Bhadrawahi Bible
1 राज़े 4
सुलैमानेरे अधिकारी
सुलैमान राज़ो सारे इस्राएले पुड़ राज़ केरने लगो। तैसेरे अधिकारी इना थिये, सादोकेरू मट्ठू अजर्याह याजक, ते शीशारां मट्ठां एलीहोरोप ते अहिय्याह अधिकारी थिये। ते अहीलूदेरू मट्ठू यहोशापात, इतिहास लिखने बालो थियो। यहोयादारू मट्ठू बनायाह प्रधान सेनापति थियो, ते सादोक ते एब्यातार याजक थिये! ते नातानेरू मट्ठू अजर्याह भण्डैरी केरो प्रधान थियो, ते नातानेरू मट्ठू जाबूद याजक ते राज़ेरो सलाहकार भी थियो। अहीशार मेहलेरो देखभाल केरनेबालां केरो प्रधान थियो, ते अब्दारू मट्ठू अदोनीराम गुलाम मज़दूरन पुड़ अधिकारी थियो।
ते इस्राएल मुल्खे मरां सुलैमानेरे 12 हाकिम थिये, ज़ैना राज़ेरे ते तैसेरे घरानेरे लेई खानेरी चीज़ां केरो इंतज़ाम केरते थिये। तैन मरां हर अक हाकिम हर साल अपने-अपने ठहरावरे महीने मां इंतज़ाम केरतो थियो। तैन केरां नंव्वां इनां थियां, एप्रैमेरे पहाड़ी इलाके मां बेन्हूर। ते माकस, शाल्बीम, बेतशेमेश ते एलोन-बेतानान नगरन मां बेन्देकेर थियो। अरुब्बोत नगरे मां बेन्हेसेद ज़ेसेरे अधिकारे मां सोको ते हेपेर नगरां केरे सारे इलाको थिये। दोर ज़िलेरे सारे उच्चे इलाके मां बेन-अबीनादबेरी कौन्श सुलैमानेरी कुई तापत थी। अहीलूदेरू मट्ठू बाना ज़ेसेरे अधिकारे मां तानाक, मगिद्दो, ते बेतशानेरो तै सारो इलाको थियो, ज़ै सारताने कां ते यिज्रेल नगरेरे बुन ते बेतशानेरे आबेल-महोला नगरे तगर मतलब ज़ै योकमाम नगरेरे उस पासे तगरे। ते गिलाद प्रदेशेरे रामोत नगरे मां बेनगेबेर थियो, ज़ेसेरे अधिकारे मां मनश्शेई याईरे गिलादेरां ड्लाव्वां थियां, मतलब एसेरे अधिकारे मां बाशानेरे अर्गोबेरो इलाको थियो, ज़ैस मां शहरपनाहरे फाटकन मां पितलरी छड़हां लेगोरी थी, ते तैस मां 60 बड़े-बड़े नगर थिये। इद्दो एरे मट्ठे अहीनादाबेरे अधिकारे मां महनैम नगर थियूं। नप्ताली प्रदेशे मां अहीमास थियो, ज़ैनी सुलैमानेरी एक्की कुइये सेइं ड्लाह बनेवरो थियो ज़ेसेरू नवं बासमत थियूं। आशेर प्रदेश ते आलोत नगरे मां हूशैरू मट्ठू बाना, इस्साकार प्रदेशे मां पारुहेरू मट्ठू यहोशापात, ते बिन्यामीन प्रदेशे मां एलारू मट्ठू शिमी थियूं। ऊरी एरू मट्ठू गेबेर गिलाद प्रदेशे मां मतलब एमोरी लोकां केरे राज़े सीहोन ते बाशानेरे राज़े ओगेरे मुल्खे मां थियो, एस सारे मुल्खे मां तैए अधिकारी थियो। यहूदा ते इस्राएलेरे लोक बड़े थिये, तैना समुन्दरेरे रेतरे ज़ेरे बड़े थिये, ते खाते-पीते ते आनन्द केरते राए।
