Bhadrawahi Bible
2 इतिहास 3
भवन बनाव गानोए
तैखन सुलैमाने यरूशलेम नगरे मां मोरिय्याह नंव्वेरे पहाड़े पुड़ तैस्से ठैरी मां यहोवारो भवन बनानेरी शुरुआत की। ज़ै तैसेरे बाजी दाऊद राज़े यहोवा दर्शन मैलतां यबूसी ओर्नानेरे खलाड़ी मां तियार कियोरी थी।1 सुलैमाने अपने हुकूमतरे च़ेवरोवं सालेरे दूइयोवं महीनेरे, दूइयोवं दिहाड़े भवन बनानेरी शुरुआत की। परमेशरेरो ज़ै भवन सुलैमान राज़े बनाव, तैसेरी लम्बाई 60 हथ ते चौड़ाई 20 हथ थी। भवनेरे सामने ओसारेरी लम्बाई ते चौड़ाई 20-20 हथ थी; ते तैसेरी ऊँचाई 120 हथ थी। सुलैमाने तैस भवने अट्लमेइं खालिस सोन्नू लुवेवरू थियूं। भवनेरे खास हिस्सां केरि छत तैनी सनोवरेरी लेकड़ी सेइं बनावाई, ते तैस भी खालिस सोन्नू लुवाव, ते तैस पुड़ खजूरेरे बुट्टां केरि ते शंगलां केरि भी घड़ाई कराई। फिरी तैनी शोभा देनेरे लेई भवने मां मणि लुवाई। ते ज़ैन सोन्नू लवं जेव, तैन पर्वेम प्रदेश मरां एवरू थियूं। तैनी भवन, मतलब तैसेरी केड़ी, डेवढी, कंथां ते दारां केरे पल्लन सोन्नू लुवावं, ते दिवारन पुड़ करूब घड़ाई कराए।
परमपवित्र ठार
फिरी तैनी भवनेरी परमपवित्र ठार बनाई। तैसेरी लम्बाई भवनेरी चोड़ाइअरे बराबर 20 हथ थी, ते तैसेरी चौड़ाई भी 20 हथ थी। ते तैनी तैन 20000 किल्लो खालिस सोन्नू लाऊं। सोन्नेरे किलां केरो वज़न 50 शेकेल थियो। ते तैसेरे 20 कमरन भी खालिस सोन्नू लाऊं जेवं।
फिरी भवनेरी पवित्र जगाई मां तैनी घड़ाई कियोरे दूई करूब बनावाए ते तैन खालिस सोन्नू लुवावं जेवं। करूबां केरां फंघां त सब मिलेइतां 20 हथ लम्मां थियां। मतलब एक्की करूबेरू फंघोवं पंच़ हथ थियूं, ते भवनेरी एक्की दिवारी तगर पुज़तू थियूं, ते होरू फंघोवं भी पंच़ हथ थियूं, ते दूइयोवं करूबेरे फंघोवं सेइं मिलोरू थियूं। दूइयोवं करूबेरू अक फंघोवं भी पंच़ हथ थियूं ते भवनेरी दूइयोवं दिवारी तगर पुज़तू थियूं, ते दूइयोवं फंघोवं भी पंच़ हथ थियूं ते पेइले करूबेरे फंघोवं सेइं मिलोरो थियूं।
एन करूबां केरां फंघां 20 हथ फैलोरां थियां। ते तैना अपने-अपने पव्वां केरे बले पुड़ खड़े थिये, ते तैन केरू तुत्तर एंत्रीं पासे जो थियूं। फिरी तैनी मझ़ाटेरो पड़दो नीले, बैंगनी ते लाल रंगेरे बुनोरे सनेरे कपड़ेरो बनावव, ते तैस पुड़ करूबां केरि कढ़ाई कराई।
पितलरे खम्भे
भवनेरे सामने राज़े 45-45 हथ उच्चे दूई खम्भे बनावावरे थिये, ते तैन पुड़ केंगनी थी ज़ैन केरि ऊँचाई पंच़-पंच़ हथ थी। फिरी तैनी एंत्रीं कमरे मां शंगलां बनावेइतां खम्भन पुड़ लुवेई, ते 100 अनार भी बनेइतां शंगलन पुड़ टंगे। तैनी इनां खम्भे भवनेरे सामने, अक देइने पासे ते होरो बांए पासे खड़ो कराव। तैनी देइने खम्भेरू नवं याकीन2 ते बांए खम्भेरू नवं बोअज3 रख्खू।
Source notes (3)
- Cross-reference प्रेरित. 7:47.
- Footnote याकीन मतलब परमेशर कायम केरते।
- Footnote बोअज मतलब परमेशरे मां शक्ति।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.