Bhadrawahi Bible
1 राज़े 15
अबिय्यामेरू राज़
नबातेरे मट्ठे यारोबामेरे इस्राएल मुल्खे पुड़ राज़ केरनेरे अठारोवं साले मां अबिय्याम यहूदा प्रदेशे पुड़ नंव्वो राज़ो बनो। ते तैनी ट्लाई साल यरूशलेम नगरे मां राज़ कियूं। तैसेरी अम्मरू नवं माका थियूं, ते ज़ै अबशालोमेरी कुई थी। तैनी तैना सारे पाप किये, ज़ैना तैस करां पेइले तैसेरे बाजे कियोरे थिये, ते तैसेरो मन अपने परमेशर यहोवारे पासे अपने पड़दादे दाऊदेरो ज़ेरो वफादार न थियो। पन फिरी भी दाऊदेरे वजाई सेइं यहोवा परमेशरे यरूशलेम नगरे मां तैस अक दीयो दित्तो, मतलब तैसेरे बाद तैसेरू मट्ठू राज़ो बनाव ते यहोवा परमेशरे यरूशलेम नगर बरकरार रख्खू। किजोकि दाऊद तैन्ने केरतो थियो, ज़ैन यहोवारे नज़री मां ठीक भोतू थियूं, ते तै हित्ती ऊरिय्याह1 मारानेरां अलावा होरी कोन्ची गल्ली मां यहोवारे कोन्ची हुक्मे करां ज़िन्दगी भर भी कधी न मुड़ो। रहबाम ते यारोबामेरी ज़िन्दगी भर तैन केरे दरमियान लड़ाई भोती राई। अबिय्यामेरां बाकी सब कम्मां ज़ैना तैनी एपनी ज़िन्दगी मां कियोरां थियां, तैना यहूदारे राज़ां केरि किताबी मां लिखोरन। ते अबिय्यामेरी यारोबामे सेइं लड़ाई भोती राई। अबिय्याम अपने दादे-पड़दादां केरो ज़ेरो मेरि जेव, ते तै दाऊदपुरे मां दब्बो जेव, ते तैसेरू मट्ठू आसा तैसेरी जगाई पुड़ राज़ो बनू।
आसारू राज़
इस्राएलेरे राज़े यारोबामेरे राज़ केरनेरे बिहोवं साले मां आसा यहूदा प्रदेशे पुड़ राज़ो बनो; तैनी यरूशलेम नगरे मां 41 साल राज़ कियूं, ते तैसेरी दैदरू नवं माका थियूं, ज़ै अबशालोमेरी कुई थी। ते आसा तैन कम कियूं ज़ैन यहोवारी नज़री मां ठीक थियूं, ज़ेन्च़रे तैसेरे पूर्वज दाऊदे कियोरू थियूं। तैनी पुरुषगामी लोक मुल्खे मरां कढे, ते ज़ेत्री मूरती तैसेरे दादे-पड़दादेईं बनेवरी थी, तैना सब तैनी मुल्खे मरां दूर केरतां छ़ेडी। बल्के तैसेरी अम्मा माका ज़ैसां अशेरा देबरे लेई अक भिट्टी मूरती बनेवरी थी तैने तै राजमातारे पदे करां ओसाली, ते आसा तैसेरी मूरती कट्टी ते किद्रोनेरे नाले मां फुक्की। पन मूरती केरि उच्ची ठारां बिछ़ोड़ी न जेई, पन फिरी भी आसा एपनी ज़िन्दगी भर पूरे तरीके सेइं यहोवारे लेई वफादार राव। ते ज़ैन सोन्नू चाँदी ते ज़ैना चीज़ां तैसेरे बाजे अर्पण कियोरी थी, तैना सब तैनी यहोवारे भवने मां एन्हीं।
आसा ते इस्राएलेरे राज़े बाशारे दरमियान ज़िन्दगी भर लड़ाई भोती राई। इस्राएलेरे राज़े बाशा यहूदा प्रदेशे पुड़ हमलो कियो, ते रामाह नगरेरी मरम्मत की, कि कोई यहूदारे राज़े आसा कां एज्जी गेइ न सके। तैखन आसा राज़े ज़ेत्रू सोन्नू चाँदी यहोवारे भवने मां ते राज़ेरे मेहलेरे गुदामे मां राहोरू थियूं, तैन सब केढतां अपने सिपेही केरे हथ्थे सौंफतां दमिश्क नगरे मां रानेबाले अरामेरे राज़े बेन्हददे कां ज़ैन हेज्योनेरू पोट्लड़ू तब्रिम्मोनेरू मट्ठू भेज़तां एन ज़ोवं, “ज़ेन्च़रे मेरे ते तेरे बाजी केरे दरमियाने मां तेन्च़रे तेरे ते मेरे दरमियाने मां अक करार कियो गाए: हेर, अवं तीं कांजो सोन्ने चैंदरी भेंट भेज़ताईं, एल्हेरेलेइ तू एई, इस्राएलेरे