Bhadrawahi Bible
2 इतिहास 35
योशिय्याह राज़ो फ़सह तिहार मनानू
योशिय्याह राज़े यरूशलेमे मां यहोवारे लेई फ़सह तिहार मनाव ते पेइले महीनेरे च़ेवधोवं दिहाड़े तिहारेरे लेई फ़सहरे जानबर बलि किये। तैनी याजक अपने-अपने कम्मे पुड़ ठहराए, ते यहोवारे भवने मां सेवा केरनेरे लेई तैन केरि हिम्मत बधाई। फिरी लेवी ज़ैना सारे इस्राएली लोकन शिखालते ते यहोवारे लेई पवित्र ठहरोरे थिये, तैन सेइं तैनी ज़ोवं, “तुस पवित्र सन्दूखे तैस भवने मां रखा ज़ै दाऊदेरे मट्ठे इस्राएलेरे राज़े सुलैमाने बनेवरो थियो। हुनी तुसेईं कंधन पुड़ भारो छ़ूनो न पेलो। हुनी अपने परमेशर यहोवा ते तैसेरे लोक इस्राएली केरि सेवा केरा। इस्राएलेरो राज़ो दाऊद ते तैसेरे मट्ठे सुलैमान राज़े दूईयां केरि लिखोरी विधि केरे मुताबिक, अपने-अपने पूर्वजां केरे मुताबिक, अपने-अपने टोली मां तियार भोथ। तुश्शे भियालां केरे पूर्वजां केरे घराना केरे हिस्सां केरे मुताबिक पवित्र ठारी मां खड़े भोथ, मतलब तैन केरे हर एक्की हिस्सेरे लेई लेवी लोकां केरे एक्की-एक्की पूर्वजां केरे घरानेरो अक हिस्सो भोए। फ़सहरे जानबर बलि केरा, ते अपनो आप पवित्र केरतां अपने भियालां केरे लेई तियारी केरा कि तैना यहोवारे तैस वचनेरे मुताबिक केरि सखन, ज़ैन तैनी मूसेरे ज़िरिये ज़ोवरू थियूं।”
फिरी योशिय्याह सारे लोक ज़ैना तैड़ी हाज़र थिये, 30000 भैड्डां ते छ़ेल्ली केरे बच्चे ते 3000 दांत दित्तोरे थिये। इना सब तिहारेरे बलिदान केरनेरे लेई राज़ेरी जाईदाती मरां दित्ते जेवरे थिये। तैसेरे हाकिमेईं प्रजारे लोकन, याजक लोकन ते लेवी लोकन अपने मेर्ज़री बलि केरनेरे लेई जानबर दित्ते। ते हिल्किय्याह, जकर्याह ते यहीएल नंव्वेरे परमेशरेरे भवनेरे प्रधानेईं याजक लोकन 2200 भैड्डां-छ़ेल्ली ते 3000 दांत फ़सहरे बलिदानेरे लेई दित्ते। कोनन्याह ते तैसेरे ढ्ला शमायाह ते नतनेल थिये, ते हशब्याह, यीएल ते योजाबाद नंव्वेरे लेवी केरे प्रधानेईं लेवी लोकन 5000 भैड्डां-छ़ेल्ली, ते 500 दांत फ़सहरे बलिदानेरे लेई दित्ते। एन्च़रां सेइं फ़सह तिहारेरी तियारी भोइ जेई, ते राज़ेरे हुक्मेरे मुताबिक याजक अपने-अपने जगाई पुड़, ते लेवी अपने-अपने टोली मां खड़े भोए। तैखन फ़सह तिहारेरां गबड़ां बलि किये, ते याजक बलि केरनेबालां केरे हथ्थेरां खून नेइतां वेदी पुड़ छ़िड़कते थिये ते लेवी तैन केरि खैड़ी कढते थिये। तैखन लेवेईं होमबलि केरनेरे जानबर एल्हेरेलेइ अलग किये कि तैना लोकां केरे पूर्वजां केरे घराना केरे हिस्सां केरे मुताबिक देन, कि तैना तै यहोवारे लेई च़ढ़तल देन ज़ेन्च़रे कि मूसेरी किताबी मां लिखेरूए। ते दांत भी तैनेईं तेन्च़रे केरतां बलि किये। तैखन तैनेईं फ़सहरे जानबरां केरू मास विधरे मुताबिक अग्गी मां ट्लाड़ू, ते पवित्र चीज़ां, हाँडी ते हण्डे ते थैली मां लूशी-लूशी बेंटतां लोकन कां पुज़ेइतां देंते जे। तैखन तैनेईं अपने लेई ते याजक लोकां केरे लेई फ़सह तिहारेरी तियारी की, किजोकि हारूनेरे खानदानेरे याजक होमबलि कियोरे जानबर ते चर्भी राती तगर च़ाढ़ते राए, एस वजाई सेइं लेवी लोकन अपने लेई ते हारूनेरे खानदानेरे बाकी याजकां केरे लेई तियारी की। आसापेरे खानदाने मरां गीतां ज़ोनेबाले, दाऊद, आसाप, हेमान ते राज़ेरे नेबी यदूतूनेरे हुक्मेरे मुताबिक अपने-अपने जगाई पुड़ राए, ते पहरदार एक्की-एक्की भवनेरे फाटके पुड़ राए। तैन अपनु-अपनु कम शारनू न पेव, किजोकि तैन केरे भियाल लेवी लोकेईं तैन केरे लेई फ़सहेरी तियारी की।
