Bhadrawahi Bible
1 इतिहास 26
भवनेरे पहरदार
भवनेरे पहरेदारां केरि टोली इना थी: कोरह खानदाने मरां मशेलेम्याह ज़ैन कोरेरू मट्ठू ते आसापेरे खानदाने मरां थियूं। ते मशेलेम्याहेरां मट्ठां इनां भोआं, तैसेरू बड्डू मट्ठू जकर्याह, दूइयोवं यदीएल, ट्लेइयोवं जबद्याह, च़ेवरोवं यातनीएल, पंच़ोंव एलाम, शेइयोवं यहोहानान ते सत्तोवं एल्यहोएनै। फिरी ओबेदेदोमेरां भी मट्ठां थियां: तैसेरू बड्डू मट्ठू शमायाह, दूइयोवं यहोजाबाद, ट्लेइयोवं योआह, च़ेवरोवं साकार, पंच़ोंव नतनेल, शेइयोवं अम्मीएल, सत्तोवं इस्साकार ते अठोवं पुल्लतै, किजोकि परमेशरे तैस बरकत दित्तोरी थी। ते ओबेद एदोमेरे बड्डे मट्ठे शमायाहे भी मट्ठां भोआं, ज़ैना शूरबीर ते बहादर भोनेरी वजाई सेइं अपने बाजी केरे घराने पुड़ प्रधान थिये। शमायाहेरां मट्ठां इन्ना थियां, ओतनी, रपाएल, ओबेद, एलजाबाद ते तैन केरे ढ्ला एलीहू ते समक्याह ताकतबर थिये। इना सब ओबेदेदोमेरे खानदाने मरां थिये, तैना ते तैन केरां मट्ठां ते भियाल इस सेवकाई केरनेरे लेई ताकतबर ते शक्तिमान थिये। इनां ओबेदेदोमी 62 थिये। मशेलेम्याहेरां मट्ठां ते भियाल 18 थिये, ज़ैना ताकतबर थिये। फिरी मरारी एरे खानदाने मरां होसारां भी मट्ठां थियां, प्रधान त शिम्री थियो (तै बड्डो न भोनेरे वजाई सेइं भी तैसेरे बाजे प्रधान ठहरावरो थियो), दूइयोवं हिल्किय्याह, ट्लेइयोवं तबल्याह ते च़ेवरोवं जकर्याह थियो। होसारां सारां मट्ठां ते भियाल मिलेइतां 13 ज़ने थिये।
भवनेरे पहरेदारां केरि टोली इनां प्रधानां केरि थी, इनां अपने बाकी भियालां केरे बराबर यहोवारे भवने मां सेवा केरते थिये। तैनेईं कुन निकड़े, ते कुन बड्डे, अपने-अपने पूर्वजां केरे घरानेरे मुताबिक हर एक्की फाटकेरे लेई चिट्ठी छ़डी। पूर्वेरे पासेरी चिट्ठी शेलेम्याहेरे नंव्वे पुड़ निस्सी। फिरी तैनेईं तैसेरे मट्ठे जकर्याहेरे नंव्वे पुड़ चिट्ठी छ़डी (तै समझ़दार सलाहकार थियो) ते चिट्ठी उत्तरेरे पासे निस्सी। दक्षिणेरे पासेरे लेई ओबेदेदोमेरे नंव्वे पुड़ चिट्ठी निस्सी, ते तैसेरे मट्ठां केरे नंव्वे पुड़ भवनेरे खज़ानेरे कमरेरे लेई निस्सी। फिरी शुप्पीम ते होसारे नंव्वेरी चिट्ठी पश्चिमेरे पासेरी निस्सी, कि तैना शल्लेकेत नंव्वेरे फाटके कां चढ़ेइयरे सड़की पुड़ आमने-सामने पहरदारी केरते रान। पूर्वेरे पासे त शा लेवी थिये, ते उत्तरेरे पासे रोज़ च़ेवर, दक्षिणेरे पासे रोज़ च़ेवर, ते खज़ानेरे कमरे कां दूई पहरदार रख्खे। पश्चिमेरे पासे पर्बार नंव्वेरी जगाई पुड़ उच्ची सड़की कां त च़ेवर ते पर्बारे कां दूई पहरदार रख्खे। इनां भवनेरे पहरेदारां केरि टोली थी, ज़ैन मरां किछ त कोरह ते किछ मरारी एरे खानदाने मरां थिये।
