Bhadrawahi Bible
1 राज़े 6
भवन बनाव गानो
इस्राएली लोकां केरे मिस्र मुल्खे मरां निसनेरां 480 सालना बाद सुलैमान राज़ेरो इस्राएले पुड़ राज़ केरनेरो च़ेवरोवं साल थियो, तै जीव1 नंव्वे दूइयोवं महीने मां यहोवारो भवन बनाने लगो। ज़ै भवन सुलैमान राज़े यहोवारे लेई बनाव तैसेरी लम्बाई 60 हथ, ते चौड़ाई 20 हथ ते ऊँचाई 30 हथ थी। ते भवनेरे सामने अक ओसारो2 थियो तैसेरी लम्बाई 20 हथ थी, मतलब भवनेरी चोड़ाइअरे बराबर थी, ते तैस ओसारेरी चौड़ाई ज़ै भवनेरे सामने थियो, 10 हथ थी। फिरी तैनी भवने मां चुकाठ ते जाली लेइतां दैरी बनेई। ते तैनी भवनेरे आसे-पासे दिवारन सेइं लगोरे मन्दरेरे ते दर्शनेरी ठारी पुड़ दूईये दिवारां केरे आसे-पासे मंज़लां ते कमरे बनाए। सेभन करां बुन्हीं मंज़लरी चौड़ाई पंच़ हथ थी, ते मझ़ाटेरी छत शा हथ, ते बेइहीं छत सत हथ थी, किजोकि तैने भवनेरे आसे-पासे दिवारां बेइरीं पासे कुर्सीदार बनेवरी थी एल्हेरेलेइ कि केड़ी भवनेरी दिवारां ज़ुड़तां न भोन।
भवन एरे घोड़ां केरो बनाव जेव, ज़ैना तैड़ी आन्ने करां पेइले ट्लोड़तां ठीक किये जेवरे थिये, ते भवन बनाते बार हथोड़े, छिनी या कोन्ची किसमेरे लोंहेरे संदरां केरि आवाज़ भी न शुनोई।
बुनीयें कमरां केरू दार भवनेरे देइने पासे थियूं, ते लोक गोल पेवड़न पुड़ भोइतां मझ़ेटीं कमरे मां गाते थिये, ते तैन मरां बेइरीं कमरे मां गाते थिये। ते तैनी भवन बनेइतां पूरो कियो, ते तैसेरी छत गैइड़ेरे नग ते तखतन सेइं बनेवरी थी। ते पूरे भवने सेइं लेगोरी ज़ैना मंज़लां बनेवरी थी तैन केरि ऊँचाई पंच़ हथ थी, ते तैना गैइड़ेरी केड़ी केरे ज़िरिये भवने सेइं मिलेवरी थी।
तैखन यहोवा सुलैमाने सेइं ज़ोवं, “ऐह भवन ज़ै तू बनाने लगोरोस, अगर तू मेरे विधन पुड़ च़लेलो, ते मेरे नियमन मन्नेलो, ते मेरे हुक्मन पुड़ च़लतो ते तैन मन्तो रालो, ते ज़ै वाधो मीं तेरे बारे मां तेरे बाजी दाऊदे सेइं कियोरो थियो तैस अवं तेरे ज़िरिये पूरो केरेलो। ते अवं इस्राएली लोकां केरे दरमियान रेइयां केरेलो, ते अपने इस्राएली लोकन न शारेलो” ते सुलैमाने भवन बनेइतां पूरो कियो।3 तैनी भवनेरी दिवारन पुड़ एन्त्री पासे गैइड़ेरी तेख्ती लेई, ते भवनेरे फर्शे करां छती तगर दिवारन मां एन्त्री पासे तेख्ती लेई, ते भवनेरो फर्श तैनी सनोवर लेकड़रे तखतेईं सेइं बनाव। ते भवनेरे पेत्रीं पासे मां भी तैनी 20 हथ्थां केरि दूरी पुड़ फर्शे करां लेइतां दिवारन पुड़ बा तगर गैइड़ेरी तेख्ती लेई; एन्च़रे सेइं तैने परमपवित्र ठारारे लेई एक्की भवने मां अन्तर कमरो बनाव। परमपवित्र ठारारे सामने ज़ै बड्डो कमरो थियो तैसेरी लम्बाई 40 हथ थी। भवनेरी दिवारन पुड़ एन्त्री पासे गैइड़ेरी लेकड़री तेख्ती लेगोरी थी, ते तैस मां केलि ते फुलोरां फूड़ू केरि घड़ाई कियोरी थी, सारी गैइड़ेरी लकड़ी थी, घोड़ कोन्च न थिये लेइहोते। भवनेरे अन्तर तैनी अक पवित्र ठार यहोवारे करारेरो सन्दूख रखनेरे लेई तियार की। ते तैस पवित्र ठारारी लम्बाई, ते चौड़ाई ते ऊँचाई 20-20 हथ थी, ते सुलैमाने तैस पुड़ खालिस सोन्नू लेवरू थियूं, ते वेदरे च़ेवरे पासन गैइड़ेरी तेख्ती लेई। फिरी सुलैमाने भवनेरे एन्त्री पासे खालिस सोन्नू लुवावं, ते पवित्र ठारारे सामने सोन्नेरी शंगलां लेई; ते तैस भी सोन्नू पलैटावं। ते तैनी पूरे भवने सोन्नू पलेटतां तैसेरू कम पूरू कियूं। ते पवित्र ठारारे पूरे वेदी पुड़ भी सोन्नू पलैटावं।