तैस्से दिहाड़े योशिय्याह राज़ेरे हुक्मेरे मुताबिक फ़सहेरू तिहार मनाने ते यहोवारी वेदी पुड़ होमबलि च़ाढ़नेरे लेई यहोवारी सारी सेवारी तियारी भोइ जेई। ज़ैना इस्राएली तैड़ी हाज़र थिये तैनेईं फ़सहेरू तिहार तैस्से वक्ते ते अखमीरी रोट्टरू तिहार सत दिहाड़न तगर मनाव। एस फ़सह तिहारेरू ज़ेरू शमूएल नेबेरे दिहाड़न करां लेइतां इस्राएले मां कोई फ़सहेरू तिहार न थियूं मनावरू, ते न इस्राएलेरे कोन्ची राज़े एन्च़रे मनावं, ज़ेन्च़रे योशिय्याह ते याजकेईं, लेवेईं ते ज़ेत्रे यहूदी ते इस्राएली हाज़र थिये, तैनेईं ते यरूशलेमेरे रानेबालेईं मनावं। एन फ़सहेरू तिहार योशिय्याह राज़ेरे अठारोवं साले मां मनावं जेवं।
योशिय्याह राज़ेरी मौत ते तैसेरे राज़ेरो अन्त
इसेरे बाद ज़ैखन योशिय्याहे भवन तियार कियो, तैखन मिस्रेरो राज़ो नकोए फरात दरिया करां लेइतां कर्कमीश नगरे सेइं लड़नेरे लेई चढ़ाई की, ते योशिय्याह तैसेरो सामनो केरनेरे लेई जेव। पन नको राज़े तैस कांजो दूतां केरे ज़िरिये बिस्तार भेज़ो, “हे यहूदारे राज़ा मेरू तीं सेइं कुन कम्मे! अज़ अवं तीं पुड़ नईं बल्के, तैस्से कुले पुड़ चढ़ाई केरी राहोरोइं, ज़ैस सेइं अवं जंग केरताईं। फिरी परमेशरे मीं करां जल्दी केरनेरे लेई ज़ोवरूए। एल्हेरेलेइ परमेशर ज़ै मीं सेइं साथीए, तैस करां अलग रा, कोन्च एरू न भोए कि तै तीं नाश केरे।” पन योशिय्याह तैस करां तुत्तर न फिराव, बल्के तैस सेइं लड़नेरे लेई रूप बदलू, ते नको एरी तैना गल्लां शुनी ज़ैना तैनी परमेशरेरे तरफां ज़ोवरू थी, ते मगिद्दोएरे वैदी मां तैस सेइं जंग केरनेरे लेई जेव। जंगी मां नको एरे किछ तीर च़लाने बालेईं योशिय्याह राज़ेरे पासे तीर मारे। ते राज़े अपने अधिकैरन सेइं ज़ोवं, “अवं बड़ो ज़खमी भोइ जेवरोईं, एल्हेरेलेइ हुनी तुसां मीं इट्ठां नेथ।” तैखन तैसेरे अधिकैरेईं तै रथे पुड़ेरां ओसैलतां होरि रथे पुड़ च़ाढ़ो, ते यरूशलेमे जो नियो। तैड़ी तै मेरि जेव ते तैसेरे दादे-पड़दादां केरे कब्रस्ताने मां तै दब्बो जेव। यहूदी लोकेईं ते यरूशलेमेरे लोकेईं योशिय्याह राज़ेरे लेई मातम कियो। यिर्मयाह नेबे योशिय्याह राज़ेरे लेई मातमेरू गीत बनावं ते सारे गानेबाले ते गाने बैली कौन्शां अपने मातमेरे गीतन मां योशिय्याह राज़ेरी चर्चा अज़ तगर केरती रैतिन। एनकेरां गीतां इस्राएले मां अक विधि बेनि जेई ते इना गल्लां मातमेरे गीतन मां मातमेरे गीतां केरे तरीके पुड़ लिखी जेवरिन। योशिय्याह राज़ेरां बाकी कम्मां ते भेक्तरां ज़ैना कम्मां तैनी तैसेरे मुताबिक कियां तैना यहोवारे कानूनेरे किताबी मां लिखां जेवरन। शुरू करां आखरी तगर तैसेरां सारां कम्मां इस्राएलेरे ते यहूदारे राज़ां केरे इतिहासेरी किताबी मां लिखां जेवरन।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.