Bhadrawahi Bible
1 शमूएल 17
गोलियतेरी ललकार
पलिश्ती लोकेईं इस्राएलन सेइं जंग लड़नेरे लेई अपनि सेना अकोट्ठी की; ते यहूदा प्रदेशेरे सोको नगरे मां अकोट्ठे भोइतां सोको ते अजेका नगरेरे मझ़ाटे एपेसदम्मीम नगरे मां डेरे लाए। शाऊल ते इस्राएली सिपैहेईं भी अकोट्ठे भोइतां एला नव्वेंरी वैदी मां डेरे लाए, ते जंग लड़नेरे लेई पलिश्ती केरे खलाफ तियार भोए। पलिश्ती लोक पहाड़ेरे एक्की पासे इस्राएली पहाड़ेरे होरि पासे खड़े राए; ते दूईयां केरे मझ़ाटे वादी थी। तैखन पलिश्ती केरे डेरन मरां गोलियत नंव्वेरो अक बहादर निस्सो, ज़ै गत नगरेरो रानेबालो थियो, ते तैसेरी लम्बाई लगभग शा हथ थी। तैसेरे दोग्गे पुड़ पितलरो टोप थियो; ते तैनी अक पितलरी झिलम लेवरी थी, ज़ेसेरो वज़न 50001 शेकेल पितलरो थियो। तैसेरी ज़ंघन पुड़ पितलरे कवच थिये, ते तैनी पिठी पुड़ भालो बन्धोरो थियो। तैसेरे भालेरो डण्डो खेडरे डण्डेरो ज़ेरो थियो, ते तैसेरे भालेरो फल 600 शेकेल2 लोंहेरो थियो, ते बड़ी ढाल ट्लेइतां अक मैन्हु तैस अग्री-अग्री च़लतो थियो। तै खड़ो भोइतां इस्राएली सेना जो ललकारतो थियो, “तुसेईं इड़ी एइतां जंगरे लेई किजो डेरो लेवरोए? कुन अवं पलिश्ती नईं, ते तुस शाऊलेरे अधीन नईं? एप्पु मरां अक मड़द च़ुना, कि तै मेरे सामने एज्जे। अगर तै मीं सेइं लेड़तां मीं मैरी सके, तैखन त अस तुश्शे अधीन भोइ गामेले; पन अगर अवं तैस हारेइतां तैस मैरी, त तुसेईं इश्शे अधीन भोइतां इश्शी गुलामी केरनी पेली।” फिरी तै पलिश्ती ज़ोने लगो, “अवं अज़्ज़ेरे दिहाड़े इस्राएली सेना ललकारताईं, कोई योद्धा मीं कां भेज़ा, कि अस एक्की होरि सेइं लड़म।” तैस पलिश्तेरी इनां गल्लां शुन्तां शाऊल ते सारे इस्राएली लोक बड़े डेरि जे। दाऊद यहूदा प्रदेशेरे बैतलहम नगरेरे तैस एप्रातेरे कुले मरां थियो, ज़ेसेरू नवं यिशै थियूं, ते तैसेरां अठ मट्ठां थियां ते तै मड़द शाऊलेरे दिहाड़न मां बुढो ते कमज़ोर भोइ जेवरो थियो। यिशैरां ट्लाई बड्डां मट्ठां शाऊले सेइं साथी भोइतां लड़ने जेवरे थियां; ते तैसेरां ट्लाई मट्ठां केरां नंव्वां ज़ैना लड़ने जेवरां थियां, सेभना करां बड्डेरू नवं एलीआब, होरेरू अबीनादाब, ते ट्लेइयोवंरू शम्मा थियूं। सेभन करां निकड़ो दाऊद थियो; ते ट्लाईए बड्डां मट्ठां शाऊले सेइं साथी जंगी मां जेवरां थियां ते दाऊद बैतलहमे मां अपने बाजेरी भैड्डां छ़ेल्ली च़ारने शाऊले करां एइतो गातो रहतो थियो।
पलिश्ती गोलियत त 40 दिहाड़न तगर झ़ेझ़ां-ड्लोझ़ इस्राएली सिपाही केरे सामने गेइतां खड़ो भोइतां ललकारतो थियो।
