Bhadrawahi Bible
2 इतिहास 33
मनश्शे राज़ेरू राज़
ज़ैखन मनश्शे राज़ केरने लगो तैखन तैसेरी उमर 12 साल थी, ते तैनी यरूशलेम नगरे मां 55 साल राज़ कियूं। तैनी तैन कम कियूं, ज़ैन यहोवारी नज़री मां बुरू थियूं, मतलब तैन कौमां केरे भिट्टे कम्मां केरे मुताबिक ज़ैना यहोवा इस्राएली केरे सामने मुल्खे मरां कढोरे थिये। तैनी तैना पुज़ारी उच्ची ठारां ज़ैना तैसेरे बाजी हिजकिय्याहे ट्लोड़ी छ़ेडोरी थी, फिरी बनावां, ते बाल नंव्वेरे देबतेरे लेई होरी वेदी ते अशेरा देबरी मूरती बनेई, ते अम्बरेरे सारे तारां केरि पूज़ा की, ते तैन केरि सेवा केरतो राव। तैनी यहोवारे तैस भवने मां वेदी बनेई ज़ेसेरे बारे मां यहोवा ज़ोवरू थियूं “यरूशलेम नगरे मां मेरू नवं हमेशा तगर रालू।” बल्के तैनी यहोवारे भवनेरे दूईये अंगन्न मां भी तैनी अम्बरेरे तारां केरे लेई वेदी बनेई। फिरी तैनी हिन्नोमेरे मट्ठेरी वैदी मां अपना मट्ठां होमबलि केरतां च़ाढ़ां, ते रोड़ी ते बुरी घड़ी मन्तो राव, ते टूनो ते मन्ट्लां केरनेबालन सेइं मेल रखतो थियो, ते तै जैदूगिरन ते भूत साधने बालन सेइं रिश्तो रखतो थियो। बल्के तैनी एरां बड़ां कम्मां कियां, ज़ैना यहोवारे नज़री मां बुरां आन ते ज़ैस सेइं तै खुश न भोए। ते तैनी एपनी बनेवरी मूरती परमेशरेरे तैस भवने मां रेखी ज़ैन केरे बारे मां परमेशरे दाऊद ते तैसेरे मट्ठे सुलैमाने सेइं ज़ोवरू थियूं, “इस भवने मां, ते यरूशलेमे मां, ज़ैन मीं इस्राएलेरे सारे गोट्लन मरां च़ुनोरूए अवं अपनु नवं हमेशारे लेई रखेलो, ते अवं एरू न केरेलो कि ज़ै मुल्ख मीं तुश्शे दादे-पड़दादन दित्तोरो थियो, तैस मरां इस्राएल फिरी दरबदर फिरे। एत्रू ज़रूरी भोए कि तै मेरे सारे हुक्म मतलब मूसेरे दित्तोरे कानून ते विधि ते नियम मन्ने मां एतिहात केरन।” मनश्शे यहूदा ते यरूशलेमेरे रानेबाले इड़ी तगर भटकाए कि तैनेईं तैन कौमन करां भी जादे बुराई की, ज़ैना यहोवा इस्राएली लोकां केरे सामनेरां नाश कियोरी थी।
मनश्शे राज़ो मन फिराते
यहोवा मनश्शे ते तैसेरे लोकन तैन केरे पापां केरे बारे मां खबरदार केरतो राव, पन तैनेईं कोई परवाह की। तैखन यहोवा तैन पुड़ अश्शूरेरे सेनापति केरे ज़िरिये हमलो कराव, ते तैनेईं मनश्शे नकेल लेइतां, ते पितलरी बेड़ी सेइं लेइतां, तै बाबेल नगरे जो नियो। तैखन मुसीबती मां पेइतां तै अपने परमेशर यहोवाए मन्ने लगो, ते अपने दादे-पड़दादां केरे परमेशरेरे सामने बड़ो दीन भोव, ते तैस कां प्राथना की। तैखन परमेशरे तै कबूल कियो ते तैसेरी प्राथना शुनी, ते तै यरूशलेमे मां पुज़ेइतां तैसेरू राज़ वापस दित्तू। तैखन मनश्शे याकीन भोइ जेव कि यहोवाए परमेशरे।
इसेरे बाद तैनी दाऊदपुरे करां बेइर गीहोन नागेरे पश्चिमेरे पासे नाले मां मछ़ली फाटके तगर अक शहरपनाह बनावाई, फिरी ओपेल घेरतां उच्ची की। ते यहूदारे सारे क़िले बाले नगरन मां सेनापति रख्खे। फिरी तैनी बखले देबते ते यहोवारे भवने मरां मूरती, ते ज़ेत्री होरी वेदी तैनी यहोवारे भवनेरे पहाड़े पुड़, ते यरूशलेम नगरे मां बनेवरी थी, तैना सब दूर केरतां नगरे करां बेइर शारेई। तैखन तैनी यहोवारे वेदरी मरम्मत कराई, ते तैस पुड़ मेलबलि ते शुक्र केरनेरी बलि च़ाढ़ने लगो, ते यहूदी लोकन इस्राएलेरे परमेशर यहोवारी आराधना केरनेरो हुक्म दित्तो। फिर भी इस्राएली लोक उच्ची ठारन पुड़ बलिदान केरते राए, पन सिर्फ अपने परमेशर यहोवारे लेई।
मनश्शे राज़े मौत
मनश्शेरां बाकी सारां कम्मां, ते तैनी ज़ै प्राथना अपने परमेशरे कां की, ते तैन नेबी केरे वचन ज़ैना इस्राएलेरे परमेशर यहोवारे नंव्वे तैस सेइं गल्लां केरते थिये, एन सब इस्राएलेरे राज़ां केरे इतिहासेरी किताबी मां लिखेरूए। ते तैसेरी प्राथना ते तै केन्च़रे शुनी जेई, ते तैसेरो सारो पाप ते धोखो ते तैनी दीन भोने करां पेइले कोढ़ी-कोढ़ी उच्ची ठारां बनेवरी थी, ते अशेरा देबरी घड़ाई कियोरी मूरती खेड़ि करेई, इन सब होशेरे किताबी मां लिखेरूए। आखरी मां मनश्शे अपने दादे-पड़दादां केरो ज़ेरो मेरि जेव; ते तैसेरू मट्ठू आमोन तैसेरी जगाई पुड़ राज़ो बनो।
आमोन राज़ेरू राज़
ज़ैखन आमोन राज़ो बनो, तैखन तैसेरी उमर 22 साल थी, ते तैनी यरूशलेम नगरे मां दूई साल राज़ कियूं। तैनी अपने बाजी मनश्शेरू ज़ेरू तैन कम कियूं ज़ैन यहोवारी नज़री मां बुरूए। ते ज़ेत्री मूरती तैसेरे बाजी मनश्शे घड़ाई केरतां बनेवावरी थी, तैन सेभन कां बलिदान केरतो थियो ते तैन सेभी केरि पूज़ा केरतो थियो। ज़ेन्च़रे तैसेरो बाजी मनश्शे यहोवारे सामने दीन भोव, तेन्च़रे तै दीन न भोव, बल्के आमोन जादे पाप केरतो जेव। किछ आमोनेरे अधिकैरेईं साज़िश केरतां, तै तैसेरे मेहले मां मारो। पन आम लोकेईं तैना सब मारे, ज़ैनेईं आमोन राज़ेरे खलाफ साज़िश कियोरी थी। ते यहूदारे लोकेईं तैसेरू मट्ठू योशिय्याह तैसेरे जगाई पुड़ राज़ो बनाव।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.