सुलैमान त फरात बड्डे दरियाए करां लेइतां पलिश्ती केरे प्रदेश, ते मिस्र मुल्खेरे सरहद्दी तगर सारे रियासतन पुड़ हुकूमत केरतो थियो ते तैट्ठेरे लोक ज़िन्दगी भर सुलैमाने कां तोफे आनते थिये, ते तैसेरे अधीन रहते थिये।
सुलैमाने एक्की दिहाड़ेरे लेई लगभग 3000 किल्लो मैदो ते 6000 किल्लो अट्टू लगतू थियूं, दश पालोरे दांत ते चरागान मरां 20 दांत, ते 100 भैड्डां छ़ेल्ली ते इन केरे अलावा हिरन, चिकारे, यखमूर, ते पालोरां च़ुड़ोलू। किजोकि फरात दरियारे इस पासेरे सारे मुल्खे पुड़ तिप्सह नगरे करां लेइतां गाज़ा नगरे तगर ज़ेत्रे राज़े थिये, तैन सेभन पुड़ सुलैमान राज़ केरतो थियो, ते अपने च़ेवरे पासां केरे सब रानेबालन सेइं मेल रखतो थियो। सुलैमान राज़ेरे ज़िन्दगी मां यहूदी ते इस्राएली दान नगरे करां लेइतां बेर्शेबा नगरे तगर सुखे सेइं रहते थिये, हर मैन्हु अपने-अपने दाछ़न हैठ ते फैगेरे बुट्टन हैठ निडर रहतो थियो। ते सुलैमाने कां रथ्थेरे घोड़ां केरे लेई 40000 घुड़साल थिये, ते तैसेरे 12000 घोड़ सुवार थिये। ते तैना 12 अधिकारी अपने-अपने महीने मां सुलैमान राज़ेरे लेई ते ज़ेत्रे तैसेरे मेज़े पुड़ खाते थिये, तैन सेभी केरे लेई खानेरो इंतज़ाम केरते थिये, ते कोन्ची भी चीज़री कमी न थी भोती। घोड़ां ते तेज़ दौड़ाने बाले घोड़ां केरे लेई जौ ते भूंस ज़ैड़ी ज़रूरत भोती थी तैड़ी हुक्मेरे मुताबिक अक-अक मैन्हु पुज़ातो थियो।
ते यहोवा सुलैमाने अक्ल दित्ती, ते तैसेरी समझ़ बड़ी बधाई, ते तैसेरे दिले मां समुन्दरेरे रेतरे ज़ेरे बेशुमार गुण दित्ते। ते सुलैमानेरी अक्ल पूरब मुल्खेरे सारे रानेबाले ते मिस्री केरि अक्ली करां भी जादे अक्ल थी। तै त तैन सब मैन्हन करां बल्के एतान, एज्रेही ते हेमान, ते माहोलेरे मट्ठे कलकोल, ते दर्दा करां भी जादे अक्लमन्द थियो ते तैसेरी मुशूरी च़ेवरे पासां केरे सब कौमन मां फैली जेई। तैनी 3000 कहावतां1 ज़ोई, ते तैसेरां 1005 गीतां भी आन। फिरी तैनी लबानोन मुल्ख गैइड़न करां लेइतां दिवारी मां लगते जूफान तगर सारे बुट्टां केरि चर्चा ते जानबरन ते च़ुड़ोलन ते पेटेरे भारे च़लनेबाले जीपां ते मेछ़ली केरि चर्चा की। एल्हेरेलेइ मुल्खे-मुल्खेरे लोक दुनियारे राज़ां केरे तरफां ज़ैनेईं सुलैमानेरी अक्लरी मुशूरी शुनोरी थी, तैसेरी अक्लरी गल्लां शुन्नेरे लेई एइते थिये।
Source notes (1)
- Footnote कहावतां कहावतां केरि किताबी मां सिर्फ किछे कहावतन, बाकी कहावतां नष्ट भोवरिन।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.