Bhadrawahi Bible
2 इतिहास 4
भवनेरे बाज़े
फिरी सुलैमान राज़े पितलरी अक वेदी बनावाई, तैसारी लम्बाई ते चौड़ाई 20-20 हथ ते ऊँचाई 10 हथ थी। फिरी तैनी ढैलतां अक बड्डू कुण्ड बनावव; ज़ैन एक्की पासेरां होरि पासे तगर 10 हथ बिल्लू थियूं, तैन गोल थियूं, ते तैसेरी ऊँचाई पंच़ हथ थी, ते तैसेरे च़ेवरे पासां केरो घेरो 30 हथ थियो। तैसेरे बुन, तैसेरे च़ेवरे पासन, एक्की-एक्की हथ्थे पुड़ दश-दश दांतां केरि शकल बनेवरी थी, ज़ैन सेइं कुण्ड घिरोरू थियूं। ज़ैखन तैन कुण्ड ढालू जेवं, तैखन इना दांत भी दूई बारन मां ढालोरे थिये। तैन कुण्ड 12 बनेवरे दांतन पुड़ रख्खू जेवं, ज़ैन मरां ट्लाई दांतां केरां तुत्तरां उत्तर पासे, ते ट्लाई पश्चिम, ट्लाई दक्षिण ते ट्लाई दांतां केरां तुत्तरां पूरबेरे पासे थियां। ते तैन पुड़ तैन कुण्ड रखोरू थियूं, ते तैन दांतां केरो पेत्रियों हिस्सो एन्त्री पासे थियो। कुण्डेरे धातरी मोटाई च़ेवर अंगल थी, ते तैसेरो कन्ढो कुटोरेरे कन्ढेरो ज़ेरो थियो, तै सोसनेरे फूड़ू केरो ज़ेरो बनोरो थियो, ते तैस मां लगभग 60000 लीटर भेरतां पानी लगतू थियूं। फिरी तैनी होमबलि च़ाढ़नेरी चीज़ां धोनेरे लेई 10 कुण्डां बनावेइतां, पंच़ देइने पासे ते पंच़ बांए पासे रखां। पन याजकां केरे हथ धोनेरे लेई बड्डू कुण्ड थियूं।
फिरी तैनी सोन्नेरां दश धूपदान विधरे मुताबिक बनावां, ते पंच़ देइने पासे ते पंच़ बांए पासे भवनेरे खास कमरे मां रखां। फिरी तैनी दश मेज़ बनावेइतां पंच़ देइने पासे ते पंच़ बांए पासे भवने मां रख्खाए। ते तैनी सोन्नेरे 100 कुटोरे बनावाए। फिरी तैनी याजकां केरे लेई अंगन ते बड्डू अंगन भी बनावव, ते तैस अंगने मां फाटक बनावेइतां तैन केरे दारन पुड़ पितल लुवाई। तैनी कुण्ड भवनेरे देइने पासे मतलब पूर्वेरे पासे ते दक्षिणेरे पासे रखाव।
हूराम-अबी ज़ै धातरो कारीगिर थियो तैनी हण्डे, फेवड़ी ते कुटोरे भी बनावाए। एन्च़रां सेइं हूरामे सुलैमान राज़ेरे लेई परमेशरे भवने मां ज़ैन कम केरनू थियूं तैन पूरू कियूं। हूरामे दूई खम्भे भी बनाए ते गोलन समेत तैना केंगनी ज़ैना खम्भां केरे च़ोटी पुड़ थी, ते खम्भां केरे च़ोटी पुड़ेरे गोलन ढकनेरे लेई जैली केरि दूई-दूई बारां; ते दूईये जैली केरे लेई 400 अनार ते ज़ैना गोले खम्भां केरे च़ोटी पुड़ थिये, तैन ढकने बाली अक-अक जाली लानेरे लेई अनारां केरि दूई-दूई बारां बनावेई। फिरी तैनी कुर्सी ते कुर्सन पुड़ कुण्डां, ते बड्डू कुण्ड ते तैस हैठ रखनेरे लेई 12 दांत बनाए। फिरी हूराम-अबी ऐह हण्डे, फेवड़ी, कंटे ते एन केरू सारू सामान यहोवारे भवनेरे लेई सुलैमान राज़ेरे हुक्मेरे मुताबिक चमकते पितलरू बनावं। राज़े तैन यरदन वैदी मां सुक्कोत ते सारतान नगरां केरे मझ़ाटे मौसन मित्तरे ज़मीनी मां बनावां। सुलैमाने इना सब चीज़ां बेड़ी जादे बनेई, इड़ी तगर कि पितलरे वज़नेरो हिसाब न थियो।
सुलैमाने परमेशरे भवनेरां सारां भांण्डां, सोन्नेरी वेदी, ते तैना मेज़ ज़ैन पुड़ च़ैढ़ोरी रोट्टी रखते थी, फिरी दीयन समेत खालिस सोन्नेरे दीवट, ज़ैना विधरे मुताबिक एंत्रीं कमरे मां बलते रहते थिये। ते सोन्ने बल्के खालिस सोन्नेरां फूड़ू, दीये ते चिमटे; ते खालिस सोन्नेरी किन्ची, कुटोरे, धूपदान ते कड़छ़ बनावाए। फिरी भवनेरी डेवढी ते परमपवित्र जगारे अन्तर दारां ते भवन मतलब भवनेरां दारां सोन्नेरां बनां।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.