Bhadrawahi Bible
2 इतिहास 25
अमस्याह राज़ेरू राज़
ज़ैखन अमस्याह यहूदारो राज़ो बनो, तैखन तैसेरी उमर 25 साल थी। ते तैनी यरूशलेम नगरे मां 29 साल राज़ कियूं। ते तैसेरी अम्मरू नवं यहोअद्दान थियूं, ज़ै यरूशलेम नगरेरी रानेबाली थी। तैनी तैन कियूं ज़ैन यहोवारी नज़री मां ठीक थियूं, पन पूरे मने सेइं न कियूं। ज़ैखन राज़ तैसेरे हथ्थे मां मज़बूत भोइ जेवं, तैखन तैनी अपने तैना अधिकारी मारे ज़ैनेईं तैसेरो बाजी राज़ो मारोरो थियो। पन तैनी तैन केरे बच्चे न मारे किजोकि तैनी यहोवारे तैस हुक्मेरे मुताबिक कियूं, ज़ै मूसेरे कानूनेरी किताबी मां लिखोरोए, “मट्ठेरे वजाई सेइं बाजी न मारो गाए, ते न बाजी केरे वजाई सेइं मट्ठू मारू गाए, ज़ैनी पाप कियोरोए तैए तैस पापेरे वजाई सेइं मारो गाए।”1
एदोमेरे खलाफ अमस्याहेरी जंग
तैखन अमस्याह यहूदा बल्के सारे यहूदी ते बिन्यामीनी लोक अकोट्ठे केरतां तैना, पूर्वजां केरे घराना केरे मुताबिक शौवां ते हज़ारां केरे सेनापति केरे अधिकारे मां ठहराए। ते तैन मां ज़ेत्रां केरि उमर 20 साल या तैस करां जादे थी। ते तैन केरि गिनती केरतां 300000 भालो च़लानेबाले ते ढाल छ़ूनेबाले बड़े-बड़े योद्धा मैल्हे। फिरी तैनी 100000 इस्राएली बहादर भी लगभग 3500 किल्लो चाँदी देइतां कुजव। पन परमेशरे एक्की नेबे तैस कां एइतां ज़ोवं, “हे राज़ा, इस्राएलेरी सेना तीं सेइं साथी न गाए। किजोकि यहोवा इस्राएले मतलब एप्रैमेरे सारे खानदाने सेइं साथी न राए। अगर तू गेइतां जंगी मां बहादरी भी केरस। ते जंगरे लेई हिम्मत केरस, फिरी भी परमेशर तीं दुश्मना केरे सामने बिछ़ड़ेलो, किजोकि मद्दत केरने त बिछ़ड़नू दूईयने मां परमेशर शक्तिशाली आहे।” अमस्याह नेबी पुछ़ू, “फिरी ज़ै 3500 किल्लो चाँदी मीं इस्राएली सेना दित्तोरीए, तैसेरे बारे मां कुन केरीं?” नेबे जुवाब दित्तो, “यहोवा तीं एस करां भी बड़ी जादे देइ सकते।” तैखन अमस्याह तै सेना ज़ै एप्रैमेरे पासेरां तैस कां एवरी थी, अलग की, कि तैना अपने ठारी पुड़ जो वापस गान। तैखन तैन केरो क्रोध यहूदी लोकन पुड़ भड़को, ते तैना बड़े क्रोधे भोइतां अपने ठैरी जो वापस जे। पन अमस्याह हिम्मत केरतां अपने सिपाही नेइतां च़लो, ते लूनेरी वैदी मां गेइतां, 10000 सेईरी सिपाही मारे। यहूदी सेना 10000 सिपाही कैदी बनाए ते तैना चट्टानरे च़ोटी पुड़ नेइतां बिछ़ोड़े, ते तैना सब मेरि जे। पन तैस टोलरे सिपाही ज़ैना अमस्याह वापस भेज़ोरे थिये कि तैना तैस सेइं साथी जंगी मां न गान, सामरिया करां बेथोरोने तगर यहूदारे सारे नगरन पुड़ ट्लुटतां पे, ते तैन केरे 3000 रानेबाले मैरी छ़डे ते बेड़ी चीज़ां लुट्टी।
