Bhadrawahi Bible
2 इतिहास 5
पवित्र सन्दूख परमेशरेरे भवने मां आनो गानो
एन्च़रे सेइं सुलैमान राज़े यहोवारे भवनेरे लेई ज़ैन-ज़ैन कम कराव तैन सब पूरू भोवं। तैखन सुलैमाने अपने बाजी दाऊदेरू पवित्र कियोरू सोन्नू, चाँदी ते सारां भांडां अन्तर आनां ते तैना भवनेरे भण्डारन मां रखां। तैसेरां बाद सुलैमान राज़े इस्राएलेरे बुज़ुर्ग ते इस्राएली गोट्लां केरे सारे प्रधान, ज़ैना इस्राएली केरे घरानेरे बुज़ुर्गां केरे प्रधान थिये, तैना भी यरूशलेम नगरे मां एल्हेरेलेइ कुजाए कि तैना यहोवारे करारेरो सन्दूख दाऊदपुरे मरां मतलब सिय्योने मरां उबरो आन्न। सारे इस्राएली मड़द सत्तोवं महीनेरे झोफड़ी केरे तिहारेरे मौके राज़े कां अकोट्ठे भोए।1 ज़ैखन इस्राएलेरे सारे बुज़ुर्ग आए, तैखन लेवी लोकेईं करारेरो सन्दूख छ़ूओ ते लेवी याजक सन्दूख ते मिलापे बाले तेम्बु मां ज़ेत्रां पवित्र भांडां तैस तेम्बु मां थिये तैना सब उबरे नेआं। ते सुलैमान राज़ो ते सारे इस्राएली लोक ज़ैना तैस कां अकोट्ठे भोवरे थिये, तैनेईं सन्दूखेरे सामने एत्री भैड्डां ते दांत बलि किये, ज़ैन केरि गिनतरो कोई हिसाब न थियो भोइ सकतो। तैखन याजकेईं यहोवारे करारेरो सन्दूख भवनेरे अन्तर परमपवित्र ठारी मां पुज़ेइतां करूबां केरे फंघां केरे हेठोरां रख्खो।2 सन्दूखेरे ठारी पुड़ बहा करूबेरां फंघां फैलोरां थियां, ज़ैस सेइं तैना बैंधोरां सन्दूख ते तैसेरे डण्डे ढेकतां थिये। डण्डे त एत्रे लम्मे थिये, कि तैन केरे एक्की पासेरां होरी पासे सन्दूखे सेइं अन्तर मेई निस्तां एंत्रीं कमरे मां सामने लेइहोते थिये, पन बेइरीं पासेरां न थी लेइहोते। तैना डण्डे अज़्ज़ेरे दिहाड़े तगर तैड़ी आन। सन्दूखे मां घोड़ेरी तैना दूई तेख्ती केरे अलावा होरू किछ न थियूं, ज़ैना मूसा होरेब पहाड़े3 पुड़ तैस सन्दूखे मां तैस मौके रेखोरी थी, ज़ैखन यहोवाए इस्राएली लोकां केरे मिस्र मुल्खे मरां कढनेरे पत्ती तैन सेइं करार कियोरो थियो।
परमेशरेरी तारीफ़
ज़ैखन याजक पवित्र जगाई मरां निस्से (ज़ेत्रे याजक हाज़र थिये, तैनेईं सेभेइं अपनो-आप पवित्र कियोरो थियो, ते अलग-अलग टोलन मां सेवा केरते थिये। ते ज़ेत्रे लेवी गीतां ज़ोनेबाले थिये, तैना सारे मतलब मट्ठन ते भियालन समेत आसाप, हेमान ते यदूतून सन एरां लिगड़ां लेइतां झ़ेल्ली, सैन्गी ते सितार नेइतां, वेदी कां पूर्वेरे पासे खड़े थिये, ते तैन सेइं साथी 120 याजक नरशिंगे बज़ेई राहोरे थिये।) ते ज़ैखन नरशिंगे बज़ानेबाले ते गीतां ज़ोनेबाले उच्ची आवाज़ी सेइं यहोवारी आराधना ते शुक्र केरने लगे, ते नरशिंगे, झ़ेल्ली बाज़े बज़ाते यहोवारी तारीफ़ उच्ची आवाज़ी सेइं केरने लगे, “तै भलोए ते तैसेरी दया हमेशारी आहे।” तैखन यहोवारे भवने मां बिदलार भेरोई। ते बिदलारारी वजाई सेइं याजक सेवा केरनेरे लेई खड़े न रेई सके, किजोकि यहोवारी महिमा परमेशरेरे भवने मां भेरोई जेवरी थी। 4
Source notes (4)
- Cross-reference लैव्य. 23:34-43.
- Cross-reference 1 राज़. 8:6-7.
- Footnote होरेब पहाड़े सीनै पहाड़
- Cross-reference प्रका. 15:8;निर्ग. 40:35.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.