Bhadrawahi Bible
1 राज़े 14
यारोबामेरे घरानेरो न्याय
किछ वक्तेरां बाद यारोबाम राज़ेरू मट्ठू अबिय्याह बिमार भोइ जेवं। तैखन यारोबामे एपनी कौन्शी सेइं ज़ोवं, “एरू रूप बना कि कोई तीं पिशैनी न सके कि ऐह यारोबामेरी कौन्शे, ते शीलो नगरे मांजो गा, तैड़ी अहिय्याह नबी रहते तैनी मीं सेइं ज़ोवरू थियूं, ‘तू इन इस्राएली लोकां केरो राज़ो बनेलो।’ तू तैसेरे लेई दश रोट्टी, ते किछ टिकी ते एक्की भांडे मां माछ़ी साथी नेइतां गा, ते तै तीं सेइं ज़ोलो कि मट्ठे सेइं कुन भोल्हु।”
एल्हेरेलेइ यारोबाम राज़ेरी कौन्शां तैन्ने कियूं, ते च़लती-च़लती तै शीलो नगरे मां पुज़्ज़ी ते अहिय्याहेरे घरे पुज़्ज़ी: ते अहिय्याह त थोड़ू-थोड़ू लेइहोतू थियूं, किजोकि बुढापेरी वजाई सेइं तैसेरी एछ़्छ़ी केरि लौ घेटी जेवरी थी। ते यहोवा अहिय्याह सेइं ज़ोवं, “शुन यारोबामेरी कौन्श तीं कां अपने मट्ठेरे बारे मां ज़ैन बिमारे किछ पुछ़ने एवरीए, ते तू तैस सेइं इना गल्लां ज़ोइयां; किजोकि तै अपनु रूप बेदलतां एज्जेली।”
ज़ैखन अहिय्याहे दारे मां तैसारे पव्वां केरि छ़ेड़ शुनी तैखन तैनी ज़ोवं, “हे यारोबामेरी कौन्शे! अन्तर एई; तीं किजो अपनु रूप बदलोरू आहे? मीं तेरे लेई बुरी खबर मैल्होरीए। तू वापस घरे गेइतां यारोबामे सेइं ज़ो कि इस्राएलेरो परमेशर यहोवा तींजो एन ज़ोते, ‘मीं त तू लोकन करां बेद्धतां अपने इस्राएली लोकां केरो प्रधान बनाव, ते दाऊदेरे घरानेरू राज़ थुसोड़तां तीं दित्तू, पन तू मेरे दास दाऊदेरो ज़ेरो न निस्सो ज़ै मेरे हुक्म मनतो थियो, ते अपने पूरे मने सेइं मीं पत्पती च़लतो थियो, सिर्फ तैन्ने केरतो थियो ज़ैन मेरी नज़री मां ठीके। ज़ैना तीं करां पेइले राज़े थिये तीं त तैन करां बेद्धतां बुराई की, ते गेइतां देबतां केरि पूज़ा की ते मूरती ढैलतां बनावेई, ज़ैस सेइं तीं अवं सरकाव ते तीं अवं पिठी पत्र छ़डो। एस्से वजाई सेइं अवं यारोबामेरे घराने पुड़ मुसीबत छ़डेलो, बल्के अवं यारोबामेरे कुले मरां हर एक्की नर मैन्हु चाए तै इस्राएले मां गुलाम भोए या आज़ाद अवं तैस नाश केरेलो: ते ज़ेन्च़रे कोई गोबरे तांतगर कढतो रहते ज़ांतगर सब कढो न गाए, तेन्च़रे अवं यारोबामेरे घरानेरी सफाई केरेलो। यारोबामेरे घरानेरो ज़ै कोई नगरे मां मेरि गालो, तैस कुतरां खालां; ते ज़ै मैइदाने मां मरेलो, तैस इल्लां-कंव्वां खालां; किजोकि यहोवा एन ज़ोवरूए।’ एल्हेरेलेइ हुनी तू उठ ते अपने घरे जो गा, ते नगरे मां गाते तेरू मट्ठू मेरि गालू। तैस त सारे इस्राएली छाती पिटतां दबेले, यारोबामेरी औलादी मां सिर्फ तैस्से कब्र मैल्हेली: किजोकि यारोबामेरे घराने मां सिर्फ अक्के तैए ज़ै इस्राएलेरे परमेशर यहोवारी नज़री मां भलोए। फिरी यहोवा इस्राएलेरे लेई अक एरहो राज़ो खड़ो केरेलो ज़ै तैस्से दिहाड़े यारोबामेरे घरानेरो नाश केरेलो, पन कताली? इन हुन्ना भोल्हु। किजोकि यहोवा इस्राएले एन्च़रे मारेलो, ज़ेन्च़रे बगते पैनी मां निराठी हिलतीए, ते तै तैन इस रोड़ी ज़मीनी मरां ज़ै तैन केरे दादे-पड़दादन दित्तोरी थी, ज़ीलना पुटतां फरात दरियारे पार तितर-बितर केरतां छ़डेलो; किजोकि तैनेईं अशेरा देबरी मूरती अपने लेई बनेइतां यहोवा परमेशर सरकावरो थियो। तैन पापां केरि वजाई सेइं ज़ैना यारोबामे किये ते इस्राएली लोकन करां कराए, यहोवा इस्राएले शारेलो।”
