Bhadrawahi Bible
2 इतिहास 24
योआश राज़ेरू राज़
ज़ैखन योआश राज़ो बनो, तैखन तैसेरी उमर सत साल थी। तैनी यरूशलेम नगरे मां 40 साल राज़ कियूं, तैसेरू अम्मरू नवं सिब्या थियूं, ज़ै बेर्शेबा नगरेरी रानेबाली थी। ज़ांतगर यहोयादा याजक ज़ींतो थियो, तांतगर योआश तैन कम केरतो राव ज़ैन यहोवारी नज़री मां भलू थियूं। यहोयादा, योआशेरे दूई कौन्शन सेइं ड्लाह बनाव ते ज़ैन सेइं तैस मट्ठां-कुइयां भोइ।
यहोवारे भवनेरी मरम्मत
किछ वक्तेरां बाद योआशेरे दिले मां यहोवारे भवनेरी मरम्मत केरनेरी इच्छा पैदा भोइ। तैखन तैनी याजक ते लेवी अकोट्ठे केरतां ज़ोवं, “हर साल यहूदारे नगरन मां गेइतां सारे इस्राएली लोकन करां रुपेइये आनां, ज़ैस सेइं तुश्शे परमेशरे भवनेरी मरम्मत भोए। हेरा एस कम्मे मां जल्दी केरा।” फिरी भी लेवी लोकेईं जल्दी न की। तैखन राज़े यहोयादा महायाजके कुजेइतां पुछ़ू, “कुन वजाए कि तीं लेवी लोकन सखत हुक्म नईं दित्तोरो, कि तैना यहूदा ते यरूशलेम नगरे मरां तैस चन्देरे रुपेइये आन्न ज़ेसेरो कानून यहोवारे सेवक मूसा ते इस्राएलेरी मेण्डली गवैहरे तेम्बेरे खातर च़लेवरो थियो।” तैस दुष्ट कौन्श अतल्याहेरे लोकेईं त परमेशरेरो भवन ट्लोड़ोरो थियो, ते यहोवारे भवनेरी सैरी पवित्र कियोरी चीज़ां बाल देबतां केरे लेई इस्तेमाल कियोरी थी।
राज़े अक सन्दूख बनानेरो हुक्म दित्तो ते तै यहोवारे भवनेरे फाटके कां बेइर रख्खो जेव। तैखन यहूदा ते यरूशलेमे मां ई प्रचार कियो कि ज़ैस चन्देरे नियम परमेशरे सेवके मूसा सुनसान ठैरी मां इस्राएले मां च़लेवरो थियो, तैसेरे रुपेइये यहोवारे लेई इरां आनां। त सारे हाकिम ते सारे लोक खुशी भोइतां रुपेइये एन्हतां ज़ांतगर सन्दूख न भेरोव तांतगर सन्दूखे मां छ़डते जे। ज़ैखन-ज़ैखन तै सन्दूख लेवी केरे ज़िरिये राज़ेरे प्रधान्न कां पुज़व गातो थियो त एन समझ़ू गातू थियूं कि तैस मां बड़े रुपेइये आन। तैखन-तैखन राज़ेरे प्रधान ते महायाजकेरे अधिकारी एइतां सन्दूखे खाली केरते थिये ते फिरी तैस्से ठारी पुड़ रखते थिये। तैना रोज़ एन्ने केरते थिये ते तैनेईं बड़े रुपेइये अकोट्ठे किये। तैखन राज़े ते यहोयादा तैना रुपेइये यहोवारे भवने मां कम केरनेबालन दित्ते, ते तैनेईं चनाई केरनेरे बाले मिस्त्री ते ट्लखानन यहोवारे भवनेरी मरम्मत केरनेरे लेई, लुहार, ते पितलरू कम केरनेबाले, ते यहोवारे भवनेरी मरम्मत केरनेबाले मज़दूरी पुड़ रख्खे। कारीगिर कम केरते राए ते पूरू कम भोइ जेवं, ते तैनेईं परमेशरेरो भवन ज़ेरो पेइलो थियो फिरी तेरहो बनेइतां मज़बूत कियो। ज़ैखन तैनेईं तैन कम पूरू कियूं, तैखन तैनेईं तैना बाकी रुपेइये राज़े ते यहोयादा कां आने, ते तैन सेइं यहोवारे भवनेरे लेई भांडां बनावां, मतलब सेवा केरनेरे लेई ते होमबलि च़ाढ़नेरां भांडां ते धूपदान ते सोन्ने चैंदरां भांडां। ज़ांतगर यहोयादा ज़ींतो राव, तांतगर यहोवारे भवने मां होमबलि रोज़ च़ैढ़ी गैती थी।
