Bhadrawahi Bible
इब्रानियों 6
भटकनेरो नितीजो
एल्हेरेलेइ एज्जा अस मसीहेरे बारे मां शुरुआतरी शिक्षारी गल्‍लां बार-बार दोरहानेरे बगैर अस सिद्धतारे पासे च़लते रहम। ते मौतरे पासे नेनेबाले कम्मन करां मन फिराम ते परमेशरे पुड़ विश्वास केरनो, बपतिस्मे ते हथ रखनेरी शिक्षारे बारे मां, ते मुड़दां केरे ज़ींते भोनेरे बारे, ते हमेशारे न्यायेरे बारे मां दुबारां गल न केरम। एज्जा अस मज़बूत विश्वासी बनम! अगर परमेशर अज़ाज़त दे त असां इन केरमेले। ज़ैना लोक अपने विश्वास शारतन तैन फिरी मन फिरानेरे पासे केन्च़रे आने गान? तैनेईं एक्‍की बारे परमेशरेरी सच़्च़ाई पिशानोरी थी, ते तैन सुर्गेरां वरदानां मैल्होरां थियां ते तैनेईं होरन सेइं साथी पवित्र आत्मा हासिल कियोरो थियो। तैनेईं मैसूस कियोरू थियूं कि परमेशरेरू वचन रोड़ू आहे, ते तैनेईं एजने बाले ज़मानेरी शक्ति मैसूस कियोरी थी। ते हुनी तैनेईं अपनो विश्वास शारोरो! एल्हेरेलेइ तैन मन फिरानेरे पासे आनू मुश्किले, किजोकि तैना एप्पू परमेशरेरे मट्ठे फिरी क्रूसे पुड़ च़ाढ़ने लगोरेन! ते लोकां केरे सामने तैसेरी बेइज़ती केरने लगोरेन। ज़ैन लोकन रोड़ी शिक्षा मैल्होरीए तैना तैस ज़मीनेरे ज़ेरे आन ज़ैस पुड़ झ़ैड़ी लगती रहतीए। अगर ज़मीन रोड़ीए त ज़िमदारेरे लेई रोड़ी फसल देचे, ते तैस परमेशरेरी तरफां बरकत मैलचे। होरे लोक तैस ज़मीनरे ज़ेरे आन ज़ैस मां कंटे ते झ़ैल्‍लां लगतन ते तै कोन्ची कम्मेरी नईं। ते परमेशर तैस ज़मीनी फिटकार देनेबालोए ते आखरी मां तैस अग्गी मां बरबाद केरेलो।
हे मेरे ट्लारे ढ्लाव ते बेइनव, हालांकी असां एरी गल्‍लां ज़ोतम फिर भी अस विश्वास केरतम कि एन तुश्शे लेई नईं। इश्शो भरोसोए कि तुस रोड़ी गल्‍लां केरे लेई आथ ज़ैना मुक्तरे ज़िरिये एइतिन। किजोकि परमेशर अन्यायी नईं कि ज़ै तुश्शू कम ते प्यार बिसरी गाए, ज़ै तुसेईं तैसेरे लोकां केरि सेवा केरनेरे ज़िरिये तैसेरेलेइ हिरावरोए। ते परमेशर याद केरेलो कि तुस हेजू भी तैन केरि मद्दत केरने लगोरेथ। इश्शी इच्छा ई आहे कि तुस ज़ांतगर ज़ींतेथ रोड़ो बर्ताव केरते राथ, इन पक्‍कू केरनेरे लेई कि तुश्शी उमीद सच़ भोल्ही। तैखन तुस आलसी न बनेले। पन तुस तैन केरे ज़ेरे च़लेले ज़ैना अपने विश्वास ते सबरारे वजाई सेइं परमेशरेरे वाधां केरे बारस भोल्हे।
परमेशरेरो अटल वाधो
ज़ैखन परमेशरे अब्राहमे सेइं वाधो कियोरो थियो त कसम केरनेरे लेई तैस करां बड्डो कोई न थियो, एल्हेरेलेइ तैनी अपनि कसम कमाइतां ज़ोवं, “अवं तीं सच़्च़े बरकत देइलो, ते तेरू वंश बेशुमार बधेइलो।” एल्हेरेलेइ अब्राहम तैन वाधन हासिल केरनेरे लेई सबरी सेइं इंतज़ार केरतो राव। मैन्हु त एप्पू करां बडां केरे नव्वेंरी कसम केरतन ते एन्च़रे तैन हर मसलेरो हल कसम केरतां खतम भोते। एल्हेरेलेइ परमेशरे भी कसम खाइ, एन केरने सेइं तैनी तैन लोकन ज़ैन सेइं वाधो कियोरो थियो, इन हिरानू चाऊ कि ज़ै वाधो तैनी कियोरोए तै पूरो केरेलो। त इड़ी दूई गल्‍लां आन तैसेरो वाधो ते तैसेरी कसम, ज़ैना कधे न बेदलोन ते तैन केरे बारे मां परमेशर कधे झूठ न ज़ोए। एल्हेरेलेइ अस ज़ैना तैसेरे सहारे मां एवरेम त ज़ै उमीद असन दित्तोरीए, तैस मां अस बनोरे रहम, ते अस बड़े जादे जोशे मां आम। इश्शी उमीद प्राणा केरे लेई पक्‍की आहे तै टेली न बटे ते ई असन परमेशरे करां भटकने न दे, बल्के ई असन परमेशरेरे मन्दरे मां महा पवित्र ठैरी मां पुज़ातीए। ज़ैड़ी यीशु इश्शे लेई मलिकिसिदक महायाजकेरो ज़ेरो हमेशारो महायाजक बेनतां इश्शे लेई बत हिराने बालेरो ज़ेरो दाखल भोव।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.