Bhadrawahi Bible
1 राज़े 13
परमेशरेरे नेबेरो सन्देश
एक्सां यहोवारे हुक्मेरे मुताबिक परमेशरेरो अक नबी यहूदा प्रदेशे मरां निस्तां बेतेल नगरे मां अव, ते यारोबाम गुग्गल बालनेरे लेई वेदी कां खड़ो थियो। तै नबी यहोवारे हुक्मेरे मुताबिक वेदरे खलाफ ज़ोरे सेइं ज़ोने लगो। “वेदी, हे वेदी! यहोवा इन ज़ोते, कि शुन, दाऊदेरे खानदाने मां योशिय्याह नंव्वेरू अक मट्ठू पैदा भोल्हु, तै तैन उच्ची ठारां केरे मन्दरां केरे याजक लोक ज़ैना तीं पुड़ गुग्गल बालतन, तीं पुड़ बलि केरेलो; ते तीं पुड़ मैन्हु केरि हेड्डी फुक्की गैली।” ते तैनी तैस्से दिहाड़े एन ज़ोइतां एस गल्लरो अक निशान भी हिराव, “एन वचन ज़ैन यहोवा ज़ोवरूए, एसेरो निशान ईए कि ऐह वेदी फेटी गाली, ते एस पुड़ेरी मांज़न बिछ़ड़ी गाली।” तैखन एरू भोवं कि परमेशरेरे नेबेरी गल्लां शुन्तां ज़ैना तैनी बेतेल नगरेरे वेदरे खलाफ ज़ोरे सेइं ज़ोवरी थी, यारोबामे वेदी करां हथ अग्रोवं केरतां ज़ोवं, “एस ट्लाथ!” तैखन तैसेरो हथ ज़ै तैनी तैसेरे पासे अग्रोवं कियोरो थियो, शुक्की जेव ते तै तैस वापस पत्रोवं न एनी बटो। ते वेदी फेटी जेई, ते ज़ै मांज़न तैस पुड़ थी तै बिछ़ड़ी जेई; एन्च़रे तै निशान पूरो भोव, ज़ै परमेशरेरे नेबे यहोवा करां वचन मैलतां ज़ोवरू थियो। तैखन यारोबाम राज़े परमेशरेरे नेबी सेइं ज़ोवं, “अपने परमेशर यहोवा मना ते मेरे लेई प्राथना केर, कि मेरो हथ ज़ेरो थियो तेरहो भोइ गाए!” तैखन तैनी यहोवा कां प्राथना की ते राज़ेरो हथ ज़ेरो थियो तेरहो भोइ जेव। तैखन यारोबाम राज़े परमेशरेरे नेबी सेइं ज़ोवं, “मीं सेइं साथी घरे च़ल ते रोट्टी खा ते अवं तीं तोफो भी देइलो।” पन परमेशरेरे नेबे राज़े सेइं ज़ोवं, “चाहे तू मीं अपनो मेहल भी देस फिरी भी अवं तेरे घरे न एज्जी, ते न अवं इड़ी रोट्टी खेइं ते न इड़ी पानी पीलो। किजोकि यहोवा मीं हुक्म दित्तोरोए, कि न तू तैड़ी रोट्टी खेइयां ते न तैड़ी पानी पीयां, ते न तैस बत्तां वापस एज्जां ज़ैस बत्तां तू गालो।” एल्हेरेलेइ तै नबी ज़ैस बत्तां बेतेल नगरे जो जेवरो थियो, तैस बत्तां वापस न अव, तै होरी बत्तां च़लो जेव। बेतेल नगरे मां अक बुढो नबी रहतो थियो, तैसेरे मट्ठेईं1 एइतां तैस सेइं तैन सब कम्मां केरो बिस्तार दित्तो ज़ैना परमेशरेरे नेबे तैस दिहाड़े बेतेल नगरे मां कियोरां थियां; ते ज़ैना गल्लां तैनी राज़े सेइं ज़ोवरी थी, तैना भी तैनी अपने बाजी सेइं ज़ोई। तैसेरे मट्ठेईं त एन लाहेरू थियूं, कि परमेशरेरो तै नबी ज़ै यहूदा प्रदेशे मरां एवरो थियो तै कोस बत्तां च़लो जेव, ते तैन केरे बाजे तैन पुछ़ू, “तै कोस बत्तां च़लो जेव?” ते तैनी अपने मट्ठन सेइं इन ज़ोवं, “मेरे लेई गधे पुड़ काठी लाथ;” तैखन तैनेईं गधे पुड़ काठी लाई, ते तै तैस पुड़ च़ढ़ो, ज़ैस बत्तां परमेशरेरो नबी जेवरो थियो तैस बत्तां गेइतां तैस एक्की बंज़ेरे बुट्टे हैठ बिशोरो मैल्हो; ते तैनी तैस पुछ़ू, “ज़ै नबी यहूदा प्रदेशे मरां एवरो थियो, कुन तू तैए आस?” तैनी जुवाब दित्तो, “हाँ अवं तैए आईं।” तैनी तैस सेइं ज़ोवं, “मीं सेइं साथी घरे च़ल ते रोट्टी खा।” तैनी नेबे तैस सेइं ज़ोवं, “अवं न तीं सेइं साथी वापस एज्जी सेखी, ते न तीं सेइं साथी तेरे घरे गेइ सेखी ते न अवं इस ठैरी मां तीं सेइं साथी रोट्टी खाएलो, ते न पानी पीलो। किजोकि यहोवा मीं हुक्म दित्तोरोए, कि न तैड़ी रोट्टी खानी, ते न पानी पीनू, ते ज़ैस बत्तां तू गालो तैस बत्तां वापस न एज्जां।” तैनी झूठ ज़ोइतां ज़ोवं, “ज़ेन्च़रे तू नबी आस तेन्च़रे अवं भी नबी आईं; ते मीं सेइं एक्की दूते यहोवारो वचन मैलतां ज़ोवं, कि तैस मैन्हु एप्पु सेइं साथी अपने घरे आन, कि तै रोट्टी खाए, ते पानी पीए।” एल्हेरेलेइ तै नबी तैस बुढे नेबी सेइं साथी वापस जेव ते तैसेरे घरे मां रोट्टी खई ते पानी पियूं।
