Bhadrawahi Bible
1 शमूएल 18
दाऊद ते योनातानेरी दोस्ती
दाऊदेरे शाऊले सेइं गल्लां केरनेरां बाद, तैखन योनातानेरो दिल दाऊदे सेइं एन्च़रे लेग्गी जेव, कि योनातान तैस सेइं अपने बराबर प्यार केरने लगो। ते तैस दिहाड़े करां शाऊले दाऊद एप्पु सेइं साथी रख्खो, ते अपने बाजी केरे घरे वापस गाने न दित्तो। तैखन योनाताने दाऊदे सेइं करार कियो, किजोकि तै तैस सेइं अपने प्राणां केरो ज़ेरो प्यार केरतो थियो। योनाताने अपनो चोगो ज़ै तैनी लेवरो थियो खोलतां दाऊदे दित्तो, ते तैनी सिपेही केरां ज़ेरां लिगड़ां ते अपनि तलवार ते धनुष ते कमरबन्ध भी तैस दित्तो। ते ज़ैड़ी कोन्च शाऊल दाऊदे भेज़तो थियो तैड़ी गेइतां तै अक्ली सेइं कम केरतो थियो; ते शाऊले तै सेनारो प्रधान ठहराव। ते सारे लोक ते शाऊलेरे अधिकारी तैस पुड़ खुशी थिये।
शाऊलेरी दाऊदे सेइं दुश्मनी
ज़ैखन दाऊद तैस पलिश्ती मैरतां वापस एज्जी राहोरो थियो, ते तैना सारे सिपाही भी एज्जी राहोरो थिये, तैखन सारे इस्राएली नगरन मरां कौन्शां निस्तां डफली ते बाज़े घिन्तां, आनन्दे सेइं गीतां ज़ोती ते नेच़ती, शाऊल राज़ेरू सुवागत केरनेरे लेई निस्सी। ते तैना कौन्शां नेच़ती ते एक्की होरि सेइं साथी इन गीत ज़ोती जेई,
“शाऊले त हज़ारेईं दुश्मन, पन दाऊदे लखेइं दुश्मन मारे।”
तैखन शाऊल बड़ो सेरकोव, ते ई गल तैस बुरी लगी; ते तै ज़ोने लगो, “तैनेईं दाऊदेरे लेई त लखेइं ते मेरे लेई हज़ारेईं ज़ोवरूए; एल्हेरेलेइ राज़ छ़ेडतां तैस हुनी होरू कुन मैल्हनू बाकी राव?” तैस दिहाड़े करां शाऊल दाऊदे पुड़ जलन केरतां नज़र रखने लगो।
दूइयोवं दिहाड़े परमेशरेरी तरफां एक्की दुष्ट आत्मा शाऊल अपने कैबू मां कियो, ते तै पागलेरो ज़ेरो हरकत केरने लगो;1 दाऊद रोज़ेरो ज़ेरो अपने हथ्थे सेइं सितार बज़ेई राहोरो थियो ते शाऊलेरे हथ्थे मां भालो थियो। तैखन शाऊले इन सोचतां कि “अवं एन्च़रे बालो कि भालो दाऊदे समेत कंथी मां डुब्बे,” भालो दाऊदे पुड़ च़लाव, पन दाऊद तैसेरे सामनेरां दूई फेरेईं नश्शो।
शाऊल दाऊदे करां डरतो थियो, किजोकि यहोवा दाऊदे सेइं साथी थियो, पन शाऊले करां अलग भोइ जेवरो थियो। एल्हेरेलेइ शाऊले तै एप्पु करां अलग केरतां 1000 सिपेही केरो सेनापति बनाव, ते तै लोकां केरे सामने एइतो गातो रहतो थियो। ते दाऊद ज़ैन भी केरतो थियो तैस मां कामयाब भोतो थियो; ते यहोवा तैस सेइं साथी-साथी थियो। ज़ैखन शाऊले हेरू कि तै बड़ो कामयाब भोने लगोरोए, तैखन तै तैस करां डेरि जेव। पन इस्राएल ते यहूदारे सारे लोक दाऊदे सेइं प्यार केरते थिये; किजोकि तैनी जंगन मां अपने सेनारी अगवाई की ते तैन ज़ींत दुवाई।
दाऊद ते मीकलरो ड्लाह
