Bhadrawahi Bible
1 इतिहास 6
लेवेरी खानदानी
लेवेरां ट्लाई मट्ठां गेर्शोन, कहात ते मरारी थियां। ते कहातेरां मट्ठां अम्राम, यिसहार, हेब्रोन ते उज्जीएल थियां। ते अम्रामेरां मट्ठां हारून, मूसा थियां, ते मिर्याम तैसेरी कुई थी। ते हारूनेरां मट्ठां नादाब, अबीहू, एलीआजर ते ईतामार थियां। एलीआजरेरू मट्ठू पीनहास, पीनहासेरू अबीशू, अबीशूएरू बुक्की, बुक्कीएरू उज्जी, उज्जीएरू जरहयाह, जरहयाहेरू मरायोत, मरायोतेरू अमर्याह, अमर्याहेरू अहीतूब, अहीतूबेरू सादोक, सादोकेरू अहीमास, ते अहीमासेरू अजर्याह, अजर्याहेरू योहानान, योहानानेरू मट्ठू अजर्याह थियूं (ज़ै सुलैमानेरे यरूशलेम नगरे मां बनेवरे भवने मां याजकेरू कम केरतो थियो)। अजर्याहेरू मट्ठू अमर्याह, अमर्याहेरू अहीतूब, अहीतूबेरू सादोक, ते सादोकेरू शल्लूम, शल्लूमेरू हिल्किय्याह, हिल्किय्याहेरू अजर्याह, अजर्याहेरू सरायाह, ते सरायाहेरू मट्ठू यहोसादाक थियूं। ते ज़ैखन यहोवा, यहूदा ते यरूशलेमेरे लोक बाबेलेरे राज़े नबूकदनेस्सरे गुलाम बनेइतां निये, तैखन यहोसादाक भी गुलाम बेनतां जेव। लेवरां मट्ठां गेर्शोम, कहात ते मरारी थियां। ते गेर्शोमेरां मट्ठां केरां नंव्वां इनां थियां, लिब्नी ते शिमी। ते कहातेरां मट्ठां अम्राम, यिसहार, हेब्रोन ते उज्जीएल थियां। ते मरारी एरां मट्ठां महली ते मूशी थियां। अपने-अपने पूर्वजां केरे घरानेरे मुताबिक लेवी केरां कुल इनां आन। गेर्शोमेरू मट्ठू लिब्नी थियूं, लिब्नी एरू यहत, यहतेरू जिम्मा, ते जिम्मारू मट्ठू योआह, ते योआहरू मट्ठू इद्दो, इद्दोरू मट्ठू जेरह, ते जेरहेरू मट्ठू यातरै थियूं। फिरी कहातेरू मट्ठू अम्मीनादाब थियूं, अम्मीनादाबेरू मट्ठू कोरह, कोरहेरू अस्सीर, अस्सीरेरू एल्काना, एल्कानारू एब्यासाप भोव, एब्यासापेरू अस्सीर, अस्सीरेरू तहत, तहतेरू ऊरीएल, ऊरीएलेरू उज्जियाह, उज्जियाहेरू मट्ठू शाऊल थियूं। फिरी एल्कानारां मट्ठां अमासै ते अहीमोत थियां। अहीमोतेरू मट्ठू एल्काना एल्कानारू मट्ठू सोपै, सोपैरू नहत, नहतेरू एलीआब, एलीआबेरू यरोहाम, ते यरोहामेरू मट्ठू एल्काना थियूं। शमूएलेरां मट्ठां इनां थियां: तैसेरू बड्डू मट्ठू योएल ते दूइयोवं अबिय्याह थियूं। फिरी मरारीएरू मट्ठू महली, महलीएरू लिब्नी, लिब्नी एरू शिमी, शिमीएरू उज्जा। उज्जारू शिमा; ते शिमारू हग्गिय्याह ते हग्गिय्याहेरू मट्ठू असायाह थियूं।
परमेशरेरे भवनेरे संगीतकार
