Bhadrawahi Bible
1 राज़े 5
यहोवारे भवनेरी बनानेरी तियारी
ज़ैखन सोर नगरेरे राज़े हीरामे इन शुनू कि सुलैमान अभिषिक्त भोइतां अपने बाजी दाऊदेरी जगाई पुड़ राज़ो बनोरोए, त तैनी सुलैमाने कां अपने अधिकारी मैन्हु भेज़े, किजोकि दाऊदेरे ज़िन्दगी भर तै तैसेरो दोस्त बनोरो राव। सुलैमाने हीरामे कां ई समाद भेज़ो, “तीं पतोए, कि मेरो बाजी दाऊद अपने परमेशर यहोवारे नंव्वेरो अक भवन एल्हेरेलेइ न बनावेई बटो, कि तै च़ेवरे पासन लड़ैइन मां तांतगर उलझोरो राव, ज़ांतगर यहोवा तैसेरे दुश्मन तैसेरे पव्वन हैठ न केरि दित्ते। पन हुनी यहोवा परमेशरे मीं च़ेवरे पासां केरे दुश्मना केरे हमले करां आराम दित्तोरोए ते न कोई मेरे खलाफे, ते न कोई मीं पुड़ मुसीबत पेवरीए। मीं अपने परमेशर यहोवारे नंव्वेरो अक भवन बनानेरे लेई सोचतां रखोरूए, तैस गल्लरे मुताबिक ज़ै यहोवा मेरे बाजी दाऊदे सेइं ज़ोवरी थी, ‘तेरे मट्ठे ज़ैस अवं तेरे तखते पुड़ बिशालेलो, तैए मेरे नंव्वेरो भवन बनावालो।’ एल्हेरेलेइ हुनी तू मेरे लेई लबानोनेरां गैइड़ेरे बुट कटनेरो हुक्म दे, ते मेरे सेवक तेरे सेवकन सेइं साथी राले, ते ज़ै किछ मज़दूरी तू रखेलो, तैए अवं तेरे दासां केरे लेई देइलो, तीं त पतोए, कि सीदोनी लोकां केरे बराबर लकड़ी कटनेरो भेद इश्शे लोकन मां कोई भी न ज़ाने।”
सुलैमानेरी एना गल्लां शुन्तां, हीराम बड़ो खुश भोव, ते ज़ोने लगो, “यहोवारी तारीफ़ भोए, ज़ैनी अज़ दाऊदे तैस महान मुल्खे पुड़ राज़ केरनेरे लेई अक अक्लमन्द मट्ठू दित्तोरूए।” तैखन हीराम राज़े सुलैमान राज़े कांजो ई समाद भेज़ो, “ज़ै तीं मींजो समाद भेज़ोरोए तै मेरी समझ़ी मां एवरोए, गैइड़ ते सनोवरेरी लेकड़रे बारे मां ज़ैन किछ तू चातस, अवं तैन्ने केरेलो। मेरे दास लकड़ी लबानोने करां भूमध्य सागरे तगर पुज़ाले, फिरी अवं तैन केरे बेड़े बनेइतां भूमध्य सागरे मां रुड़वेइतां तैस ठारी पुड़ पुज़ालो; तैड़ी तैना बेड़े खोलतां अलग केरमेले, ते तैट्ठां तू नेइयां; ते अवं सिर्फ तीं करां इन चाताईं कि तू मेरे घरानेरे लेई खाने पीनेरी चीज़ां देइयां।” ते एन्च़रे सेइं हीराम राज़ो सुलैमान राज़ेरे मेर्ज़रे मुताबिक गैइड़ेरी ते सनोवरेरी लकड़ी देने लगो। ते सुलैमान राज़ो हीराम राज़ेरे घराने खानेरे लेई तैस 20000 टन गेहुं केरे अलावा लगभग च़ेवर लख लीटर ज़ैतूनेरो तेल दित्तो, एन्च़रां सेइं सुलैमान हीरामेरे लेई हर साल भेज़तो थियो।1 यहोवा सुलैमाने अपने वाधेरे मुताबिक अक्ल दित्ती, ते हीरामे ते सुलैमाने एप्पु मांमेइं मेल मिलाप बनोरो राव बल्के दूईयेईं एप्पु मांमेइं करार भी कियो।
सुलैमान राज़े पूरे इस्राएले मरां 30000 गुलाम मज़दूर कम्मे पुड़ लाए। ते तैन लबानोन पहाड़े पुड़ बैरी-बैरी सेइं हर महीने 10000 मैन्हु भेज़तो रहतो थियो ते अक महीनो तैना लबानोने मां ते दूई महीने घरे रहते थिये; ते गुलाम मज़दूरन पुड़ अदोनीराम पुछ़नो गन्नो रखोरो थियो। सुलैमाने कां 70000 भारो छ़ूंने बाले ते पहाड़े पुड़ 80000 बुट कटनेबाले ते घोड़ कढने बाले थिये। एनकेरां अलावा सुलैमाने कां 3300 खास मैन्हु थिये, ज़ैना कम केरनेबालन पुड़ प्रधान थिये। फिरी सुलैमान राज़ेरे हुक्मे सेइं बड्डे-बड्डे कीमती घोड़ एल्हेरेलेइ घड़ाई केरतां बनाए, कि भवनेरी बुनीयाद घड़ाई कियोरे घोड़ेईं सेइं दित्ती गाए। सुलैमान राज़ेरी कारीगिरेइं ते हीराम राज़ेरे कारीगिरेइं ते गबाली लोकेईं तैन घोड़ां केरि घड़ाई की, ते भवन बनानेरे लेई लकड़ी ते घोड़ तियार किये।
Source notes (1)
- Cross-reference प्रेरित. 12:20.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.