एक्सां शाऊले इन सोचतां कि “एन्च़रे सेइं पलिश्ती दाऊदे मारेले, ते मीं किछ नईं केरनू,” एल्हेरेलेइ दाऊदे सेइं ज़ोवं, “शुन, अवं अपनि बड्डी कुई मेरब तींजो ड्लेइतां देलो; एत्रू केर, कि तू बहादरी सेइं मेरे लेई यहोवारे तरफां जंग लड़।” पन दाऊदे शाऊले सेइं ज़ोवं, “अवं कुन आईं, ते मेरी ज़िन्दगी कुने, ते इस्राएले मां मेरे बाजी केरू कुल कुने, कि अवं राज़ेरो ज़माई बेनि?” ज़ैखन शाऊलेरी कुई मेरबरो दाऊदे सेइं ड्लाह बनानेरो वक्त अव, तैखन तैसारो ड्लाह महोलाई नगरेरे रानेबाले अद्रीएले सेइं बनाव।
इस दौरान शाऊलेरी कुई मीकल दाऊदे सेइं प्यार केरने लगी; ते ज़ैखन एस गल्लरी खबर शाऊले मैल्ही, तैखन तै खुश भोव। शाऊले त सोचोरू थियूं, कि तै तैसेरे लेई फंदो भोए, ते पलिश्ती केरे हथ्थे तै च़ढ़े। ते शाऊले दाऊदे सेइं ज़ोवं, “इस फेरे त तू ज़रूर मेरो ज़माई भोइ गालो।” फिरी शाऊले अपने सेवकन हुक्म दित्तो, “दाऊदे सेइं छ़ेपतां एरी गल्लां केरा, ‘शुन, राज़ो तीं पुड़ खुशे, ते तैसेरे सब सेवक भी तीं सेइं प्यार केरतन; एल्हेरेलेइ हुनी तू राज़ेरो ज़माई बन।’” तैखन शाऊलेरे सेवकेईं दाऊदे सेइं एरी गल्लां ज़ोई। पन दाऊदे ज़ोवं, “अवं त गरीब ते घटिया मैन्हु आईं, फिरी कुन तुश्शी नज़री मां राज़ेरो ज़माई भोनू निकड़ी गल्ले?” ज़ैखन शाऊलेरे सेवकेईं ज़ोवं, कि दाऊदे एरी-एरी गल्लां ज़ोवरिन। तैखन शाऊले ज़ोवं, “तुस दाऊदे सेइं इन ज़ोथ, ‘राज़ो कुइयरे बदले किछ न चाए, सिर्फ पलिश्ती केरि 100 खैड़ी चाते, कि तै अपने दुश्मन्न करां बदलो ने।’” शाऊलेरो इरादो ई थियो, कि पलिश्ती लोकन करां दाऊदे माराए। ज़ैखन तैसेरे सेवकेईं दाऊदे सेइं इना गल्लां ज़ोईं, तैखन तै राज़ेरो ज़माई बन्नेरे लेई खुश भोव। ज़ैखन ड्लाहेरे लेई किछे दिहाड़ी रेई जे, तैखन दाऊद एप्पु सेइं साथी सिपाही घिन्तां च़लो, ते पलिश्ती केरे 200 सिपाही मारे; तैखन दाऊदे तैन केरि खैड़ी एन्हीं, ते तैना राज़े कां गेनतां दित्ती, एल्हेरेलेइ कि तै राज़ेरो ज़माई भोइ गाए। ते शाऊले अपनि कुई मीकलरो ड्लाह तैस सेइं बनाव। ज़ैखन शाऊले हेरू, कि यहोवा दाऊदे सेइं साथीए, ते मेरी कुई मीकल तैस सेइं प्यार केरतीए, तैखन शाऊल दाऊदे करां होरो भी जादे डेरि जेव। एल्हेरेलेइ शाऊल हमेशारे लेई दाऊदेरो दुश्मन बेनि जेव।
फिरी पलिश्ती केरे सेनापति निस्तां आए, ते ज़ैखन-ज़ैखन तैना निस्तां आए तैखन-तैखन दाऊदे शाऊलेरे सारे सेनापतिन करां जादे अक्लमन्दी हिराई; एस सेइं तैसेरू नवं बड़ू मुशूर भोइ जेवं।
Source notes (1)
- Footnote पागलेरो ज़ेरो हरकत केरने लगो इसेरो मतलब ई भी भोइ सकते कि तै नबूवत केरने लगो।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.