भवनेरे भण्डारी ते अलग-अलग सेवा
फिरी लेवी लोकन मरां अहिय्याह परमेशरेरे भवन ते च़ाढ़ोरी चीज़ां, दूईयां केरे भण्डारां केरो अधिकारी च़ुनो। लादान गेर्शोनेरे खानदाने मरां थियो, ते पूर्वजां केरे घराना केरो पूर्वज थियो। लादानेरू मट्ठू यहोएली भी प्रधान थियो।
यहोएली एरां मट्ठां इनां थियां, जेताम ते तैसेरो ढ्ला योएल, ज़ैना यहोवारे भवने मां खज़ानां केरे अधिकारी थिये। बाकी इनां थियां, अम्रामी, यिसहारी, हेब्रोनी ते उज्जीएली लोकन मरां, शबूएल ज़ै मूसेरे मट्ठे गेर्शोमेरे खानदाने मरां थियो, तै खज़ानां केरो प्रधान अधिकारी थियो। ते तैसेरे भियाल इनां थिये: एलीएजेरे कुले मरां तैसेरू मट्ठू रहब्याह, ते रहब्याहेरू मट्ठू यशायाह, ते यशायाहेरू मट्ठू योराम, ते योरामेरू मट्ठू जिक्री, ते जिक्री एरू मट्ठू शलोमोत थियूं। ईए शलोमोत अपने भियालन समेत तैन सब च़ैढ़ोरी चीज़ां ते भण्डारां केरो अधिकारी थियो, ज़ैना चीज़ां दाऊद राज़े ते पूर्वजां केरे घरानेरे खास-खास मैन्हु ते हज़ारां ते शौवां केरे सेनापतिएईं शुद्ध कियोरी थी। ज़ै लूटरो माल जंगन मां मैल्होरो थियो, तैस मरां तैनेईं यहोवारे भवनेरी मरम्मत केरनेरे लेई किछ चीज़ां च़ैढ़ी। ज़ेत्री चीज़ां शमूएल नेबे, कीशेरे मट्ठे शाऊल राज़े, नेरेरे मट्ठे अब्नेर, ते सरूयाहेरे मट्ठे योआबे च़ैढ़ोरी थी, ते ज़ैन किछ केन्चे भवन बनानेरे लेई अर्पण कियोरू थियूं, तैन सब शलोमोत ते तैसेरे भियालां केरे अधिकारे मां थियूं। यिसहारी लोकन मरां कनन्याह ते तैसेरां मट्ठां, इस्राएल मुल्खेरे अधिकारी ते न्यायी एरू कम केरनेरे लेई च़ुनोरे। ते हेब्रोनी लोकन मरां हशब्याह ते तैसेरे भियाल ज़ैना 1700 शूरबीर ताकतबर थिये, तैना यहोवारे सारे कम्मे ते राज़ेरी सेवारे बारे मां यरदन दरियारे पश्चिमेरे रानेबाले इस्राएली लोकां केरे अधिकारी भोए। हेब्रोनी लोकन मरां यरिय्याह प्रधान थियो, मतलब हेब्रोनी लोकां केरि पीढ़ी-पीढ़ी पूर्वजां केरे घरानेरे मुताबिक दाऊद राज़ेरे राज़ केरनेरे च़ैलीयोवं साले मां तैना तोप्पे जे, ते तैन मरां किछ शूरबीर गिलाद प्रदेशेरे याजेर नगरे मां रहते थिये। यरिय्याहेरे भियाल ज़ैना शूरबीर बहादर थिये, पूर्वजां केरे घरानेरे प्रधान 2700 थिये, तैना दाऊद राज़े परमेशरेरे सेभी विषयन मां ते राज़ेरे बारे मां रूबेनी, गादी ते मनश्शेरे अधे गोट्लेरे अधिकारी बनाए।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.