ते पवित्र ठारी पुड़ तैनी 10-10 हथ उच्चे ज़ैतूनेरी लेकड़रे दूई करूब4 बनेइतां रख्खे। एक्की करूबेरू फंघोवं पंच़ हथ थियूं, ते तैसेरू दूइयोवं फंघोवं भी पंच़ हथ थियूं, एक्की फंघोवेरे एक्की पासेरां होरि फंघोवेरे होरि पासे तगर लम्बाई 10 हथ थी। दूइयोवं करूब भी 10 हथ थियो; दूईये करूब एक्की नापरे ते अक्कां ज़ेरे थिये। दूईये करूबां केरि ऊँचाई 10-10 हथ थी। तैनी करूब एन्त्री हिस्से मां रखावरे थिये; ते करूबां केरां फंघां एन्च़रे फैलोरां थियां, कि एक्की करूबेरू अक फंघोवं, एक्की दिवारी सेइं, ते दूइयोंवेरू दूइयोवं फंघोवं, दूइयोवं दिवारी सेइं लगोरू थियूं, फिरी तैन केरां दूई फंघां भवने मां एक्की होरि सेइं हुरतां थियां। तैनी करूबन पुड़ भी सोन्नू पलैटावं।
तैनी भवनेरे दिवारन पुड़ बेइरमेईं ते अन्तर च़ेवरे पासन करूब, खजूरेरे बुट्टां केरां फुलोरां फूड़ू घड़ाई केरतां बनेवरां थियां। भवनेरे अन्तर बेइर कमरेरे फर्शे तैन सोन्नू लुवावं।
पवित्र ठारी मांजो गानेरे लेई तैने ज़ैतूनेरी लेकड़रां दारां बनेवरां थियां, ते चुकाठ सिरहाने ते बाज़ू केरि बनावट पंच़ कून्न बाली थी। दूईये पल्ले ज़ैतूनेरे लेकड़रे थिये, ते तैने तैन मां करूब, खजूरेरे बुट ते फुलोरां फूड़ू घड़ाई केरतां बनावां ते सोन्ने सेइं पलैटू ते करूबन ते खजूरन पुड़ सोन्नू लुवेवरू थियूं।
एस्से तरीके सेइं तैनी भवने मां गानेरे लेई भी ज़ैतूनेरी लेकड़रे चुकाठेरे बाज़ू बनाए, एना चकोर थिये। दूईये दारां सनोवरेरी लेकड़रां थियां, ज़ैन मां एक्की दारेरे दूई पल्ले थिये, ते दूइयोवं दारेरे भी दूई पल्ले थिये, ज़ैना मुड़तां दोरहे बनते थिये। तैन पुड़ भी तैनी करूब ते खजूरेरे बुट्टां केरां फुलोरां फूड़ू घड़ाई केरतां बनेवरां थियां, ते तैन पुड़ सोन्नू लुवावं। तैनी एन्त्री अंगनेरे घेरेरे ट्लाई रद्दे घढ़ाई कियोरे घोड़ां केरे, ते अक रद्दो गैइड़ेरी लेकड़रो दित्तोरो थियो।
सुलैमानेरे राज़ केरनेरे च़ेवरोवं सालेरे जीव नंव्वेरे महीने मां यहोवारे भवनेरी मुनीयाद रख्खी जेई। ते सुलैमानेरे राज़ केरनेरे यारोवं साले बूल5 नंव्वेरे अठोवं महीने मां, तैस भवने मां तैन सब ज़ैन ज़रूरी थियूं बेनि जेवं। एस तरीके सेइं सुलैमाने तैस बनाने मां सत साल लगे।
Source notes (5)
- Footnote जीव ई महीनो अध्धे अप्रैले ते अध्धे मेई महीनेरे दरमियान भोते।
- Footnote ओसारो बड्डो कमरो
- Cross-reference प्रेरित. 7:47.
- Footnote करूब ई जानदार फंघन बालो भोतो थियो ज़ै परमेशरेरे हज़ूरी हिराते।
- Footnote बूल इन कनानी लोकां केरे महीनेरू नंव्वे ज़ै अकतूबर ते नवंबरे महीने दरमियाने भोतो थियो।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.