Bhadrawahi Bible
व्यवस्थाविवरण 15
सत्तोवं साल: छुटकारेरो साल
“हर सत सालां केरे आखरी मां तुस छुटकारो देइयथ, मतलब ज़ैस कोन्ची कर्ज़ो देनेबाले अपने पड़ोसी किछ ओधार दित्तोरू भोए, त तै तैस शारे; ते अपने पड़ोसी या ढ्लाए करां तैस मजबूर केरतां न भराए, किजोकि यहोवारे नंव्वें सेइं इस छुटकारेरो प्रचार भोवरोए। परदेशी मैन्हु सेइं तू तैस मजबूर केरतां भरेई सकतस, पन ज़ैन किछ तेरे ढ्लाए कां तेरू भोए तैस तू बगैर भराए शैरां। तेरे दरमियाने मां कोई गरीब न रालो, किजोकि ज़ैस मुल्खे मां तेरो परमेशर यहोवा तेरो हिस्सो केरतां तीं देते, कि तू तैसेरो अधिकारी भोस, तैस मां तै तीं बड़ी बरकत देलो। एत्रू ज़रूरे कि तू अपने परमेशर यहोवारी गल मन लेइतां शुनस, ते इन सारे हुक्मन मन्ने मां ज़ैना अवं अज़ तीं शुनाताईं एतिहात केरस। तैखन तेरो परमेशर यहोवा अपने वचनेरे मुताबिक तीं बरकत देलो, ते तू बेड़ि कौमन ओधार देलो, पन तीं ओधार नेनू न पेलू; ते तू बड़े कौमन पुड़ राज़ केरेलो, पन तैना तीं पुड़ राज़ न केरि सकेले।
गरीबेरे लेई खुल्ले दिले सेइं देनू
“ज़ै मुल्ख तेरो परमेशर यहोवा तीं देते तैसेरे कोन्ची नगरे मां अगर तेरे ढ्लान मरां कोई तीं कां गरीब भोए, त अपने तैस गरीब ढ्लाएरे लेई न त अपने दिले सखत केरां, ते न अपनि मुठड़ी बन्द केरां; ज़ैस चीज़री घटी तैस भोए, तैसेरी ज़ेत्री ज़रूरत भोए तेत्रू ज़रूर अपनो हथ ढिल्लो केरतां तैस ओधार देइयां। खबरदार रह कि तेरे मने मां एरी अधर्मी फिक्र न भोए, कि सत्तोवं साल ज़ै छुटकारेरो साले तै नेड़े आहे, ते एपनी नज़री तू अपने तैस गरीब ढ्लाएरे पासे बेरहमी केरतां तैस किछ न देस, ते तै तेरे खलाफ यहोवा परमेशरे कां फरियाद केरे, त ई तेरे लेई पाप ठहरेलो। तू तैस ज़रूर देइयां ते तैस देते बार तेरे मने बुरू न लग्गे; किजोकि इस्से गल्लरे वजाई सेइं तेरो परमेशर यहोवा तेरे सब कम्मन मां ज़ैन मां तू अपनो हथ लाएलो तीं बरकत देलो। तेरे मुल्खे मां गरीब त हमेशा मैल्हेले, एल्हेरेलेइ अवं तीं ई हुक्म देताईं कि तू अपने मुल्खे मां अपने गरीब ढ्लाए अपनो हथ ढिल्लो केरतां ज़रूर दान देइयां।
गुलामन आज़ाद केरनेरो नियम
“अगर तेरे लोकन मरां कोई अपने मैन्हन मरां, मतलब कोई इब्रि मड़द या कौन्श तेरे हथ्थे बिके, ते तै शा साल तेरी सेवा केरे त सत्तोवं साले तैस एप्पु करां आज़ाद केरतां गाने देइयां। ते ज़ैखन तू तैस आज़ाद केरतां एप्पु करां गाने देस तैखन तैस खाली हथ्थे गाने न देइयां; बल्के अपनि भैड्डां-छ़ेल्ली, ते खलाड़, ते दाछ़रे रसेरे कुण्डन मरां खुल्ले दिले सेइं देनू; तेरे परमेशर यहोवा तीं ज़ेरि बरकत दित्तोरी भोए तैसेरे मुताबिक तैस देइयां। ते ऐह गल्ली याद रखनी कि तू भी मिस्र मुल्खे मां गुलाम थियो, ते तेरे परमेशर यहोवा तू छुटेवरोस; एल्हेरेलेइ अवं अज़ तीं ई हुक्म शुनाताईं। ते अगर तै तीं सेइं ते तेरे टब्बरे सेइं प्यार केरते, ते तीं सेइं साथी आनन्दे सेइं रहते, ते इस वजाई सेइं तीं सेइं ज़ोने लगे, ‘अवं तीं करां न गेइलो,’ त सुतारी नेइतां तैसेरो कन दारे पुड़ लेइतां कोश्शां, तैखन तै हमेशा तेरो नौकर बनोरो रालो। ते अपनि नौकरैनी सेइं भी एरू केरां। ज़ैखन तू तैस एप्पु करां आज़ाद केरतां गाने देस, तैखन तैस शैरां तीं मुश्किल न लग्गे; किजोकि तैनी शा साल दूई मज़दूरां केरे बराबर तेरी सेवा कियोरीए। ते तेरो परमेशर यहोवा तेरे सारे कम्मन मां तीं बरकत देलो।
ज़ेठे जानबरां केरू अर्पण
“तेरी बेछ़ी ते भैड्डां-छ़ेल्ली केरे ज़ेत्रे ज़ेठे नर भोन तैन सेब्भन अपने परमेशर यहोवारे लेई पवित्र रेखथ; अपनि बेछ़ी केरे ज़ेठे बच्चन मरां कोई कम्मे न लेइयथ, ते न अपनि भैड्डां-छ़ेल्ली केरे ज़ेठां केरि उन्ना बरधेइयथ। तैस ठारी पुड़ ज़ै तेरो परमेशर यहोवा च़ुने तू यहोवारे सामने अपने-अपने टब्बरे समेत हर साल तैसेरू मास खेइयां। पन अगर तैस मां कोन्ची किसमेरो नुक्स भोए, मतलब तैन टोन्टू या कानू भोए, या तैस मां कोन्ची होरि किसमेरी बुरैइयरो नुक्स भोए, त तैस अपने परमेशर यहोवारे लेई बलि न केरां। तैस अपने नगरन मां रेखां; शुद्ध ते अशुद्ध दूईये किसमां केरे मैन्हु ज़ेन्च़रे चिकारे ते हिरनेरू मास खातन तेरहु तैसेरू भी खेइ सकेले। पन तैसेरो खून नईं खानो; तै पैनेरो ज़ेरो ज़मीनी पुड़ उलटानो।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.