Bhadrawahi Bible
2 इतिहास 34
योशिय्याह राज़ेरू राज़
ज़ैखन योशिय्याह यहूदारो राज़ो बनो, तैखन तैसेरी उमर 8 साल थी, ते तैनी यरूशलेम नगरे मां 31 साल राज़ कियूं। तैनी तैन कम कियूं ज़ैन यहोवारी नज़री मां भलू थियूं, ते ज़ैस बत्ती पुड़ तैसेरो पूर्वज दाऊद राज़ो च़लतो राव, तैस्से पुड़ तै भी च़लतो थियो ते तैस करां न त देइने मुड़ो, ते न बांए मुड़ो।
योशिय्याह राज़ेरे सुधार
योशिय्याह हेजू मट्ठू थियूं, मतलब तैस तखते पुड़ बिश्शोरे अठ साल भी पूरे न थिये भोवरे कि तै अपने पूर्वज दाऊदेरे परमेशरेरी तलाश केरने लगो, ते बारोवं साले मां तै उच्चे ठारां ते अशेरा देबरी मूरती ते बनेवरी मूरती दूर केरतां, यहूदा ते यरूशलेमे शुद्ध केरने लगो। बाल देबतेरी वेदी तैसेरे सामने ट्लोड़ी जेई, दिहाड़ेरी मूरती ज़ैना उच्चे ठैरी पुड़ थी, तैनी ट्लोड़ी छ़ेडी, ते अशेरा देबरी मूरती, ते घड़ाई कियोरी ते ढैलोरी मूरती ट्लोड़तां ते पीहतां छ़ेडी, ते तैन केरि धूड़ तैन लोकां केरि कब्रन पुड़ छेकतां छ़डी, ज़ैना तैन कां बलि च़ाढ़ते थिये। तैन केरे पुजारी केरि हेड्डी तैनी तैन्ने वेदन पुड़ फुक्की। तैनी यहूदा ते यरूशलेम शुद्ध कियूं। फिरी मनश्शे, एप्रैम ते शिमोनेरे बल्के नप्ताली तगर सारे नगरां केरे घिरैंडन मां, तैनी वेदी ट्लोड़ी छ़ेडी, ते अशेरा देबरी मूरती ते घड़ाई कियोरी मूरती पीहतां धूड़ बनेइतां छ़डी, ते इस्राएल मुल्खेरी सब दिहाड़ेरी मूरती ट्लोड़तां यरूशलेम नगरे जो वापस अव।
योशिय्याह राज़ेरे ज़िरिये भवनेरी मरम्मत
फिरी योशिय्याह राज़ो अपने राज़ केरनेरे अठारोवं साले मां ज़ैखन योशिय्याह तै मुल्ख ते भवन दूईये शुद्ध किये, तैखन तैनी असल्याहेरू मट्ठू शापान ते नगरेरे हाकिम मासेयाह ते योआहाजेरां मट्ठां इतिहासेरे लिखनेबालां योआह अपने परमेशर यहोवारे भवनेरी मरम्मत केरनेरे लेई भेज़ां। तैनेईं हिल्किय्याह महायाजके कां गेइतां ज़ैना रुपेइये परमेशरेरे भवने मां आनोरे थिये, मतलब ज़ैना लेवी पहरदारेईं मनश्शेरे लोकन ते एप्रैमी लोकन करां ते सारे बच़ोरे इस्राएली ते सारे यहूदी लोकन ते बिन्यामीनी ते सारे यरूशलेमेरे रानेबालां केरे हथ्थेरां नेइतां अकोट्ठू कियोरू थियूं, तैन सौंफी दित्तू। मतलब तैनेईं तैन कम केरनेबालां केरे हथ्थे सौंफी दित्तू, ज़ैना यहोवारे भवनेरे कम्मे पुड़ निगरान थिये, ते यहोवारे भवनेरू तैन कम केरनेबाले तैस भवने मां ज़ैन किछ ट्लुटोरू थियूं, तैसेरी मरम्मत केरने मां तैना रुपेइये लाए। मतलब तैनेईं तैना ट्लखानन