ज़ैखन अमस्याह राज़े एदोमी केरो नाश केरतां वापस अव, तैखन तैनी सेईरी केरे देबते एन्हतां अपने देबते केरतां खड़े किये, ते तैन केरे सामने झुकतां प्रणाम कियूं, ते तैन केरे लेई गुग्गल बालने लगो। तैखन यहोवारो क्रोध अमस्याह पुड़ भड़को ते तैनी तैस कां अक नबी भेज़ो ज़ैनी तैस सेइं ज़ोवं, “ज़ैना देबते अपने लोकन तेरे हथ्थे करां न बच़ेइ सखे, तू तैन केरि पूज़ा किजो लगोरोस?” नबी तैस सेइं हेजू ज़ोई राहोरो थियो कि तैनी नेबेरी गल केटतां पुछ़ू, “कुन असेईं तू मेरो मंत्री बनेवरोस? च़ुप रा! कुन तू मरनू चातस?” तैखन तै नबी एन ज़ोइतां च़ुप भोइ जेव, “मीं पतोए कि परमेशरे तेरो नाश केरनेरो इरादो कियोरोए, किजोकि तीं एरू कियोरूए ते मेरी सलाह नईं मन्नोरी।”
इस्राएलेरे खलाफ अमस्याहेरी जंग
तैखन यहूदारे राज़े अमस्याह अपने अधिकैरन सेइं सलाह केरतां, इस्राएलेरे राज़े योआशे कां, ज़ै येहूएरो पोट्लड़ो ते यहोआहाजेरू मट्ठू थियूं, ऐह समाद भेज़ो, “एई अस एक्की होरि सेइं मुकाबलो केरम।” पन इस्राएलेरे राज़े योआशे यहूदारे राज़े अमस्याह कां जुवाबे मां ई समाद भेज़ो, “लबानोनेरी अक झड़बेरी लबानोनेरे एक्की गैइड़ेरे बुट्टे जो समाद भेज़ो, ‘अपनि कुई मेरे मट्ठे जो ड्लेइतां दे।’ एत्रे मां लबानोनेरो कोई जंगली जानबर नेड़ेरे घिन्तां जेव ते झड़बेरी ढ्लन्च़ी। तू ज़ोतस, कि मीं एदोमी ज़ींतोरेन। एस वजाई सेइं तू फुल्ली जेव ते बड़कां मारतस! अपने घरे बिश। तू अपने नुक्सानेरे लेई इरां किजो हथ छ़डतस, एस सेइं तू कुन, बल्के यहूदारी भी हार भोल्ही।”
पन अमस्याह राज़े न मन्नू। इन त परमेशरेरी तरफां भोवं, कि तै तैन केरे दुश्मना केरे हथ्थे केरे, किजोकि तैना एदोमेरे देबतां केरि पूज़ाई मां लगोरे थिये। तैखन इस्राएलेरे राज़े योआश चढ़ाई की ते तैनी यहूदारो राज़ो अमस्याह यहूदा मुल्खेरे बेतशेमेश नगरे मां एक्की होरि सेइं मुकाबलो कियो। यहूदा प्रदेशेरी सेना इस्राएल मुल्खेरी सेना करां हैरी जेव, ते हर कोई अपने-अपने डेरे जो नेश्शी जे। तैखन इस्राएलेरो राज़ो योआश यहूदारो राज़ो अमस्याह, ज़ै यहोआहाजेरो पोट्लड़ो ते योआशेरू मट्ठू थियूं, बेतशेमेश नगरे मां ट्लाव ते यरूशलेमे नेइ जेव ते यरूशलेमेरी शहरपनाह, एप्रैमेरे फाटके करां कूने बाले फाटके तगर, लगभग 400 हथ हिस्सो बुछ़ोड़तां छ़डो। ते ज़ेत्रू सोन्नू चाँदी ते ज़ेत्रां भांडां परमेशरेरे भवने मां ओबेदेदोमे कां मैल्हां, ते राज़ेरे मेहले मां ज़ेत्रो खज़ानो थियो, तैन सब ते कैदी लोक भी नेइतां तैना सामरिया नगरे जो वापस ने।
अमस्याह राज़ेरी मौत
यहोआहाजेरे मट्ठे इस्राएलेरो राज़े योआशेरे मरनेरां पत्ती योआशेरू मट्ठू यहूदारो राज़ो अमस्याह 15 सालन तगर ज़ींतो राव। शुरू करां आखरी तगर अमस्याहेरां बाकी कम्मां, यहूदा ते इस्राएलेरे राज़ां केरे इतिहासेरी किताबी मां लिखोरन। ज़ैस वक्ते अमस्याह यहोवा पत्ती च़लनू छ़ेडतां फिरी जेवरो थियो तैस वक्तेरां बाद यरूशलेमे मां तैसेरे खलाफ बगावतरू एलान भोने लगू, ते तै लाकीश नगरे जो नेश्शी जेव। एन्च़रे दूतेइं लाकीश नगरे तगर तैसेरो पीछो केरतां, तै तैड़ी मैरी छ़डो। इसेरे बाद तैसेरी लाश घोड़े पुड़ रेखतां पुज़ाई ते यहूदारे नगरे मां ज़ैड़ी तैसेरे दादे-पड़दादे दब्बोरे थिये तैड़ी तै भी दब्बो।
Source notes (1)
- Cross-reference व्यव. 24:16.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.