Bhadrawahi Bible
1 इतिहास 7
इस्साकारेरू खानदान
इस्साकारेरां च़ेवर मट्ठां इनां थियां: तोला, पूआ, याशूब ते शिम्रोन। ते तोलारां मट्ठां इनां थियां: उज्जी, रपायाह, यरीएल, यहमै, यिबसाम ते शमूएल, इनां अपने-अपने पूर्वजां केरे घराने मतलब तोलाएरे खानदानेरे प्रधान ते बड़े बहादर थिये, ते ज़ैस वक्त दाऊद राज़ो राज़ केरतो थियो तैस वक्त तैन केरि गिनती 22600 थी। ते उज्जीएरू मट्ठू यिज्रह्याह, ते यिज्रह्याहेरां च़ेवर मट्ठां इनां थियां, मीकाएल, ओबद्याह, योएल, ते यिश्शिय्याह। इना सब अपने घरानेरे प्रधान थिये। ते तैन सेइं साथी तैन केरे वंशावली ते पूर्वजां केरे घरानेरे मुताबिक सेनारे टोली केरे 36000 सिपाही थी। किजोकि तैन केरि बेड़ि कौन्शां ते मट्ठां थियां। ते तैन केरे भियाल ज़ैना इस्साकारेरे कुलन मरां थिये, तैना 87000 बड़े बहादर थिये, ज़ैना अपने-अपने खानदानेरे मुताबिक गने जे।
बिन्यामीनी ते नप्ताली एरी खानदानी
बिन्यामीनेरां ट्लाई मट्ठां इनां थियां: बेला, बेकेर ते यदीएल। बेलारां पंच़ मट्ठां इनां थियां: एसबोन, उज्जी, उज्जीएल, यरीमोत, ते ईरी। इनां अपने-अपने पूर्वजां केरे खानदानेरे प्रधान ते बड़े बहादर थिये, ते अपने-अपने खानदानेरे मुताबिक तैन केरि गिनती 22034 थी। ते बेकेरेरां नौ मट्ठां इनां थियां: जमीरा, योआश, एलीएजेर, एल्योएनै, ओम्री, यरेमोत, अबिय्याह, अनातोत ते आलेमेत। इनां ज़ैना अपने-अपने पूर्वजां केरे घरानेरे प्रधान ते बड़े बहादर थिये, एन केरे खानदानेरी गिनती एपनी-एपनी वंशावली एरे मुताबिक 20200 थी। ते यदीएलेरू मट्ठू बिल्हान, ते बिल्हानेरां मट्ठां, यूश, बिन्यामीन, एहूद, कनाना, जेतान, तर्शीश ते अहीशहर थियां। इनां सब ज़ैना यदीएलेरे खानदाने मरां ते अपने-अपने पूर्वजां केरे घरानेरे प्रधान ते बड़े बहादर थिये, एन केरे खानदाने मरां सेना मां जंग केरनेरे काबल 17200 सिपाही थिये। ते ईरेरां मट्ठां शुप्पीम ते हुप्पीम ते अहेरेरू मट्ठू हूशीम थियूं। नप्तालीएरां मट्ठां, यहसेल, गूनी, येसेर ते शिल्लेम थियां, एना बिल्हारे पोट्लड़े थिये।
मनश्शेरू खानदान
मनश्शेरां मट्ठां: अस्रीएल ज़ैन तैसेरी अरामी रखैली सेइं पैदा भोवरू थियूं। ते तैस अरामी कौन्शरू मट्ठू गिलादेरो बाजी माकीर भी थियूं। ते माकीर (ज़ेसेरी बेइनरू नवं माका थियूं) तैनी हुप्पीम ते शुप्पीमेरे लेई कौन्शां ड्लेइतां एन्हीं, ते दूइयोंवेरू नवं सलोफाद थियूं, ते सलोफादे कुइयां भोइ। फिरी माकीरेरी कौन्शी माका दूई मट्ठां भोआं, एक्केरू नवं पेरेश ते होरेरू नवं शेरेश थियूं। ते शेरेशेरां मट्ठां ऊलाम ते राकेम थियां। ते ऊलामेरू मट्ठू बदान थियूं। इन गिलादेरू मट्ठू थियूं ज़ैन माकीरेरू मट्ठू ते मनश्शेरू पोट्लड़ू थियूं। गिलादेरी बेइन हम्मोलेकेत थी, तैसारां मट्ठां ईशहोद, अबीएजेर ते महला थियां। शमीदारां मट्ठां अहिअन, शेकेम, लिखी ते अनीआम थियां।