फिरी ज़ैना दाऊद राज़े सन्दूखेरे भवने मां रखनेरां बाद, यहोवारे भवने मां ज़ैना गीतां ज़ोनेबाले केरे प्रधान रखोरे थिये तैना इनां थिये। ज़ैखन तगर सुलैमाने यरूशलेम नगरे मां यहोवारो भवन न बनाव, तैखन तगर तैना मिलापे बाले तेम्बेरी रानेरी ठारारे सामने गीतां ज़ोनेरे ज़िरिये सेवा केरते थिये। ते एस सेवाई मां नियमेरे मुताबिक हाज़र भोते थिये। ज़ैना अपने-अपने मट्ठन सने हाज़र भोते थिये तैना इना आन: कहाती लोकन मरां हेमान गीतां ज़ोने बालो ज़ैन योएलेरू मट्ठू थियूं, योएल शमूएलेरू मट्ठू थियूं, शमूएल एल्कानारू, एल्काना यरोहामेरू, यरोहाम एलीएलेरू, एलीएल तोहेरू, तोह सूफेरू, सूफ एल्कानारू, एल्काना महतेरू, महत अमासैरू, अमासै एल्कानारू, एल्काना योएलेरू, योएल अजर्याहेरू, अजर्याह सपन्याहेरू, सपन्याह तहतेरू, तहत अस्सीरेरू, अस्सीर एब्यासापेरू, एब्यासाप कोरहेरू, कोरह यिसहारेरू, यिसहार कहातेरू, ते कहात लेवेरू ते लेवी इस्राएलेरू मट्ठू थियूं। ते तैसेरो ढ्ला आसाप ज़ै तैसेरे देइने पासे खड़ो रहतो थियो तैन बेरेक्याहेरू मट्ठू थियूं, ते बेरेक्याह शिमाएरू, शिमा मीकाएलेरू, मीकाएल बासेयाहेरू, बासेयाह मल्किय्याहेरू, मल्किय्याह एत्नीएरू, एत्नी जेरहेरू, जेरह अदायाहेरू, अदायाह एतानेरू, एतान जिम्मारू, जिम्मा शिमीएरू, शिमी यहतेरू, यहत गेर्शोमेरू, गेर्शोम लेवेरू मट्ठू थियूं। ते बांए पासे तैन केरे भियाल मरारी लोक खड़े भोते थिये, एतान ज़ैन कीशी एरू मट्ठू थियूं, कीशी अब्दी एरू, अब्दी मल्लूकेरू, मल्लूक हशब्याहेरू, हशब्याह अमस्याहेरू, अमस्याह हिल्किय्याहेरू, हिल्किय्याह अमसी एरू, अमसी बानीएरू, बानी शेमेरू, शेमेर महलीएरू, महली मूशीएरू, मूशी मरारीएरू, मरारी लेवेरू मट्ठू थियूं। ते इन केरे ढ्ला ज़ैना लेवी थिये तैना परमेशरेरे भवनेरी रानेरी ठारारे हर किसमेरी सेवारे लेई च़ुनोरे थिये।
हारूनेरां मट्ठां
पन हारून ते तैसेरां मट्ठां होमबेलरी वेदी ते धूपेरी वेदी दूईने पुड़ बलिदान च़ाढ़ते, ते परमपवित्र ठारारू सारू कम केरते थिये, ते इस्राएली केरे लेई प्रायश्चित केरते थिये, ज़ेन्च़रे कि परमेशरेरे दास मूसा हुक्म दित्तोरो थियो। ते हारूनेरे खानदाने मां इनां भोए: तैसेरू मट्ठू एलीआजर थियूं, ते एलीआजरेरू पीनहास, पीनहासेरू अबीशू, अबीशूएरू बुक्की, बुक्कीएरू उज्जी, उज्जीएरू जरहयाह, जरहयाहेरू मरायोत, मरायोतेरू मट्ठू अमर्याह, अमर्याहेरू अहीतूब, अहीतूबेरू सादोक ते सादोकेरू मट्ठू अहीमास थियूं।
लेवी लोकां केरि ठहरेवरी रानेरी ठारां
