Bhadrawahi Bible
1 शमूएल 16
दाऊद राज़ो च़ुनो गानो
एक्सां यहोवा शमूएले सेइं ज़ोवं, “मीं शाऊल इस्राएले पुड़ राज़ केरनेरे लेई निकम्मो समझ़ो, तू कैखन तगर तैसेरे बारे मां मातम केरतां रालो? शिंगे मां तेल भर ते च़ल; अवं तीं बैतलहम नगरेरे रानेबाले यिशै कां भेज़ताईं, किजोकि मीं तैसेरे मट्ठन मरां अक राज़ो भोनेरे लेई च़ुनोरोए।” शमूएले ज़ोवं, “अवं केन्च़रे गेइ सकताईं? अगर शाऊल शुनेलो, त मीं मारेलो।” यहोवा ज़ोवं, “अक बछ़ड़ी साथी नेइतां गेइयां ते ज़ोइयां, ‘अवं यहोवारे लेई बलि केरने एवरोईं।’ ते बलि केरनेरे ठैरी पुड़ यिशै जो धाम ज़ोइयां, तैखन अवं तीं ज़ोलो कि तीं कुन केरनूए; ते ज़ैस जो अवं तीं ज़ोइलो तैस मेरी तरफां अभिषेक केरां।” तैखन शमूएले यहोवारे ज़ोनेरे मुताबिक कियूं, ते बैतलहम नगरे जो जेव। तैस नगरेरे प्रधान थरकते तैस सेइं मिलने जो जे, ते ज़ोने लगे, “कुन तू दोस्तेरे लिहाज़े सेइं एवरोस कि नईं?” तैनी ज़ोवं, “हाँ, दोस्तेरे लिहाज़े सेइं एवरोईं; अवं यहोवारे लेई बलि देनेरे लेई एवरोईं; तुस अपने आपे पवित्र केरतां मीं सेइं साथी बलि देने एज्जा।” तैखन तैनी यिशै ते तैसेरां मट्ठां पवित्र केरनेरे लेई ते बलि देनेरे ठारी मां एजनेरे लेई धाम ज़ोई।
ज़ैखन यिशै त तैसेरां मट्ठां आं, तैखन तैनी एलीआबे लेहितां सोचू, “सच़्च़े ई ज़ै यहोवारे सामने तैए तैसेरो अभिषिक्त भोल्हो।” पन यहोवा शमूएले सेइं ज़ोवं, “न त तैसेरे रूपे पुड़ नज़र केरां, ते न तैसेरे कदे पुड़, किजोकि मीं तै काबल नईं समझ़ोरोए; किजोकि यहोवारू तकनू मैन्हु केरू ज़ेरू नईं; मैन्हु त बेइरयूं रूप हेरते, पन यहोवारी नज़र मने पुड़ रहतीए।” तैखन यिशै अबीनादाबे कुजेइतां शमूएले कां सामने भेज़ो। ते तैस सेइं ज़ोवं, “यहोवा ज़ोवं, ई भी नईं च़ुनोरे।” फिरी यिशै शम्मा सामने भेज़ो। ते तैनी ज़ोवं, “यहोवाए ई भी नईं च़ुनोरोए।” एन्च़रां सेइं यिशै अपना सत मट्ठां शमूएले कां सामने भेज़ां। ते शमूएल यिशै सेइं ज़ोतो जेव, “यहोवा एना नईं च़ुनोरां।” तैखन शमूएले यिशै सेइं ज़ोवं, “कुन तेरां सारा मट्ठां एवरेन?” तैनी ज़ोवं, “नईं, निकड़ू मट्ठू नईं एवरू, तैन गब्बन सेइं जेवरूए।” शमूएले यिशै सेइं ज़ोवं, “तैस जो समाद भेज़तां कुजा; किजोकि ज़ांतगर तैन इड़ी न एज्जे तांतगर अस रोट्टी खानेरे लेई न बिशमेले।” तैखन तैनी तैन कुजेइतां नेड़े आनू। तैसेरी त खैखोड़ी छ़ल-छ़ल केरती थी, ते तैसेरी एछ़्छ़ी खूबसूरत थी, तैखन यहोवा ज़ोवं, “उठतां एसेरू अभिषेक केर: ईए आहे।” तैखन शमूएले अपनु तेलेरू शिंग नेइतां तैसेरे ढ्लां केरे सामने तैसेरू अभिषेक कियूं; ते तैस दिहाड़े करां लेइतां एजने बाले वक्ते मां यहोवारो आत्मा दाऊदेरी अगवाई केरतो राव। तैखन शमूएल उठतां रामाह नगरे जो च़लो जेव। यहोवारो आत्मा शाऊले पुड़ेरां च़ेलि जेव, ते यहोवारे तरफां अक दुष्ट आत्मा तैस डरने लगी। ते शाऊलेरे सेवकेईं तैस सेइं ज़ोवं, “शुन, परमेशरेरी तरफां अक दुष्ट आत्मा तीं डराने लगोरीए। इश्शो मालिक अपने सेवकन ज़ैना हाज़र आन हुक्म दे, कि तैना कोन्ची ज़ै सैन्गी बज़ाने मां माहिर भोए तोपतां आन्न; ते ज़ैखन-ज़ैखन परमेशरेरे तरफां दुष्ट आत्मा तीं पुड़ एज्जे, तैखन-तैखन तै अपने हथेइं सेइं तैस बज़ाए, ते तू ठीक भोइ गास।” शाऊले अपने सेवकन सेइं ज़ोवं, “ठीके, अक ज़ै सैन्गी बज़ाने मां माहिर भोए, तैस मीं कां आनां।” तैखन एक्की जुवाने जुवाब दित्तो, “शुन, मीं बैतलहम नगरेरे यिशैरू अक मट्ठू लाहेरूए ज़ैन सैन्गी बज़ाते, ते तै बहादर योद्धा आहे, ते गल्लां केरने मां अक्लमन्दे ते बड़ो खूबसूरत भी आहे; ते यहोवा तैस सेइं साथी रहते।” तैखन शाऊले दूतां केरे ज़िरिये यिशै कां समाद भेज़ो, “अपनु मट्ठू दाऊद ज़ैन भैड्डां-छ़ेल्लन सेइं साथी रहते मीं कां भेज़।” तैखन यिशै रोट्टन सेइं लेदतां अक गधो, ते मसक भेरतां दाछ़रो रस, ते छ़ेल्लरो अक बच्चो नेइतां अपनु मट्ठे दाऊदेरे हथ्थे शाऊले कां भेज़ू। ते दाऊद शाऊले कां गेइतां तैसेरी सेवा केरने लगो। ते शाऊल तैस सेइं बड़ो प्यार केरने लगो, ते तै तैसेरो हथियार छ़ूंने बालो भोइ जेव। तैखन शाऊले यिशैरे लेई समाद भेज़ो, “दाऊदे मीं कां राने दे, किजोकि अवं तैस सेइं बड़ो खुश आईं।” ते ज़ैखन-ज़ैखन परमेशरेरी तरफां दुष्ट आत्मा शाऊले पुड़ एइती थी, तैखन-तैखन दाऊद सैन्गी नेइतां बज़ातो थियो; ते शाऊले आराम मैलतो थियो ते ठीक भोतो थियो, ते तै दुष्ट आत्मा तैस मरां निस्सी गाती थी।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.