Bhadrawahi Bible
1 राज़े 3
अक्लरे लेई सुलैमानेरी प्राथना
फिरी सुलैमान राज़े मिस्र मुल्खेरे राज़े फ़िरौनेरी कुई ड्लाही ते तैसेरो ज़माई बनो, ते तैनी तै दाऊदपुरे मां एन्हतां ज़ांतगर अपनो मेहल ते यहोवारो भवन ते यरूशलेम नगरेरी च़ेवरे पासां केरि दिवार न बनवाई, तांतगर तै तैड़ी रख्खी। तैस वक्ते तगर यहोवारे नंव्वेरो कोई भवन न थियो बनोरो एल्हेरेलेइ इस्राएली लोक उच्ची ठैरी गेइतां बलि च़ाढ़ते थिये।
सुलैमान यहोवा सेइं प्यार केरतो थियो ते अपने बाजी दाऊदेरे विधन पुड़ च़लतो त राव, पन उच्ची ठारन पुड़ बलि भी च़ाढ़तो राव ते गुग्गल भी बालतो थियो। एक्सां सुलैमान राज़ो गिबोन नगरे जो बलि च़ाढ़ने जेव, किजोकि तैए खास उच्ची ठार थी, तैखन तैड़ी वेदी पुड़ सुलैमाने 1000 होमबलि च़ैढ़ी।
गिबोन नगरे मां यहोवा तैस्से राती सुपने मां सुलैमाने दर्शन देइतां ज़ोवं, “ज़ैन किछ तू चातस कि अवं तीं देईं, तैन मग।” सुलैमाने जुवाब दित्तो, “तू अपने दास मेरे बाजी दाऊदे पुड़ अपनि बड़ी दया केरतो राव, किजोकि तै अपनो आप तेरे सामने रेखतां तीं सेइं सच़्च़ैई ते धार्मिकताई ते साफ मने सेइं च़लतो राव; ते तीं एड़ी तगर तैस पुड़ दया कियोरी थी कि तैस तैसेरे तखते पुड़ बिशने बालू अक मट्ठू दित्तू, ज़ेन्च़रे अज़ आहे। ते हुनी हे मेरे परमेशर यहोवा! तीं अपनो दास अवं मेरे बाजी दाऊदेरी ठैरी पुड़ राज़ो बनेवरोइं, पन अवं निकड़ू मट्ठू आईं ज़ैस नईं पतो कि केन्च़रे राज़ केरे। फिरी तेरो दास तेरे च़ुनोरे बड़े लोकां केरे दरमियान, ज़ैन केरि गिनती हछ्छे भोनेरे वजाई सेइं न भोइसखे। तू अपने दासे अपने लोकां केरो न्याय केरनेरे लेई समझ़नेरी एरी शक्ति दे, कि अवं भले बुरेरी पिशान केरि सेखी; किजोकि कौन एरहो आहे कि ज़ै तेरे एत्रे लोकां केरो न्याय केरि सके?” एस गल्ली सेइं प्रभु यहोवा खुशी भोव, कि सुलैमाने एरू वरदान मग्गु। तैखन परमेशरे तैस सेइं ज़ोवं, “एल्हेरेलेइ कि तीं एरू वरदान मग्गु, कि न त लम्मी उमर ते न दौलत ते न अपने दुशमनां केरो नाश मगोरोए, पन समझ़नेरे लेई ज़मीरेरू वरदान मगोरूए, एल्हेरेलेइ शुन, अवं तैन्ने केरेलो, ज़ैन तीं मगोरूए, अवं तीं अक्लमन्द ते समझ़ने बालो मन देताईं, इड़ी तगर कि तेरो ज़ेरो न त पेइलो कोई भोव, ते न कोई तेरे बाद भोल्हो। इसेरे अलावा ज़ैन किछ तीं मगोरूए, मतलब दौलत ते इज़्ज़त, तै भी अवं तीं एत्री देताईं कि तेरी ज़िन्दगी भर कोई राज़ो तेरो ज़ेरो न भोल्हो। फिरी अगर तू अपने बाजी दाऊदेरो ज़ेरो मेरी बत्तन पुड़ च़लतो रालो, ते मेरे विधन ते हुक्मन मनतो रालो त अवं तीं लम्मी उमर देइलो।”