ते चनाई केरनेबाले मिस्त्री दित्ते कि तैना घढ़ाई केरतां घोड़ ते ज़ोड़ेरे लेई लकड़ी घिन्तां आन्न, ते तैन घरां केरे छतां केरे लेई लकड़ी आन्न ज़ैना यहूदारे राज़े नाश केरने दित्तोरे थिये। तैना मैन्हु सच़्च़ैई सेइं कम केरते थिये, ते तैन केरे अधिकारी मरारी, यहत ते ओबद्याह, लेवी ते कहाती, जकर्याह ते मशुल्लाम, कम च़लानेबाले ते साज़ बाज़ बज़ानेबाले लेवी। फिरी किछ लेवी भारो छ़ूने बालां केरे अधिकारी भी थिये ते किसमे-किसमेरी सेवा ते कम च़लानेबाले थिये, ते किछ लेवी मुन्शी प्रधान ते दरबान भी थिये।
कानूनेरे किताबरू मैल्हनू
ज़ैखन तैना रुपेइये ज़ैना यहोवारे भवने मां पुज़ावरे थिये, केढी राहोरे थिये, तैखन हिल्किय्याह याजके मूसेरे ज़िरिये दित्तोरे यहोवारे कानूनेरी किताब मैल्ही। तैखन हिल्किय्याह शापान मेंत्री सेइं ज़ोने लगो, “मीं यहोवारे भवने मां कानूनेरी किताब मैल्होरीए।” तैखन हिल्किय्याह तै किताब शापाने दित्ती। तैखन शापाने तै किताब राज़े कां नेही, ते ई सन्देश दित्तो, “ज़ैन-ज़ैन कम तेरे अधिकैरन दित्तोरू थियूं तैन तैना केरि राहोरेन। ज़ैना रुपेइये यहोवारे भवने मां मैल्होरे थिये, तैना तैनेईं निगरानां केरे ते कारीगिरां केरे हथ्थे सौंफी दित्तोरेन।” फिरी शापान मंत्री राज़े कां गेइतां एन भी ज़ोवं कि हिल्किय्याह याजके मीं अक किताब दित्तोरीए। तैखन शापाने तैस मरां पेढ़तां राज़े शुनाव। कानूनेरी तैना गल्लां शुन्तां राज़े अपना लिगड़ां दुखेरे मारे छ़िंदां। फिरी राज़े हिल्किय्याह, शापानेरे मट्ठे अहीकाम, मीकारे मट्ठे अब्दोन, शापान मंत्री ते असायाह नंव्वेरे अपने अधिकैरी हुक्म दित्तो, “तुस गेइतां मेरी तरफां ते इस्राएल ते यहूदा मां रानेबालां केरि तरफां इस मैल्होरी किताबरे वचना केरे बारे मां यहोवा पुछ़ा। किजोकि यहोवारी ई जलजलाहट असन पुड़ एल्हेरेलेइ भड़की कि इश्शे दादे-पड़दादेईं यहोवारू वचन न मन्नू, ते इस किताबी मां लिखोरे सारे हुक्म न मन्ने।”
हुल्दा नबियारी नबूवत
तैखन हिल्किय्याह राज़ेरे बाकी दूतन समेत हुल्दा नबिया कां गेइतां तैस सेइं तैस्से गल्लरे मुताबिक गल्लां की, तै त तैस शल्लूमेरी कौन्श थी ज़ैन तोखतेरू मट्ठू ते हस्रारू पोट्लड़ू थियूं ते लिगड़ां केरे घरेरो रखवालो थियो। ते तै कौन्श यरूशलेमेरे होरी ज़िले मां रहती थी। हुल्दा तैन सेइं ज़ोवं, “इस्राएलेरो परमेशर यहोवा इन ज़ोते, कि ज़ैनी तुस मीं कां भेज़ोरेथ, तैस सेइं इन ज़ोइयथ, ‘यहोवा इन ज़ोते, कि शुना, अवं इस ठारी ते इसेरे