राज़े बाशा सेइं अपनो कियोरो करार ट्लोड़, कि तै मीं करां च़लो गाए।” आसा राज़ेरी ऐह गल मेनतां बेन्हदद राज़े अपने सेनां केरे प्रधान्न करां इस्राएली नगरन पुड़ हमलो करावेइतां इय्योन, दान, आबेल्वेत्माका नगरां ते सारू किन्नेरेत ते नप्ताली एरहो सारो प्रदेश ज़ींतो। एन शुन्तां बाशा राज़े रामाह नगरेरी मरम्मत केरनी बन्द केरि छ़डी, ते तिर्सा नगरे मां राने लगो। तैखन आसा राज़े सारे यहूदा प्रादेशे मां प्रचार कराव कि कोई एरहो न राए ज़ैने न शुनोरू भोए, तैखन तैनी रामाह नगरेरे घोड़ ते लकड़ी ज़ैन सेइं बाशा नगरेरी मरम्मत केरि राहोरो थियो, ते तैनी सेइं आसा राज़े बिन्यामीन प्रदेशेरे गेबा ते मिस्पा नगरां केरि भी मरम्मत की। ते आसा राज़ेरां बाकी कम्मां ते तैसेरी बहादरी ते ज़ैन किछ तैनी कियोरू थियूं, ते ज़ैन नगरां केरि मरम्मत कियोरी थी, एन सब किछ यहूदारे राज़ां केरि इतिहासेरी किताबी मां लिखेरूए। पन तैसेरे बुढापे मां तैस पव्वां केरि बिमारी लगी। ते आसा राज़ो अपने दादे-पड़दादां केरो ज़ेरो मेरि जेव, ते तै पूर्वज दाऊदपुरे मां दब्बो जेव, ते तैसेरू मट्ठू यहोशापात तैसेरी जगाई पुड़ राज़ केरने लगू।
नादाबेरू राज़
यहूदारे राज़े आसारे राज़ केरनेरे दूइयोवं साले मां यारोबामेरू मट्ठू नादाब इस्राएलेरो राज़ो बनो; ते तैनी दूई साल राज़ कियूं। तैनी तैन कम कियूं ज़ैन यहोवारी नज़री मां बुरू थियूं, ते अपने बाजी केरो ज़ेरो तैए पाप केरतो ते तेरहो ज़ेरो च़लतो राव, ज़ै तैनी इस्राएले करां करेवरो थियो।
नादाब सारे इस्राएली लोकन समेत पलिश्ती केरे मुल्खेरू गिब्बतोन नगर घेरोरू थियूं। ते इस्साकारे गोट्लेरे अहिय्याहेरे मट्ठे बाशा तैसेरे खलाफ बगावत केरतां गिब्बतोन नगरेरे नेड़े तै मारो। एन्च़रे सेइं यहूदारे राज़े आसारे राज़ केरनेरे ट्लेइयोवं साले मां बाशाए नादाब मारो, ते तैसेरी जगाई पुड़ राज़ो बनो। बाशा राज़ो बनते यारोबामेरे घरानेरे सारे मैन्हु मारे ते कोई भी ज़ींतो न राव। एन सब यहोवारे तैस वचनेरे मुताबिक भोवं, ज़ैन तैनी अपने दास शीलो नगरे मां रानेबाले अहिय्याहेरे ज़िरिये ज़ोवरू थियूं। एन एस वजाई सेइं भोवं कि यारोबामे एप्पु पापे किये, ते इस्राएली लोकन करां भी करावरे थिये, ते तैनी इस्राएलेरो यहोवा परमेशर सरकावरो थियो।
नादाबेरां बाकी सब कम्मां ज़ैना तैनी कियोरां थियां, तैना सब इस्राएलेरे राज़ां केरि इतिहासेरी किताबी मां लिखोरन। यहूदारे आसा राज़े ते इस्राएलेरे राज़े बाशारे दरमियाने मां त तैन केरे ज़िन्दगी भर लड़ाई भोती राई।
बाशारू राज़
यहूदारे राज़े आसा राज़ केरनेरे ट्लेइयोवं साले मां अहिय्याहेरू मट्ठू बाशा, तिर्सा नगरे मरां रेइतां इस्राएल मुल्खे पुड़ राज़ केरने लगू, ते तैनी 24 साल राज़ कियूं। बाशा तैन कम कियूं, ज़ैन यहोवारी नज़री मां बुरू थियूं, ते यारोबामेरो ज़ेरो तैए पाप केरतो राव, ज़ै तैनी इस्राएली लोकन करां करेवरो थियो।
Source notes (1)
- Footnote हित्ती ऊरिय्याह ई बतशेबारो पेइलो मुन्श थियो 2 शमू. 11:1-27.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.