Bhadrawahi Bible
व्यवस्थाविवरण 17
“तू अपने परमेशर यहोवारे लेई कोई नुक्से बालो दांत या भैड्डां-छ़ेल्ली केरि बलि न केरां या ज़ैस मां कोन्ची किसमेरी कमी भोए; किजोकि एरू केरनू तेरे परमेशर यहोवा कां भिट्टू आहे।
मूरती केरि पूज़ारे लेई न्यायेरो तरीको
“ज़ैना बेसती तेरो परमेशर यहोवा तीं देते, अगर तैन मरां कोन्ची मां कोई मड़द या कौन्शां एरी मैल्हन, ज़ैनेईं तेरे परमेशर यहोवारो करार ट्लोड़तां एरू कम कियोरू भोए, ज़ैन तैसेरी नज़री मां बुरू आहे, मतलब मेरो हुक्म ट्लोड़तां बखले देबतां केरि, या दिहाड़ो, या चाँदनी, या अम्बरेरे तारन मरां कोन्चेरी सेवा कियोरी भोए, या तैन कां झुकोरो भोए, ते ई गल तींजो ज़ोइ गाली ते तेरे शुन्ने मां एज्जे; तैखन रोड़ेच़ारे पुछ़ गण केरां, ते अगर ई गल सच़ भोए कि इस्राएले मां एरू भिट्टू कम कियूं जेवरूए, त ज़ैनी मड़दे या कौन्शां एरू बुरू कम कियोरू भोए, तैस मड़दे या कौन्शी बेइर अपने नगरे फाटकन पुड़ नेइतां एन्च़रे घोड़ेईं देनी कि तै मेरि गाए। ज़ै मौतरी सज़ाहरे काबल ठहरे तै एक्की गवैही सेइं न मारो गाए, पन दूई या ट्लाई मैन्हु केरे गवैही सेइं मारो गाए। तैसेरे मारनेरे लेई सेब्भन करां पेइले गवाही देनेबालां केरो हथ, ते तैन केरां बाद होरि सब लोकां केरो हथ खड़ो भोए। एन्च़रे सेइं एरी बुराई अपने दरमियाने मरां दूर केरथ।
“अगर तेरी बेस्तन मां कोई लड़ाई केरि गल भोए, मतलब एप्पु मांमेइं कत्ल, या बेंस, या मार देनेरो कोई मुकदमो भोए, ते तैसेरो न्याय केरनेरे लेई मुश्किल लग्गे, त तैस ठारी गेइतां ज़ै तेरो परमेशर यहोवा च़ुने; लेवी याजकन कां ते तैस वक्तेरे न्याय केरनेबालन कां गेइतां पुछ़-गन केरां, कि तैना तुसन न्याय केरनेरी गल्लां ज़ोन। ते न्यायेरी ज़ेरि गल तैस ठारारे लोक ज़ैस यहोवाए च़ुने तै तीं सेइं ज़ोए, तैसेरे मुताबिक केरनू; ते ज़ै कानून तै तीं दे तैसेरे मुताबिक च़लने मां एतिहात केरां; कानूनेरी ज़ै गल तैना तीं ज़ोन, ते न्यायेरी ज़ै गल तैना तीं सेइं ज़ोन, तैसेरे मुताबिक केरनू; ज़ै गल तैना तीं ज़ोन तैस करां देइने या बांए नईं मुड़नू। ते ज़ै मैन्हु घमण्ड केरतां तैस याजकेरी न मन्ने, ज़ै तैड़ी तेरे यहोवा परमेशरेरी सेवा केरने लेई हज़ार रालो, या तैस न्याय केरनेबालेरी न शुने, त तै मैन्हु मारो गालो; एन्च़रां तू इस्राएली लोकन मरां एरी बुराई दूर केरां। इस सेइं सब लोक शुन्तां डेरि गाले, ते फिरी घमण्ड न केरेले।
राज़ां केरे बारे मां हुक्म
“ज़ैखन तू तैस मुल्खे मां पुज़स ज़ै तेरो परमेशर यहोवा तीं देते, ते तैसेरो अधिकारी भोस, ते तैस मां बस्सने लग्गस, कि च़ेवरे पासे सेब्भी कौमां केरो ज़ेरो अवं भी एप्पु पुड़ राज़ो ठहरेइलो; तैखन ज़ैस तेरो परमेशर यहोवा च़ुने ज़रूर तैए राज़ो ठहरानो। अपने ढ्लान मरां कोन्ची एप्पु पुड़ राज़ो ठहरानो; कोन्ची परदेशी ज़ै तेरो ढ्ला न भोए तू एप्पु पुड़ अधिकारी न बनेई सकस। ते तै बड़े घोड़े न रख्खे, ते न इस इरादे सेइं अपने लोकन मिस्रे मां भेज़े1 कि तैस कां बड़े घोड़े भोइ गान, किजोकि यहोवा तुसन सेइं ज़ोवरूए, कि तुस तैस बत्ती मरां फिरी कधे न वापस एज्जथ। ते तै बेड़ि कौन्शां भी न रख्खे, एरू न भोए कि तैसेरो मन यहोवारे पासेरां बेदलोए; ते न तै अपनु सोन्नू-चाँदी बड़ू बधाए। ते ज़ैखन तै तखते पुड़ बिशोरो भोए, तैखन इस्से कानूनेरी किताब, ज़ै लेवी याजकन कां राहेली, तैसेरी अक नकल अपने लेई बनाए। ते तै तैस एप्पु कां रख्खे, ते अपने ज़िन्दगी भर तैस पढ़तो राए, ज़ैस सेइं तै अपने परमेशर यहोवारो डर मन्ने, ते इस कानून ते एन विधि केरि सैरी गल्लन मन्ने मां खबरदार रानू शिखे; ज़ैस सेइं तै अपने मने मां घमण्ड केरतां अपने ढ्लान घटिया न समझ़े, ते इन हुक्मन करां न त देइने मुड़े ते न बांए; ज़ैस सेइं कि तै ते तैसेरे खानदानेरे लोक इस्राएली लोकां केरे दरमियाने मां बड़े दिहाड़न तगर राज़ केरते रान।
Source notes (1)
- Footnote लोकन मिस्रे मां भेज़े राज़ो अपने लोकन मिस्रे मां गुलाम भोनेरे लेई घोड़ां केरे बदले न दे
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.