एक्सां यिशै अपने मट्ठे दाऊदे सेइं ज़ोवं, “इन एपा भेरतां3 तेवरू अन्न, ते इना दश रोट्टी नेइतां डेरन मां अपने ढ्लान कांजो दौड़तां गा। ते पनीरेरी इनां दश टिक्की तैन केरे 1000 सिपेही केरे सेनापेतेरे लेई ने। ते अपने ढ्लां केरो हाल चाल हेरतां तैन केरि कोई निशानी एना। शाऊल, ते तेरे ढ्ला, ते सारे इस्राएली सिपाही एला नव्वेंरी वैदी मां पलिश्तन सेइं लड़ने जेवरेन थिये।”
एल्हेरेलेइ दाऊदे भैड्डां छ़ेल्ली कोन्ची पुहाले कां छ़ेडतां झ़ेझ़ां उठतां, यिशैरे हुक्मेरे मुताबिक तैना चीज़ां नेइतां च़लो; ते ज़ैखन सेना जंगरे मैइदाने मांजो च़ेलि राहोरी थी, ते जंगरे लेई ललकारने लगोरी थी, तैस वक्ते तै अपने ढ्लां केरे डेरन पुड़ पुज़्ज़ो। तैखन इस्राएली ते पलिश्ती लोकेईं अपनि-अपनि सेना लड़ैइयरे लेई वार-पार की। दाऊद खानेरी चीज़ां सामानेरे पहरदारेरे हथ्थे मां छ़ेडतां जंगरे मैइदाने मांजो दौड़ो, ते अपने ढ्लान कां नेड़े गेइतां तैन केरो हाल चाल पुछ़ो। तै तैन सेइं गल्लां केरि राहोरो थियो, कि पलिश्ती सेनाई मरां तै बहादर गत नगरेरो रानेबालो गोलियत नंव्वेरो तै पलिश्ती योद्धा च़ेढ़तां अव, ते पेइलेरो ज़ेरो ललकारने लगो। ते दाऊदे तैन शुनू।
गोलियते लेइतां सारे इस्राएली बड़े डेरतां तैसेरे सामनेरां नेश्शी जे। फिरी इस्राएली सिपाही ज़ोने लगे, “कुन तीं तै योद्धा लाहोरोए ज़ै च़ेढ़तां एज्जी राहोरोए? सच़्च़े तै इस्राएली लोकन लालकारनेरे लेई च़ेढ़ी एइते; ते ज़ै कोई तैस मारेलो तैस राज़ो बड़ी दौलत देलो, ते एपनी कुइयरो ड्लाह तैस सेइं बनालो, ते तैसेरे बाजी केरे घराने इस्राएले मां कर देने करां आज़ाद केरेलो।” तैखन दाऊदे तैन सिपेहिन सेइं ज़ैना तैसेरे आसे-पासे खड़े थिये पुछ़ू, “ज़ै तैस पलिश्ती मैरतां इस्राएली लोकां केरि बदनामी दूर केरेलो तैसेरे लेई कुन कियूं गालू? तै खतनो न कियोरो पलिश्ती कुन ज़ींते परमेशरेरी सेना ललकारे?” तैखन सिपैहेईं तैस सेइं तैन्ना गल्लां ज़ोई, कि ज़ै कोई तैस मारेलो तैस कुन-कुन इनाम मैल्हेलू।
ज़ैखन दाऊद तैन सिपेहिन सेइं गल्लां केरि राहोरो थियो, तैखन तैसेरो बड्डो ढ्ला एलीआब शुनी राहोरो थियो; ते तै दाऊदे जो बड़ो सेरकोइतां ज़ोने लगो, “तू इड़ी किजो एवरोस? ते जंगले मां तैन थोड़ी ज़ेरि भैड्डां-छ़ेल्ली तू केसेरे हवाले छ़ेडतां एवरोस? तेरू घमण्ड ते तेरे दिलेरी बुराई मीं पतोए; तू त लड़ाई हेरनेरे लेई इड़ी एवरोस।” दाऊदे ज़ोवं, “हुनी मीं कुन कियूं? ई त गल बाते भोइ राहोरी थी।” तैखन दाऊदे तैस करां तुत्तर फिरवं ते होरि पासे खड़े भोइतां तेरही गल्लां ज़ोई; ते लोकेईं तैस पेइलेरो ज़ेरो जुवाब दित्तो।
