Bhadrawahi Bible
व्यवस्थाविवरण 16
फ़सह ते अखमीरी रोट्टरू तिहार
“अबीब1 महीने याद केरतां अपने परमेशर यहोवारे लेई फ़सहेरू तिहार मनानू; किजोकि अबीब महीने मां तेरे परमेशर यहोवाए तू राती मिस्रे मरां केढतां आनोरोस। एल्हेरेलेइ ज़ै ठार यहोवा अपने नंव्वेरू निवास भोनेरे लेई च़ुनेलो, तैड़ी अपने परमेशर यहोवारे लेई गब्बां ते बेछ़ी दांत फ़सह केरतां बलि केरथ। तैस साथी कोई खमीरी चीज़ न खेइयां; सत दिहाड़न तगर अखमीरी रोट्टी ज़ै दुखेरी रोट्टी आहे खानी; किजोकि तू मिस्र मुल्खे मरां जल्दी केरतां निस्सोरो थियो; एन्च़रे सेइं तीं मिस्र मुल्खे मरां निस्सनेरे दिहाड़े ज़िन्दगी भर याद राले। सत दिहाड़न तगर तेरे सारे मुल्खे मां तीं कां कोन्ची खमीर हेरने मां भी न लोड़े लेइहोरू; ते ज़ै जानबर तू पेइले दिहाड़ेरी ड्लवझ़ी बलि केरस तैसेरे मासे मरां किछ झ़ेझ़ां तगर न राए। फ़सह अपने कोन्ची नगरे मां, ज़ैस तेरो परमेशर यहोवा तीं दे बलि न केरां। ज़ै ठार तेरो परमेशर यहोवा अपने नंव्वेरू निवास केरनेरे लेई च़ुने सिर्फ तैड़ी, सालेरे तैस्से वक्ते ज़ैस मां तू मिस्रे मरां निस्सोरो थियो, मतलब दिहाड़ो डुबने पुड़ ड्लवझ़ी, फ़सह तिहारेरो जानबर बलि केरनो। तैखन तैसेरू मास तैस्से ठारी ज़ैस तेरो परमेशर यहोवा च़ुने ट्लैड़तां खानू; फिरी झ़ेझ़ां उठतां अपने-अपने डेरे जो वापस गानू। शा दिहाड़न तगर बगैर खमीरे रोट्टी खेइयथ; ते सत्तोवं दिहाड़े तेरे परमेशर यहोवारे लेई महासभा भोल्ही; तैस दिहाड़े कोई कम-काज़ नईं केरनू।
कटाई केरनेरू तिहार
“फिरी ज़ैखन तू उडारे मां ड्लाते सेइं फसल कटनी शुरू केरस, तैखन करां शुरू केरतां सत हफते गन्ने। तैखन अपने परमेशर यहोवारे बरकतरे मुताबिक तैसेरेलेइ अपने मेर्ज़री बलि देइतां हफतां केरू तिहार मनानू; ते तैस ठारी मां ज़ै तेरो परमेशर यहोवा अपने नंव्वेरू निवास केरने लेई च़ुने अपना-अपना मट्ठां कुइयां, नौकर-नौकरैनी सने तू ते तेरे नगरन मां ज़ैना लेवी भोन, ते ज़ैना-ज़ैना परदेशी, ते अनाथ, ते विधवां तेरे दरमियाने मां भोन, तैना सब अपने परमेशर यहोवारे सामने आनन्द केरन। ते याद रखनू कि तू भी मिस्र मुल्खे मां गुलाम थियो; एल्हेरेलेइ इना विधि मन्ने मां एतिहात केरनो।
झोफड़ी केरू तिहार
“तू ज़ैखन अपनि खलाड़ ते दाछ़रे रसेरे कुण्डे मरां सब किछ अकोट्ठो केरस, तैखन झोफड़ी केरू तिहार सत दिहाड़न तगर मनातो रेइयां; ते अपने इस तिहारे मां अपना-अपना मट्ठां कुइयां, नौकर-नौकरैनी सने तू ते ज़ैना लेवी, ते परदेशी, ते अनाथ, ते विधवां तेरे नगरन मां भोन तैना भी आनन्द केरन। ज़ै ठार यहोवा च़ुने तैस मां तू अपने परमेशर यहोवारे लेई सत दिहाड़न तगर तिहार मनातो रेइयां; किजोकि तेरो परमेशर यहोवा तेरे सारे फसली मां ते तेरे सब कम्मन मां तीं बरकत देलो; तू आनन्दे केरां। साले मां ट्लाई बार, मतलब अखमीरी रोट्टरू तिहार ते हफतां केरू तिहार, ते झोफड़ी केरू तिहार, इन ट्लाईए तिहारन मां तुश्शे सब मड़द अपने परमेशर यहोवारे सामने तैस ठारी मां ज़ैस तै च़ुने गान। ते हेरा खाली हथ यहोवारे सामने कोई न गाए; सब मड़द ज़ैन किछ तैन कां भोए, ते तैस बरकतरे मुताबिक देन ज़ै तेरे परमेशर यहोवा तीं दित्तोरी भोए।
लोकां केरे लेई न्याय केरनेबाले ठहराने
“तू अपने हर एक्की गोट्ले मरां, अपने सब नगरन मां ज़ैन तेरो परमेशर यहोवा तीं देते न्याय केरनेबाले ते सरदार ठहरेइयां, ज़ैना लोकां केरो न्याय धार्मिकता सेइं केरन। तुस अन्याय न केरथ; तू न त तरफदारी केरां; ते न रिश्पत नेइयां, किजोकि रिश्पत अक्लमन्दा केरि एछ़्छ़ी एंधी केरतीए, ते धर्मी लोकां केरि गल्लां बदलतीए। ज़ैन किछ आहे बिलकुल ठीके तैसेरो पीछो केरनो, ज़ैस सेइं तू ज़ींतो रास, ते ज़ै मुल्ख तेरो परमेशर यहोवा तीं देते तैसेरो अधिकारी बनोरो रास।
पूज़ा नईं केरनी
“तू अपने परमेशर यहोवारी ज़ै वेदी बनालो तैस कां कोन्ची किसमेरी लेकड़रो बनेवरो खम्भो न बनेइयां ज़ेन्च़रे अशेरा देबरे लेई बनातन। ते न कोई खम्भो खड़ो केरां, किजोकि तैस सेइं तेरो परमेशर यहोवा नफरत केरते।
Source notes (1)
- Footnote अबीब अबीब इब्रानी कैलेंडरेरो पेइलो महीनो थियो ज़ै मारच या अप्रैले मां भोते बादे मां इस जो “नीसान” ज़ोतन
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.