तैखन सुलैमान बींझ़ो; ते हेरते कि एन सुपनु थियूं; फिरी तै यरूशलेम नगरे जो जेव, ते यहोवारे करारेरे सन्दूखे कां खड़े भोइतां होमबलि ते मेलबलि च़ैढ़ी, ते अपने सारे अधिकैरन धाम दित्ती। एक्सां एरू भोवं कि दूई वेश्या कौन्शां राज़े कां एइतां खेड़ि भोइ। तैन मरां अक कौन्श ज़ोने लगी, “हे मेरे मालिक! अवं ते ई कौन्श एक्की घरे मां रैतिम; ते एस सेइं साथी घरे रहते मीं अक बच्चो भोव। फिरी मेरे बच्चे ज़र्मनेरे किछ दिहाड़ना बाद एस कौन्शी भी अक बच्चो भोव; असां त एक्की जगाई रैती थी, इश्शी दूईयां केरे अलावा होरो कोई घरे मां न थियो। पन एक्की राती एस कौन्शां अपनो बच्चो ढ्लन्च़ो ते तै बच्चो मेरि जेव। तैखन एस कौन्शां अध्धे राती खड़े उठतां, ज़ैखन अवं तेरी दासी झ़ुलोरी थी, एसां मेरो बच्चो नेइतां एप्पु कां रख्खो ते अपनो मरोरो बच्चो मीं कां लेटाव। झ़ेझ़ां ज़ैखन अवं अपने बच्चे दुद्ध पीयानेरे लेई उठी, तैखन बच्चो मरोरो मैल्हो; पन झ़ेझ़ां मीं ध्याने सेइं हेरू, त पतो च़लो कि तै मेरो बच्चो नईं।” तैखन होरी कौन्श ज़ोने लगी, “नईं ज़ींतो बच्चो मेरो आहे, ते मरोरो तेरूए।” पन तै ज़ोती राई, “नईं मरोरो बच्चो तेरोए ते ज़ींतो बच्चो मेरोए” एन्च़रे सेइं तैना राज़ेरे सामने बेंस केरती रेई।
इन शुन्तां राज़े ज़ोवं, “अक त ज़ोतीए ‘ज़ींतो बच्चो मेरोए, तै मरोरो बच्चो तेरो आहे।’ ते होरी ज़ोतीए, ‘नईं मरोरो तेरोए, ते ज़ींतो मेरो आहे।’” फिरी राज़े एक्की सेवके हुक्म दित्तो, “मीं कां अक तलवार आन।” ते तैनी अक तलवार राज़ेरे सामने आनी। तैखन राज़े हुक्म दित्तो, “ज़ींतो बच्चो केटतां दूई हिस्से बनाथ ते दूईयन अक-अक हिस्सो देथ।” पन ज़ींते बच्चेरी अम्मरो दिल प्यारे सेइं भेरोई जेव, एल्हेरेलेइ तैसां राज़े सेइं ज़ोवं, “हे मेरे मालिक! ज़ींतो बच्चो एस्से कौन्शी देथ; पन एस बच्चे न मार।” होरी कौन्श ज़ोने लगी, “तै न मीं लोड़े ते न तीं, तैसेरे दूई टुक्ड़े किये गान।” तैखन राज़े ज़ोवं, “एस बच्चे न मारा, पेइली कौन्शी ज़ींतो बच्चो देथ; किजोकि तैसेरी अम्मा ऐह आहे।” ज़ै न्याय राज़े कियोरो थियो, तैसेरी खबर सारे इस्राएली लोकन मां फैली जेई, ते तैनेईं राज़ेरी बड़ी आदर की, किजोकि तैन्न इस गल्लरो एसास भोव, कि तैसेरे मने मां न्याय केरनेरे लेई परमेशरेरी अक्ले।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.