एप्रैमेरू खानदान
एप्रैमेरू मट्ठू शूतेलह, शूतेलहेरू बेरेद, बेरेदेरू तहत, तहतेरू एलादा, एलादारू तहत, तहतेरू जाबाद, जाबादेरू मट्ठू शूतेलह थियूं, ते एजेर ते एलाद भी ज़ैना गत्तेरे मैन्हेइं ज़ैना तैस्से मुल्खे मां पैदा भोवरे थिये एल्हेरेलेइ मारे, कि तैना तैन केरे जानबर नेने एवरे थिये। तैन केरो बाजी एप्रैम तैन केरे लेई बड़े दिहाड़न तगर गम केरतो राव, ते तैसेरे भियाल तैस तसल्ली देने आए। ते किछ वक्तेरां बाद एप्रैम एपनी कौन्शी कां जेव, ते तै दोज़ींती भोइ ते तैस अक मट्ठू भोवं ते एप्रैमे तैसेरू नवं एस वजाई सेइं बरीआ रख्खू, कि तैसेरे घराने पुड़ मुसीबत पेवरी थी। एप्रैमेरी कुई शेरां थी, ज़ैसां बुनीयें ते बेइहे दूईये बेथोरोन नंव्वेरे नगरां ते उज्जेनशेरा नगर भी बनेवरू थियूं। एप्रैमेरू अक होरू मट्ठू रेपा थियूं, ते रेपारू मट्ठू रेशेप थियूं, ते रेशेपेरू मट्ठू तेलह, तेलहरू तहन, तहनेरू लादान, लादानेरू अम्मीहूद, अम्मीहूदेरू एलीशामा, एलीशामारू नून, नूनेरू मट्ठू यहोशू थियूं। तै एप्रैमेरे खानदानेरी अपनि ज़मीन ते बेस्तन ड्लाव्वन समेत बेतेल ते पूर्वेरे पासे नारान नगर ते पश्चिमेरे पासे ड्लाव्वन समेत गेजेर नगर, फिरी ड्लाव्वन समेत शेकेम नगर, ते ड्लाव्वन समेत अय्या नगर। ते मनश्शेरी हद बेन्दी कां अपने-अपने ड्लाव्वन समेत बेतशान, तानाक, मगिद्दो ते दोर। इन नगरन मां इस्राएलेरे मट्ठे यूसुफेरी खानदानेरे लोक रहते थिये।
आशेरेरू खानदान
आशेरेरां मट्ठां: यिम्ना, यिश्वा, यिश्वी ते बरीआ, ते तैन केरि बेइन सेरह थी। ते बरीआरां मट्ठां: हेबेर ते मल्कीएल ते मल्कीएले बिर्जोत नगर बसाव। हेबेरेरां मट्ठां इनां थियां: यपलेत, शोमेर, होताम ते तैन केरि बेइन शूआ थी। ते यपलेतेरां मट्ठां इनां थिये, पासक, बिम्हाल, ते अश्वात। यपलेतेरां एना मट्ठां थियां। शेमेरां मट्ठां अही, रोहगा, यहुब्बा ते अराम थियां। यपलेतेरे ढ्ला हेलेमेरां मट्ठां सोपह, यिम्ना, शेलेश ते आमाल। सोपहेरां मट्ठां, सूह, हर्नेपेर, शूआल, बेरी, इम्रा। बेसेर, होद, शम्मा, शिलसा, यित्रान ते बेरा। येतेरां मट्ठां यपुन्ने, पिस्पा ते अरा थियां। उल्लारां मट्ठां आरह, हन्नीएल ते रिस्या थियां। इन सब आशेरेरे खानदाने मरां थिये, ते अपने-अपने पूर्वजां केरे घरानेरे प्रधान ते बड़े बहादर थिये ते प्रधान्न मां भी खास थिये। इनां ज़ैना अपने-अपने खानदानेरे मुताबिक सेनाई मां जंग केरनेरे लेई गने जे, इन केरि गिनती 26000 थी।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.