Bhadrawahi Bible
2 इतिहास 23
अतल्याह रैनरी हार
अतल्याह रैनरे यहूदा पुड़ राज़ केरनेरे सत्तोवं साले मां यहोयादा हिम्मत रेखतां यरोहामेरू मट्ठू अजर्याह, यहोहानानरू मट्ठू इश्माएल, ओबेदेरू मट्ठू अजर्याह, अदायाहेरू मट्ठू मासेयाह ते जिक्री एरू मट्ठू एलीशापात, एन सेनापतिन सेइं करार कियो। तैखन तै यहूदा मां घुमतां यहूदारे सारे नगरन मरां लेवी लोक ते इस्राएलेरे पूर्वजां केरे घरानेरे प्रधान अकोट्ठे केरतां यरूशलेम नगरे जो आने। तै सारे लोकेईं परमेशरे भवने मां राज़े सेइं करार कियो, ते यहोयादा तैन सेइं ज़ोवं, “शुना, इन राज़ेरू मट्ठू राज़ केरेलू ज़ेन्च़रे कि यहोवा दाऊदेरे खानदानेरे बारे मां ज़ोवं। तुस अक कम केरा: तुस याजकन ते लेवी केरे ट्लेइयोवं हिस्सेरे लोक ज़ैना आरामेरे दिहाड़े एजने बाले भोन, तैना भवनेरे फाटकेरे पहरदार भोन, अक तिहाई लोक राज़ेरे मेहले मां रान, ते अक तिहाई लोक बुनियादरे फाटके कां रान। ते सारे लोक यहोवारे भवनेरे अंगने मां रान। पन याजक ते सेवा केरनेबाले लेवी केरे अलावा होरो कोई यहोवारे भवनेरे अन्तर न एज्जी सखे। याजक ते लेवी त अन्तर एज्जन, किजोकि तैना पवित्रन, पन बाकी सारे लोक अंगने मां रान ज़ेसेरे बारे मां यहोवा हुक्म दित्तोरोए। लेवी अपने-अपने हथ्थे मां हथियार ट्लेइतां राज़ेरे च़ेवरे पासन रान ते ज़ै कोई भवनेरे अन्तर गानेरी कोशिश केरे, तै मारो गाए। ते तुस राज़े कां एइते-गांते तैस सेइं साथी रेइयथ।”
यहोयादा याजकेरे इना सब हुक्मां केरे मुताबिक लेवी लोकेईं ते सारे यहूदी लोकेईं कियूं। तैनेईं आरामेरे दिहाड़े एजने बाले ते गानेबाले दूईये टोली केरे, अपने-अपने मैन्हु एप्पु सेइं साथी रख्खे, किजोकि यहोयादा याजके कोन्ची टोली लेवी लोक न थिये भेज़ोरे। तैखन यहोयादा याजक शौवां सिपेही केरे सेनापेतन दाऊद राज़ेरे बर्छे ते भाले ते ढालां दित्ती, ज़ैना परमेशरेरे भवने मां थी। फिरी तैनी तैन सेभी लोकन अपने-अपने हथ्थन मां हथियार देइतां भवनेरे दक्षिणी कुने करां लेइतां, उत्तरी कूने तगर वेदी ते भवने कां राज़ेरे च़ेवरे पासे तैसेरो पहरो देनेरे खड़े किये। तैखन तैनेईं राज़ेरू मट्ठू योआश बेइर आनू, तैस ताज लुवाव ते शहादत नामो देइतां तै राज़ो बनाव। ते यहोयादा याजक ते तैसेरे मट्ठेईं तैसेरू अभिषेक कियूं, ते लोक ज़ोने लगे, राज़ेरी उमर लम्मी भोए।
ज़ैखन अतल्याह तैन लोकां केरो हैल्लो शुनो, ज़ैना दौड़ते ते राज़ेरी बडीयाई केरते थिये, तैखन तै लोकन कां यहोवारे भवने मां जेई। तैसां हेरू, कि नंव्वो राज़ो दारे कां नेड़ो खम्भे कां खड़ोए, ते राज़े कां प्रधान ते नरशिंगे बज़ानेबाले खड़ेन, ते सारे लोक खुशी मनेई राहोरेन ते नरशिंगे बज़ेई राहोरेन ते गीतां ज़ोनेबाले बाज़े बज़ाते ते आराधना केरि राहोरेन। तैखन अतल्याह अपना लिगड़ां छ़िन्दतां ज़ोने लगी, राजद्रोह, राजद्रोह! तैखन यहोयादा याजके सेनापति बेइर एन्हतां तैन सेइं ज़ोवं, “तैस यहोवारे भवनेरे न मारा, बल्के एपनी मेण्डली मरां केढतां बेइर नेथ। ते ज़ै कोई तैस बच़ानेरी कोशिश केरे, तै भी तलवारी सेइं मारो गाए।” तैखन तैनेईं तैस दूईये पासन जगाह दित्ती, ते तै राज़दरबारे घोड़ां फाटकेरे दारे तगर जेई, ते तैड़ी तैनेईं तै मारी।
यहोयादा याजकेरे सुधार
तैखन यहोयादा याजके अपने ते लोकां केरे ते राज़ेरे दरमियान यहोवारे लोक भोनेरो करार कियो। तैखन सारे लोकेईं बाल देबतेरू मन्दर डोलू। ते तैसेरी वेदी ते मूरती केरे टुक्ड़े-टुक्ड़े किये, ते बाल देबतेरो पुजारी ज़ेसेरू नवं मत्तान थियूं वेदी केरे मझ़ाटे मारो। तैखन यहोयादा यहोवारे भवनेरी सेवारे लेई तैना लेवी याजक च़ुने, ज़ैना दाऊदे यहोवारे भवने पुड़ टोली-टोली केरतां एल्हेरेलेइ रखोरे थिये, कि ज़ेन्च़रे मूसेरे कानूने मां लिखेरूए, तेन्च़रे तैना यहोवा कां होमबलि च़ाढ़ते रान, ते दाऊद राज़ेरी च़लोरी विधरे मुताबिक आनन्द केरन ते गीतां ज़ोन।1 यहोयादा यहोवारे भवनेरे फाटकन पुड़ पहरदार एल्हेरेलेइ खड़े किये, कि ज़ै कोई कोन्ची किसमे सेइं अशुद्ध भोए, तै अन्तर न एज्जी सखे। तैनी सेनापति ते रईस ते प्रजारे लोकन पुड़ राज़ केरनेबाले ते मुल्खेरे सारे लोकन साथी नेइतां राज़ो यहोवारे भवनेरे बुन नियो ते उच्चे फाटके मेइं भोइतां राज़ेरे मेहले मां आनू, ते राज़ो तखते पुड़ बिशालो। तैखन सारे यहूदा प्रदेशेरे लोकेईं खुशी मनाई ते तैस नगरे मां शान्ति भोइ। किजोकि अतल्याह त तलवारी सेइं मारी जेवरी थी।
Source notes (1)
- Cross-reference 1 इति. 28:13;2 इति. 17:9.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.