तैखन यारोबामेरी कौन्श तैट्ठां उठतां च़ली ते तिर्सा नगरे जो अई, ते ज़ेरो तैसां घरेरी खुरनी मां पव रख्खो त तैन मट्ठू मेरि जेवं। तैखन यहोवारे वचनेरे मुताबिक ज़ैन तैनी अपने दास अहिय्याह नेबेरे ज़िरिये ज़ोवरू थियूं, सारे इस्राएली लोकेईं तै देबतां तैसेरे लेई मातम कियो। यारोबामे होरां बड़ां कम्मां कियां। तैनी जंग लड़ी ते केन्च़रे राज़ कियूं, तैन सब इस्राएलेरी राज़ां केरे इतिहासेरी किताबी मां लिखेरूए। यारोबाम इस्राएले पुड़ 22 साल राज़ केरतां मेरि जेव, ते अपने दादां-पड़दादां केरो ज़ेरो मेरि जेव, ते तैसेरू मट्ठू ज़ेसेरू नवं नादाब थियूं तैसेरी जगाई पुड़ राज़ केरने लगू।
रहबामेरू राज़
सुलैमान राज़ेरू मट्ठू रहबाम यहूदा प्रदेशे मां राज़ केरने लगू। ज़ेइस तैन राज़ केरने लगू तेइस तैसेरी उमर 41 साल थी; ते यरूशलेम नगर ज़ैन यहोवा सारे इस्राएली गोट्लन मरां अपनु नवं रखनेरे लेई च़ुनोरू थियूं, तैन नगरन मां तै 17 साल राज़ केरतो राव; ते तैसेरी अम्मरू नवं नामाह थियूं, ते तै अम्मोनी कौन्श थी। ते यहूदारे लोकेईं यहोवारे नज़री मां बुराई की, ते तैन केरे पापां केरि वजाई सेइं ज़ैना तैन केरे दादे-पड़दादेईं कियोरे थिये: तैन करां जादे थिये, तैनेईं यहोवारी सरक भड़काई। तैनेईं त तैन उच्ची पहैड़न पुड़, ते सारे सब्ज़ बुट्टन हैठ मूरती ते अशेरा देबरी मूरती बनावेई। ते तैन केरे मुल्खे मां पुरुषगामी भी थिये, तैना तैन कौमां केरां सब भिट्टां कम्मां केरते थिये ज़ैना कौमां यहोवा इस्राएली केरे सामनेरां कढोरी थी।
रहबाम राज़ेरे पंच़ोंव साले मां मिस्र मुल्खेरे शीशक राज़े, यरूशलेम नगरे पुड़ हमलो केरतां, यहोवारे भवनेरी कीमती चीज़ां ते राज़ेरे मेहलेरी सैरी कीमती चीज़ां नेइ; ते सुलैमाने ज़ैना सोन्नेरी ढालां बनेवरी थी, सैरी नेइ। एल्हेरेलेइ रहबाम राज़े तैन केरे बदले पितलरी ढालां बनावेई ते तैना पहरेदारां केरे प्रधान्न दित्ती, ज़ैना राज़ेरे मेहलेरे फाटके पुड़ पहरो देते थिये। ते ज़ैखन-ज़ैखन राज़ो यहोवारे भवने मां गातो थियो, तैखन तैना सिपाही तैन ढालन छ़ुइतां साथी च़लाते थिये, ते फिरी तैना वापस एन्हतां हथियारां केरे ज़खीरे मां रेखी देते थिये।
रहबामे ज़ैना कम्मां कियोरां थियां तैना सब यहूदारे राज़ां केरि इतिहासेरी किताबी मां लिखोरन। रहबामे ते यारोबामे त हमेशा लड़ाई भोती राई। ते रहबाम अपने दादे-पड़दादां केरो ज़ेरो मेरि जेव, ते दाऊदपुरे मां तै शाही कब्री मां दब्बो जेव, ते तैसेरी अम्मरू नवं नामाह थियूं, ते तै अम्मोन मुल्खेरी रानेबाली थी, ते तैसारू मट्ठू अबिय्याम तैसेरी जगाई पुड़ राज़ केरने लगू।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.