो।
मलिकिसिदकेरे बदले होरो महायाजक
इना लेवी याजकेरे आधारे पुड़ कानून इस्राएली लोकन दित्तोरो थियो, अगर लेवी ते याजकेरू कम ठीक थियूं, त अलग किसमेरे याजकेरू बांदू भोनू ज़रूरी न थियूं, ज़ै मलिकिसिदकेरो ज़ेरोए। पन हारूनेरो ज़ेरो नईं। किजोकि ज़ैखन याजकेरी पदवी बेदलोतीए त कानूनेरू बेदलोनू भी ज़रूरीए। असां इना सैरी गल्लां मसीहेरे बारे मां ज़ोने लगोरेम ज़ै होरि गोट्ले मरांए, ते तैस गोत्रे मरां केन्चे बलिदान केरनेरे ठैरी याजकेरी सेवा नईं कियोरी। किजोकि इन अस ज़ानतम, कि इश्शो प्रभु यहूदारे गोत्रे मरां थियो। ते मूसा एस गोत्रे मरां याजकेरे पेदवरे बारे मां कोई गल नईं कियोरी। मलिकिसिदकेरो ज़ेरो अक होरो भी याजक एजने सेइं इन होरू भी साफ भोते। किजोकि यीशु कानूनेरे हुक्मेरे मुताबिक याजक लोड़तो थियो, पन तै नाश न भोने बैली ज़िन्दगरे शेक्तरे ज़िरिये महायाजक बनो। किजोकि तैसेरे बारे मां परमेशर पवित्रशास्त्रे मां ई गवाही देते,
“कि तू मलिकिसिदकेरो ज़ेरो
हमेशारे लेई याजक आस।”
एन्च़रे मूसेरो कानून कमज़ोर ते बेफल भोनेरे वजाई सेइं हुनी कम न केरि बटे। (किजोकि मूसेरे कानूने कोई गल्ली सिद्ध न केरि बटी) पन हुनी असन कां अक रोड़ी उमीदे ज़ेसेरे ज़िरिये सेइं असां परमेशरेरे सामने एज्जी बटतम। ते परमेशरे भी तैस वक्ते कसम खाइ ज़ैखन तैनी यीशु महायाजक बनाव। किजोकि होरे याजक त बगैर कसमा याजक बनाए, पन ज़ैखन यीशु, परमेशरेरी तरफां याजक बनाव त तैनी ज़ोवं,
“अवं, प्रभु कसम खाताईं, कि तू हमेशा याजक रालो
ते अवं अपने मने कधी न बदलेलो।”
एल्हेरेलेइ यीशु ज़मानत देते कि पुरानो करार नव्वें करारे करां रोड़ो भोल्हो। ते अक फर्के, किजोकि पेइले बड़े याजक बेनतां आहे, पन तैना सब मरे ते तैनेईं लगातार याजकेरू कम न केरि बटु। पन यीशु आखरी तगर रानेबालो याजके ते एल्हेरेलेइ तैसेरी ठैरी होरो कोई याजक न रख्खो गाए। एल्हेरेलेइ ज़ैना लोक यीशुएरे ज़िरिये सेइं परमेशरे कां एइतन, यीशु तैन पूरी-पूरी मुक्ति देइ बटते, किजोकि तै तैन केरे लेई बिनती केरनेरे लेई हमेशा ज़ींतोए।
एल्हेरेलेइ असन एरे ज़ेरे महायाजकेरी ज़रूरी थी, ज़ै इश्शे ज़रूरतन पूरी केरे, ज़ै पवित्र, निष्कपट ते शुद्ध, ते पैपन करां अलग भोए ते ज़ै परमेशरे सुर्गे जो नेवरो भोए। ते होरि महायाजक केरू ज़ेरू यीशु ज़रूरी नईं, कि पेइले अपने पापां केरे लेई ते फिरी अपने लोकां केरे पापां केरे लेई रोज़ बलिदानां च़ाढ़े, किजोकि यीशुए सेब्भी लोकां केरे पापां केरे लेई एक्की बार अपनो आप बलिदान केरतां एरू बलिदान च़ाढ़ू ज़ैन हमेशारे लेईए। किजोकि मूसेरो कानून त तैन मैन्हन महायाजक भोनेरे लेई ठहराते ज़ैना सिद्ध नईं, पन मूसेरे कानूनेरे बाद परमेशरे कसम खेइतां अपनु मट्ठू ठहराव ते तैसेरू मट्ठू हमेशारे लेई सिद्ध महायाजक बनोरूए।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.