रानेबालन पुड़ एत्री मुसीबत छ़ेडतां यहूदारे राज़े कां ज़ै किताब पढ़ी जेई, तैस मां ज़ेत्री लानतां लिखोरिन तैना सब पूरी केरेलो। तैन लोकेईं अवं शैरतां बखले देबतां केरे लेई गुग्गल बालो ते एपनी बनेवरी सैरी चीज़ेइं सेइं अवं सरकाव, एस वजाई सेइं मेरी जलजलाहट इस ठारी पुड़ भड़कोरीए, ते च़ुप न भोल्ही। पन यहूदारो राज़ो ज़ैनी तुस यहोवा करां पुछ़ने भेज़ोरेथ तैस सेइं तुस इन ज़ोइयथ, कि इस्राएलेरो परमेशर यहोवा इन ज़ोते, एल्हेरेलेइ कि तू तैना गल्लां शुन्तां दीन भोव, ते तीं यहोवारे सामने अपनि क्रोड़ी झुकाई, ते तैसेरी गल्लां शुन्तां ज़ैना तैनी इस ठारी ते एसेरे रानेबालां केरे खलाफ ज़ोवरिन, तीं मेरे सामने अपनि क्रोड़ी झुकाई, ते लिगड़ां छ़िन्दतां मेरे सामने लेरां दित्ती, एस वजाई सेइं मीं तेरी प्राथना शुनी। एल्हेरेलेइ शुन, अवं तीं तेरे दादे-पड़दादन मां एन्च़रे मिलेइलो कि तू आरामे सेइं एपनी कब्री मां पुज़व गालो। ते ज़ै मुसीबत अवं इस ठारी पुड़, ते इस जगारे रानेबालन पुड़ छ़डनी चाताईं, तैस मरां तीं एपनी एछ़्छ़ेईं सेइं किछ भी न लेइहोलू।’” तैखन तैन लोकेईं वापस एइतां राज़े कां ई सन्देश दित्तो।
योशिय्याहेरे ज़िरिये हुक्म मन्नेरो करार
तैखन राज़े यहूदा प्रदेश ते यरूशलेम नगरेरे सारे बुज़ुर्गन अकोट्ठे भोनेरे लेई सन्देश भेज़ो। यहूदा प्रदेशेरे राज़ेरे सारे लोकन ते यरूशलेम नगरेरे सारे रानेबाले याजक ते लेवी बल्के निकड़े बड्डे सारी प्रजारे मैन्हु साथी नेइतां यहोवारे भवने मां जेव। तैखन तैनी ज़ै करारेरी किताब यहोवारे भवने मां मैल्होरी थी तैस मां सैरी गल्लां तैन पेढ़तां शुनेई। तैखन राज़े अपने जगाई पुड़ खड़े भोइतां, यहोवा सेइं इस उमीदी सेइं करार कियो कि अवं यहोवारे पत्ती-पत्ती च़लेलो, ते अपने पूरे मने ते पूरे जानी सेइं तैसेरे हुक्म, ते हदायतां ते विधि मन्नेलो, ते इस करारेरी गल्लां ज़ैना इस किताबी मां लिखोरिन पूरी केरेलो। फिरी तैनी तैन सेभन सेइं ज़ैना यरूशलेमे मां ते बिन्यामीने मां थिये तेन्च़रे करार कियो, ते यरूशलेमेरे रानेबाले, परमेशर ज़ै तैन केरे पूर्वजां केरो परमेशर थियो, तैसेरे करारेरे मुताबिक केरने लगे। योशिय्याह सारे इस्राएल मुल्खे मरां सैरी अशुद्ध चीज़ां दूर केरतां ज़ेत्रे इस्राएले मां मैल्ही, तैन सेभन करां तैन केरे परमेशर यहोवारी आराधना कराई। तैसेरे ज़िन्दगी भर तैनेईं अपने पूर्वजां केरे परमेशर यहोवा पत्ती च़लनू न छ़डू।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.