यहोयादारी मौत ते योआशेरू परमेशरे करां दूर भोनू
पन यहोयादा लम्मी उमरारो भोव ते 130 सालां केरि उमरारो भोइतां मेरि जेव। ते दाऊदपुरे मां ज़ैड़ी राज़े दबोरो थिये तैड़ी तै भी दब्बो जेव। किजोकि तैनी इस्राएले मां ते परमेशरे ते तैसेरे भवनेरे बारे मां भलू कियोरू थियूं।
पन यहोयादारे मरनेरां पत्ती यहूदारे हाकिमेईं योआश राज़े कां गेइतां तैस कां प्रणाम कियूं, ते राज़े तैन केरि गल मन्नी। तैखन यहूदारे लोक अपने पूर्वजां केरे परमेशर यहोवारो भवन शैरतां अशेरा देबरी ते मूरती केरी पूज़ा केरने लगे। एल्हेरेलेइ तैन केरे पापी भोनेरी वजाई सेइं यहोवारो क्रोध यहूदा ते यरूशलेमे पुड़ भड़को। फिरी भी यहोवा तैन कां नबी भेज़े कि एप्पु कां वापस आन्न। ते तैनेईं तैना खबरदार किये, पन तैनेईं परवाह न की।
तैखन परमेशरेरो आत्मा यहोयादा याजकेरे मट्ठे जकर्याह पुड़ अव, ते तै उच्ची जगाई पुड़ खड़ो भोइतां लोकन सेइं ज़ोने लगो, “यहोवा इन पुछ़ते कि तुस मेरो हुक्म किजो टालतथ? एरू केरतां तुश्शू भलू न भोइ सके। हेरा, तुस त यहोवा करां दूर भोवरेथ, एस वजाई तै तुसन करां दूर भोवरोए।” तैखन लोकेईं तैसेरे खलाफ बगावतरी गल केरतां, राज़ेरे हुक्मे सेइं यहोवारे भवनेरे अंगने मां तैस पुड़ पथराव कियो। एन्च़रां सेइं योआश राज़े तै प्यार बिसरतां ज़ै यहोयादा तैस सेइं कियोरो थियो, तैसेरू मट्ठू मारू। मरते बार तैनी ज़ोवं, “यहोवा एस पुड़ नज़र केरतां एसेरो हिसाब घिन्नेलो।”
अरामी सेनारो हमलो
नंव्वोवं साल लगते अरामी सेना तैन पुड़ हमलो कियो, ते यहूदा ते यरूशलेमे मां एइतां लोकां केरे सारे हाकिम नाश किये ते तैन केरि सारी दौलत लुटतां दमिश्केरे राज़े कांजो भेज़ी। अरामी केरि सेना थोड़ी ज़ेरि एवरी थी, पन यहोवा अक बड़ी सेना तैन केरे हथ्थे मां की, किजोकि तैनेईं अपने पूर्वजां केरो परमेशर शारोरो थियो। एन्च़रां सेइं योआश राज़े भी तैनेईं सज़ाह दित्ती।
योआशेरो कत्ल
ज़ैखन तैनेईं तै बड़ो ज़खमी केरतां छ़डो, तैखन तैसेरे अधिकैरेईं यहोयादा याजकेरे मट्ठेरे खूनेरे वजाई सेइं बगावतरी गल्लां केरतां, तैनेईं तैसेरे बिछ़ाने पुड़ एन्च़रे हमलो कियो, कि तै मेरी जेव। ते तैनेईं तै दाऊदपुरे मां दब्बो, पन राज़ां केरे कब्रस्ताने मां नईं। ज़ैनेईं तैसेरे खलाफ बगावत कियोरी थी, तैना इना थिये, मतलब अम्मोनिन शिमातेरू मट्ठू जाबाद ते शिम्रित, मोआबिनेरू मट्ठू यहोजाबाद। योआशेरे मट्ठां केरे बारे ते तैसेरी बगावत, ज़ै बड़ी सज़ारी नबूवत भोइ, तैसेरे ते परमेशरेरे भवनेरे बनानेरे बारे इनां सब राज़ां केरि इतिहासेरी किताबी मां लिखोरिन। तैखन तैसेरू मट्ठू अमस्याह तैसेरे ठैरी राज़ो बनो।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.