ज़ैखन दाऊदेरी गल्लां शाऊले सेइं भी ज़ोई जेई, तैखन शाऊले भी शुनेई जेई; ते तैनी तै कुजव। तैखन दाऊदे शाऊले सेइं ज़ोवं, “कोन्ची मैन्हेरो दिल तैसेरे वजाई सेइं कच़्च़ो न भोए; तेरो दास गेइतां तैस पलिश्ती सेइं लड़ेलो।” शाऊले दाऊदे सेइं ज़ोवं, “तू गेइतां तैस पलिश्ती योद्धारे खलाफ लड़ाई न केरि सखस; किजोकि तू त मट्ठूस, ते तै छोट्टी उमरी करां लेइतां अज़ तगर योद्धा आहे।” पन दाऊदे शाऊले सेइं ज़ोवं, “तेरो दास अपने बाजी केरि भैड्डां-छ़ेल्ली च़ारतो थियो; ते ज़ैखन कोई शेर या इछ़ केन्नी मरां गबड़ू छ़ुइतां नेतो थियो, तैखन अवं तैसेरो पीछो केरतां तैस मारतो थियो, ते तैस निकड़े गबड़े तैसेरे ऐशी मरां छुटातो थियो; ते ज़ैखन तै मीं पुड़ हमलो केरतो थियो, तैखन अवं तैसेरे जबड़ेरे बाल ट्लेइतां तैस मैरी छ़डतो थियो। तेरे दासे शेर ते इछ़ दूईये मारोरेन। ते तैस बगैर खतनो कियोरो पलिश्ती मैन्हेरो हाल भी एरहो भोइ गालो, किजोकि तैनी ज़ींते परमेशरेरी सेना ललकारोरीए।” दाऊदे इन भी ज़ोवं, “यहोवा ज़ैनी अवं शेर ते इछ़ दूईयां केरे पंजे मरां बच़ाव, तैए मीं तैस पलिश्तेरे हथ्थेरां भी बच़ालो।” तैखन शाऊले दाऊदे सेइं ज़ोवं, “गा, यहोवा तीं सेइं साथी राए।” ते शाऊले दाऊदे अपना लिगड़ां लुवां ते पितलरो टोप लुवाव ते तैस झिलम भी लुवाई। तैखन दाऊदे तैसेरी तलवार लिगड़न पुड़ बन्धी, ते च़लनेरी कोशिश की; तैनी त तैन पेइलू न थियूं लेवरू। एल्हेरेलेइ दाऊदे शाऊले सेइं ज़ोवं, “एन लेइतां मीं करां च़लोए भी न, किजोकि मीं एन पेइलू नईं लेवरू।” ते दाऊदे तैना खोल्ली छ़डां। तैखन तैनी अपनि सोटी हथ्थे मां ट्लाई ते नाले मरां चिकने पंच़ घोड़ तैलतां अपने पुहालेरी थेली, मतलब अपने झोले मां रख्खे; ते अपनो छ़िंगलोट हथ्थे मां नेइतां पलिश्ती गोलियतेरे नेड़े जेव।
ते पलिश्ती च़लते-च़लते दाऊदेरे नेड़े पुज़्ज़े, ते ज़ै मैन्हु तैसेरी बड़ी ढाल ट्लेइतां थियो तै तैसेरे अग्री-अग्री च़लो। ज़ैखन पलिश्ती मैन्हे तक्कू ते दाऊद लाव, तैखन तैनी तै घटिया समझ़ो; किजोकि तैन निकड़ू मट्ठू थियूं, ते तैसेरे तुत्तरे पुड़ लाली चमकती थी, ते तैन बड़ू खूबसूरत थियूं। तैखन पलिश्ती मैन्हें दाऊदे जो ज़ोवं, “कुन अवं कुतर आईं, कि तू सोटी घिन्तां मीं कां एवरोस?” तैखन पलिश्ती अपने देबतां केरां नवं घिन्तां दाऊदे जो लानत देने लगो। फिरी पलिश्ती मैन्हें दाऊदे जो ज़ोवं, “मीं कां एई, अवं तेरी लाश अम्बरेरे च़ुड़ोलन ते जंगली जानबरन देइलो।” दाऊदे पलिश्ती योद्धा जो ज़ोवं, “तू त तलवार, भालो ते बलम ट्लेइतां मीं कांजो एवरोस; पन