Bhadrawahi Bible
इब्रानियों 8
यीशु इश्शो महायाजके
ज़ैना गल्लां हुन्ना अस ज़ोने लगोरेम तैन मरां सेभना बड्डी गल ईए कि इश्शो एरो महायाजके, ज़ै सुर्गे मां परमेशरेरे महिमा बाले तखतेरे देइने पासे बिशोरोए। ते ज़ै तैस महा पवित्र ठैरी ते तैस सच़्च़े तेम्बु मां सेवा केरते, ज़ै केन्चे मैन्हे नईं बल्के परमेशरे खड़ो कियोरोए। किजोकि हर महायाजक पापां केरे मैफरे लेई च़ढ़तल ते बलिदान च़ाढ़नेरे लेई ठहराव गाते, एल्हेरेलेइ ज़रूरी आहे, कि इश्शे महायाजके (यीशु) कां भी किछ च़ाढ़नेरे लेई भोए। ते अगर यीशु दुनियाई मां भोथो त कधे कोई याजक न थियो भोनो, किजोकि इड़ी मूसेरे कानूनेरे मुताबिक च़ढ़तल च़ाढ़नेरे लेई याजक आन। इना याजक ज़ैना कम केरतन, तैना सिर्फ सुर्गेरे चीज़ां केरि नकल ते सैयोए, पन ज़ैना चीज़ां सुर्गे मां आन। एल्हेरेलेइ ज़ैखन मूसो तेम्बु बनानेरी तियारी केरने लगोरो थियो, त परमेशरे तैस हदैइत दित्ती, “हेर ज़ै नमूनो मीं तीं पहाड़े पुड़ हिरावरो थियो तैसेरे हिसाबे सेइं तू सैरी चीज़ां बना।” पन हुनी ज़ै महायाजकेरी सेवा यीशुए दित्तोरी तै पुराने याजकेरे सेवाई करां बड़ी बड्डीए, किजोकि तै ज़ैना गल्लां केरि बिचवाई केरते तैना पुराने करारे करां भी उच्ची आन, ते वाधन पुड़ तैसेरी बुनीयादे। किजोकि अगर पेइले करारे मां कोई खांमी न भोथी त होरो करार केरनेरी कोई ज़रूरत न थी भोनी। पन परमेशर लोकन पुड़ दोष लेइतां ज़ोते,
“तक्का प्रभु ज़ोते कि तै दिहाड़ी एज्जी राहोरीए,
इस्राएलेरे लोक ते यहूदारे लोकन सेइं साथी नंव्वो करार केरेलो।
ऐह तैस करारेरो ज़ेरो न भोल्हो ज़ै मीं तैन केरे दादे पड़दादन सेइं तैस दिहाड़े कियोरो थियो।
ज़ैखन मीं मिस्रे मरां तैन कढनेरे लेई तैन केरो हथ ठमोरो थियो,
किजोकि प्रभु ज़ोते, कि तैना मेरे तैस करारेरे मुताबिक वफादार न राए,
एल्हेरेलेइ मीं भी तैन केरे पासे कोई ध्यान न दित्तू।
प्रभु ज़ोते, कि ज़ै करार अवं इस्राएलेरे लोकन सेइं तैस मौके केरेलो तै ईए,
कि अवं अपने कानून तैन केरे मन्न मां छ़डेलो,
ते तैन केरे दिलन मां लिखेलो,
ते अवं तैन केरो परमेशर भोल्हो ते तैना मेरे लोक भोल्हे।
ते केन्ची ऐह ज़रूरत न भोल्ही कि अपने पुड़ोसन,
या अपने रिश्तेदारन ऐह शिक्षा दे कि प्रभु पिशाना,
किजोकि निकड़े करां बड्डे तगर सब मीं पिशानेले।
एल्हेरेलेइ अवं तैन केरे अधर्म माफ़ केरेलो,
ते तैन केरे पापन फिरी कधे याद न केरेलो।”
ज़ैखन परमेशरे नंव्वो करारे कमाव त पेइलो करारे पुरानो बनाव, ते ज़ै चीज़ पुरानी ते कमज़ोर भोतीए तै जल्दी खतम भोतीए।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.