तैन केरे हिस्सन मां तैन केरे डेरां केरे मुताबिक बेसती इनां आन, कहातेरे कुलन मां पेइली चिट्ठी ज़ै हारूनेरे खानदानेरे नंव्वे पुड़ निस्सी। च़ेवरे पासां केरि चरागान समेत यहूदा प्रदेश ते हेब्रोन नगर तैन मैल्हू। पन तैस नगरेरां ऊडारां ते ड्लाव्वां यपुन्नेरे मट्ठे कालेबे दित्तां जेआं। ते हारूनेरे खानदाने शरणनगर हेब्रोन, ते चरागान समेत लिब्ना, यत्तीर, एश्तमो, हीलेन, दबीर, आशान ते बेतशेमेश नगरां दित्तां। ते बिन्यामीनेरे गोट्ले अपने-अपने चरागान समेत गेबा, आलेमेत ते अनातोत नगरां दित्तां जेआं। तैन केरे घराना केरे सारे 13 नगर थिये।
ते बाकी कहाती लोकां केरे गोट्लेरे कुल, मनश्शेरे अधे गोट्ले चिट्ठी छ़ेडतां 10 नगर दित्ते जे। ते गेर्शोमी लोकां केरे खानदानेरे मुताबिक इस्साकार, आशेर, ते नप्ताली एरे गोट्ल, ते बाशान प्रदेशे मां रानेबाले मनश्शेरे गोट्ले 13 नगर मैल्हे। मरारी गोट्लेरे कुलां केरे मुताबिक तैन रूबेन, गाद ते जबूलूनेरे गोट्ले मरां चिट्ठी छ़ेडतां 12 नगर दित्ते जे। इस्राएली लोकेईं लेवी लोकन इनां नगरां चरागान समेत दित्तां। तैनेईं यहूदी, शिमोनी, ते बिन्यामीनी लोकां केरे गोट्लन मरां तैना नगर दित्तां, ज़ैन केरां नंव्वां बह लिखोरन।
ते कहाती लोकां केरे बड़े कुलन तैन केरे नगर एप्रैमेरे गोट्ले मरां मैल्हे। तैन अपने-अपने चरागान समेत एप्रैमेरो पहाड़ी प्रदेश ते शेकेम ज़ैन शरणनगर थियूं, ते फिरी गेजेर, योकमाम, बेथोरोन, अय्यालोन ते गत्रिम्मोन, ते मनश्शेरे अधे गोट्ले मरां अपने-अपने चरागान समेत आनेर ते बिलाम नगरां बाकी कहाती लोकां केरे कुले मैल्हां। फिरी गेर्शोमी लोकन मनश्शेरे अधे गोट्ले मरां अपने-अपने चरागान समेत बाशानेरू गोलन ते अश्तारोत। ते इस्साकारेरे गोट्ले मरां अपने-अपने चरागान समेत केदेश, दाबरात, रामोत ते आनेम, ते आशेरेरे गोट्ले मरां अपने-अपने चरागान समेत माशाल, अब्दोन, हूकोक ते रहोब। ते नप्ताली केरे गोट्ले मरां अपने-अपने चरागान समेत गलील प्रदेशेरू केदेश नगर, ते हम्मोन, किर्यातैम नगरां मैल्हां। फिरी बाकी लेवी खानदानेरे मरारी लोकन जबूलूनेरे गोट्ले मरां अपने-अपने चरागान समेत रिम्मोन ते ताबोर। ते यरीहो नगरे कां यरदन दरियाएरे पूर्वेरे पासे रूबेनेरे गोट्ले मरां अपने-अपने चरागान समेत सुनसान ठारारू बेसेर, यहस, कदेमोत ते मेपात। ते गादेरे गोट्ले मरां अपने-अपने चरागान समेत गिलाद प्रदेशेरां रामोत महनैम, हेशबोन, ते याजेर नगरां दित्तां जेआं।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.