Bhadrawahi Bible
व्यवस्थाविवरण 14
नाजाइज़ मातम
“तुस अपने परमेशर यहोवारे बच्चे आथ; एल्हेरेलेइ मुओरे लोकां केरे वजाई सेइं न त अपनि जान च़ीरथ, ते न ढ्लवां केरे बाल कटेइयथ। किजोकि तू अपने परमेशर यहोवारे लेई अक पवित्र प्रजास, ते यहोवा तू धेरतरे सारे मुल्खां केरे लोकन मरां अपनि खास जाईदात भोनेरे लेई च़ुनोरोस।
शुद्ध ते अशुद्ध जानबर
“तू कोई भिट्टी चीज़ न खेइयां। ज़ैना जानबर तुस खेइ सकतथ तैना इना आन, मतलब गब्बां, बेछ़ी दांत, हिरन, चिकारा, मृग, परिज़, साबर, नीलगाय, ते पहाड़ी भैड। ते जानबरन मरां ज़ेत्रे जानबर च़ीरोरे या देलोरे रौन्ने बाले ते ओगा केरनेबाले भोतन तैन केरू मास तुस खेइ सकतथ। पन ओगा केरनेबाले या देलोरे रौन्ने बालन मरां इन जानबरन, ज़ेन्च़रे कि ऊँट, खरगोश, ते शापान नईं खानो, किजोकि इना ओगा त केरतन पन एन केरे देलोरे रौन्ने न भोन, इस वजाई सेइं तैना तुश्शे लेई अशुद्ध आन। फिरी सूर, ज़ेसेरे देलोरे रौन्ना त भोतन पन ओगा न केरे, इस वजाई तै तुश्शे लेई अशुद्धे। तुस न त इन केरू मास खेइयथ, ते न इन केरि लाशी सेइं हुरथ।
“फिरी ज़ेत्रे पैनेरे जीपन, तैन मरां तुस इन्न खेइ सकतथ, मतलब ज़ेत्रां केरां फंघां ते शेकड़ां भोतन। पन ज़ेत्रे बगैर फंघां ते शेकड़ां केरे भोतन तैन्न तुस न खेइयथ; किजोकि तैना तुश्शे लेई अशुद्ध आन।
“सब शुद्ध च़ुड़ोलू केरू मास त तुस खेइ सकतथ। पन इन केरू मास न खेइयथ, मतलब उकाब, हड़फोड़, कुरर; गरूड़, इल्ल ते किसमे किसमेरां केरि शाही; ते किसमे किसमेरां सब कंव्वां; शुतुर्मुर्ग, तहमास, जलकुक्कट, ते किसमे किसमेरे बाज़; निकड़ो ते बड्डो दूईये किसमां केरो बुल्लू, ते डुग्घू; धनेश, गिद्ध, हाड़गील; सारस, किसमे किसमेरे बगुले, हुदहुद ते रैइतोकन। ते ज़ेत्रे पेटेरे भारे च़लनेबाले जीपन तैना सब तुश्शे लेई अशुद्ध आन; तैना खाए न गान। पन सब शुद्ध फंघन बालां केरू मास तुस खेइ सकतथ।
“ज़ैन अपने आपे मेरि गाए तैस तुस न खेइयथ; तैस अपने नगरन मां रानेबाले कोन्ची परदेशी खानेरे लेई देइ सकतथ, या कोन्ची बखले जो बेच़ी सकतथ; पन तू त अपने परमेशर यहोवारे लेई पवित्र प्रजास। छ़ेल्लरो बच्चो तैसेरी अम्मरे दुद्धे मां नईं बनानो।
दशोवं हिस्सेरो नियम
“बीज़ेरे सैरी फसली मरां ज़ै हर साल उडारे मां उगे तैसेरो दशोवं हिस्सो ज़रूर अलग केरतां रेखथ। ते ज़ैस ठारी जो तेरो परमेशर यहोवा अपने नंव्वेरू निवास ठहरानेरे लेई च़ुने तैस मां अपनु अन्न, ते नंव्वो दाछ़रो रस, ते तेलेरो दशोवं हिस्सो, ते अपने बेछ़ी दांत ते भैड्डां-छ़ेल्ली केरे ज़ेठे बच्चे अपने परमेशर यहोवारे सामने खेइयां; ज़ैस सेइं तुस तैसेरो डर हमेशा मन्नो शिखेले। पन अगर तै ठार ज़ैस जो तेरो परमेशर यहोवा अपनु नवं बनोरू रखनेरे लेई च़ुनेलो बड़े दूर भोए, ते इस वजाई सेइं तैट्ठेरू सफर तेरे लेई एत्रू लम्मू भोए कि तू अपने परमेशर यहोवा बरकती सेइं मैल्होरी चीज़न तैड़ी न नेइ सकस, त तैस बेच़तां, रुपेइये बेन्धतां, हथ्थे मां नेइतां तैस ठैरी पुड़ गा ज़ै तेरो परमेशर यहोवा च़ुनेलो, ते तैड़ी गोरू, या गब्बां, या दाछ़रो रस, या शराब, या कोन्ची किसमेरी चीज़ की न भोए, ज़ैस तेरो दिल चाहे, तैस तैस्से रुपेइये सेइं घिन्तां अपने टब्बरे समेत अपने परमेशर यहोवारे सामने खेइतां आनन्द केरां। ते अपने नगरे मां रानेबाले लेवी न शैरथ, किजोकि तीं साथी तैसेरो कोई हिस्सो या अंश न भोल्हो।
“हर ट्लाई सालां केरे आखरी मां ट्लेइयोवं सालेरी फसलरो सारो दशोवं हिस्सो केढतां अपने नगरां केरे अन्नेरे गुदामन मां अकोट्ठू केरतां रेखथ; तैखन लेवी ज़ेसेरो तीं साथी कोई अपनो हिस्सो या अंश न भोल्हो तै, ते ज़ै परदेशी, ते अनाथ, ते विधवां तेरे नगरे मां भोन, तैना भी एइतां पेट भेरतां खान; ज़ैस सेइं तेरो परमेशर यहोवा तेरे सब कम्मन मां तीं बरकत देलो।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.