अवं सेनारे यहोवारे नंव्वे सेइं तीं कां एइताईं, ज़ै इस्राएली सेनारो परमेशरे, ते तैए तीं ललकारोरोए। अज़्ज़ेरे दिहाड़े यहोवा तीं मेरे हथ्थे मां केरेलो, ते अवं तीं मारेलो, ते तेरी क्रोड़ी तेरे रिगले करां अलग केरेलो; ते अवं अज़्ज़ेरे दिहाड़े पलिश्ती सेनारी लाशां अम्बरेरे च़ुड़ोलन देलो ते जंगली जानबरन। तैखन सैरी धेरतरे लोक सेमझ़ी गाले कि इस्राएले मां अक परमेशरे। ते ई सारी मण्डली सेमझ़ी गाली कि यहोवा तलवार या भालेरे ज़िरिये ज़ींत न दे, एल्हेरेलेइ कि जंग त यहोवारी आए, ते तैए तुसन इश्शे हथ्थे मां केरेलो।”
ज़ैखन पलिश्ती गोलियत उठतां दाऊदेरो मुकाबलो केरनेरे लेई नेड़े अव, तैखन दाऊद गोलियतेरो मुकाबलो केरनेरे लेई जल्दी दौड़ो। फिरी दाऊदे अपने झोले मां हथ छ़ेडतां तैस मरां अक घोड़ कढो, ते तै छ़िंगलोटे मां छ़ेडतां पलिश्ती गोलियतेरे कुपाए पुड़ एन्च़रे बज़्ज़ो, कि तै ज़मीनी पुड़ तुत्तरेरे भारे बिछ़ड़ी जेव। एन्च़रे सेइं दाऊदे बगैर तलवारां छ़िंगलोटे ते एक्की घोड़ेरे ज़िरिये सेइं तैस पलिश्ती पुड़ हमलो केरतां तै मैरी छ़डो। तैखन दाऊद दौड़तां पलिश्ती पुड़ गेइतां खड़ो भोव, ते तैसेरी तलवार ट्लेइतां म्याने मरां खिच्ची, ते तै मारो, ते तैसेरी क्रोड़ी तैस्से तलवारी सेइं केट्टी छ़डी। पलिश्ती एन हेरतां कि इश्शो बहादर मेरि जेव पलिश्ती लोक नेश्शी जे। तैखन इस्राएली ते यहूदी मड़द ललकारने लगे, ते गत ते एक्रोने करां फाटकन तगर पलिश्ती केरो पीछो केरते जे, ते ज़खमी पलिश्ती शारैंमेरी बत्ती मां ते गत ते एक्रोन नगरन तगर बिछ़ड़ते जे। तैखन इस्राएली लोकेईं पलिश्ती सेनारो पीछो छ़ेडतां वापस आए, ते तैन केरे डेरे लुट्टे। ते दाऊदे पलिश्तेरी क्रोड़ी यरूशलेम नगरे मां आनी; ते तैसेरे हथियार अपने डेरे मां रख्खे। ज़ैखन शाऊले दाऊद तैस पलिश्तेरो मुकाबलो केरने लेई गातो लाव, तैखन तैनी अपने सेनारे प्रधाने अब्नेरे पुछ़ू, “हे अब्नेर, तै जुवान केसेरू मट्ठूए?” अब्नेरे ज़ोवं, “हे राज़ा, तेरे ज़िन्दगरी कसम, अवं न ज़ैनी।” राज़े ज़ोवं, “तू पतो केर कि तै जुवान केसेरू मट्ठूए।” ज़ैखन दाऊद पलिश्ती योद्धा मैरतां वापस अव, तैखन अब्नेरे तैस पलिश्तेरी क्रोड़ी हथ्थे मां ट्लेइतां शाऊलेरे सामने पुज़ाई। शाऊले तैस पुछ़ू, “हे जुवान, तू केसेरू मट्ठूस?” दाऊदे ज़ोवं, “अवं त तेरे दास बैतलहम नगरेरे यिशैरू मट्ठू आईं।”
Source notes (3)
- Footnote वज़न 5000 लगभग 57 किल्लो
- Footnote 600 शेकेल लगभग 7 किल्लो
- Footnote एपा भेरतां लगभग 10 किल्लो
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.