ज़ैखन तैना रोट्टी खाने लगोरे थिये, तैखन यहोवा तैस नेबी सेइं ज़ोवं, ज़ैनी होरो नबी वापस आनोरो थियो। तैखन तैनी परमेशरेरे तैस नेबी ज़ै यहूदा प्रदेशे मरां एवरो थियो, ज़ोरे सेइं ज़ोवं, “यहोवा एन ज़ोते कि तीं यहोवारू वचन न मन्नू, ते ज़ै हुक्म तेरे यहोवा परमेशरे तीं दित्तोरो थियो तै भी न मन्नो; पन ज़ैस ठारारे बारे मां तैनी तीं सेइं ज़ोवरू थियूं, ‘तैस मां न त रोट्टी खानी ते न पानी पीनू,’ तैस मां तीं वापस गेइतां रोट्टी भी खई ते पानी भी पियूं: एस वजाई सेइं तू अपने दादे-पड़दादां केरे कब्रस्ताने मां दब्बो न गालो।” ज़ैखन तैनेईं रोट्टी खई ते पानी पियूं, तैखन तैनी परमेशरेरे नेबेरे लेई गधे पुड़ काठी लाई ज़ैनी तै वापस आनोरो थियो। ज़ैखन तै बत्तां च़लोरो थियो, त तैस अक शेर मैल्हो, ते तैनी शेरे तै मारो, ते तैसेरी लाश बत्ती मां राई, ते गधो भी ते शेर भी तैस लाशी कां खड़े राए। किछ लोक तैस बत्तां च़लोरे थिये तैनेईं एन लावं कि बत्ती मां अक लाश पेवरीए, ते तैस कां अक शेर खड़ोए। तैनेईं बेतेल नगरे मां गेइतां ज़ैड़ी तै बुढो नबी रहतो थियो लोकन ई खबर शुनाई।
एन शुन्तां तैनी नेबे ज़ोवं, ज़ैनी तै बत्ती मरां वापस आनोरो थियो, “परमेशरेरो तैए नबी भोल्हो, ज़ैनी यहोवारे खलाफ कम कियोरू थियूं, एस वजाई सेइं यहोवा तै शेरेरे पंजे मां दित्तो; ते यहोवारे तैस वचनेरे मुताबिक ज़ैन तैनी तैस सेइं ज़ोवरू थियो, शेरे तै मैरतां छ़डोरो भोल्हो।” तैखन तैनी अपने मट्ठन सेइं ज़ोवं, “मेरे लेई गधे पुड़ काठी लाथ;” ज़ैखन तैनेईं गधे पुड़ काठी लाई, तैखन तैनी गेइतां हेरू कि तैस नेबेरी लाश बत्ती मां पेवरीए, ते गधो भी तैड़ी खड़ोए, ते शेर भी तैड़ी खड़ो मैल्हो, ते एन भी हेरू कि न त शेरे लाश खई, ते न गधे पुड़ हमलो कियो। तैखन तैनी बुढे नेबे परमेशरेरे नेबेरी लाश छ़ुइतां गधे पुड़ लेद्दतां आनी, ते तैसेरे लेई छाती कुटने लगो, ते तै लाशी दबनेरे लेई अपने नगर बेतेले मां वापस आनी। ते तैनी तैसेरी लाश अपने कब्रस्ताने मां दब्बी, ते लोक “हाय, मेरे ढ्ला!” एन ज़ोइतां छाती पिटने लगे। फिरी तैनी तैसेरी लाश दब्बी ते अपने मट्ठन सेइं ज़ोवं, “ज़ैखन अवं मेरि गेइलो तैखन मीं एस्से कब्रस्ताने मां देबथ, ज़ैस मां परमेशरेरो ऐह नबी दबोरोए, ते मेरी हेड्डी तैसेरी हेड्डन कां रेखथ। किजोकि ज़ैन वचन तैनी यहोवा करां मैलतां बेतेल नगरेरे वेदी ते सामरियारे नगरां केरि सैरी उच्ची ठारां केरे मन्दरां केरे खलाफ ज़ोरे सेइं ज़ोवरू थियूं, तैन ज़रूर पूरू भोइ गालू।”
यारोबाम राज़ेरे आखरी दिहाड़े
एसेरां बाद भी इस्राएलेरो राज़ो यारोबाम एपनी बुरी चाली करां न फिरो। तैनी फिरी सेभी कौमां केरे लोकन मरां उच्ची ठारां केरे मन्दरां केरे याजक बनाए, बल्के ज़ै कोई याजक बन्नू चातो थियो, तैनी उच्ची ठारां केरे लेई तैसेरू अभिषेक कियूं। ई गल यारोबामेरे घरानेरो पाप भोइ, एल्हेरेलेइ तैसेरो नाश भोव, ते तै धेरती पुड़ां नाश कियो जेव।
Source notes (1)
- Footnote मट्ठेईं इब्रानी भाषाई मां “एक्की मट्ठे” लिखेरूए।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.