Bhadrawahi Bible
1 इतिहास 27
मुल्खेरो इंतज़ाम
इस्राएली लोकां केरि गिनती, पूर्वजां केरे घरानेरे प्रधान ते हज़ार ते शौव सिपाही केरे सेनापति ते तैन केरे प्रधानां केरि गिनती ज़ैना पूरे साल ते महीने-महीने हज़ार भोनेरे ते छुट्टी मैल्हने बाले टोली केरे थिये ते हर किसमेरी राज़ेरी सेवा केरते थिये, हर एक्की टोली मां 24000 सिपाही थिये।
पेइले महीनेरे लेई पेइले टोलरो अधिकारी जब्दीएलेरू मट्ठू याशोबाम च़ुनू। ते तैसेरे टोली मां 24000 सिपाही थिये। तै पेरेसेरे खानदाने मरां थियो ते पेइले महीने मां सारे सेनापति लोकां केरो अधिकारी थियो। दूइयोवं महीनेरे टोलरो अधिकारी दोदै नंव्वेरो अक अहोही थियो, ते तैसेरे टोलरो प्रधान मिक्लोत थियो, ते तैसेरे टोली मां 24000 सिपाही थिये। ट्लेइयोवं महीनेरे ट्लेइयोवं सेनापति यहोयादा याजकेरू मट्ठू बनायाह थियो ते तैसेरे टोली मां 24000 सिपाही थिये। ई तैए बनायाहे, ज़ै ट्लीहे शूरबीरन मां बहादर थियो, ते ट्लीहे बहादरां केरो प्रधान थियो। ते तैसेरे टोली मां तैसेरू मट्ठू अम्मीजाबाद थियूं। च़ेवरोवं महीनेरे लेई च़ेवरोवं सेनापति योआबेरो ढ्ला असाहेल थियो, ते तैसेरां बाद तैसेरू मट्ठू जबद्याह थियूं ते तैसेरे टोली मां 24000 सिपाही थिये। पंच़ोंव महीनेरे लेई पंच़ोंव सेनापति यिज्राही शम्हूत थियो ते तैसेरे टोली मां 24000 सिपाही थिये। शेइयोवं महीनेरे लेई शेइयोवं सेनापति तकोई इक्केशेरू मट्ठू ईरा थियूं, ते तैसेरे टोली मां 24000 सिपाही थिये। सत्तोवं महीनेरे लेई सत्तोवं सेनापति एप्रैमेरे खानदानेरो हेलेस पलोनी थियो ते तैसेरे टोली मां 24000 सिपाही थिये। अठोवं महीनेरे लेई अठोवं सेनापति जेरहेरे खानदाने मरां हूशाई सिब्बकै थियो ते तैसेरे टोली मां 24000 सिपाही थिये। नोवोवं महीनेरे लेई नोवोवं सेनापति बिन्यामीनी अबीएजेर अनातोत नगरेरो थियो ते तैसेरे टोली मां 24000 सिपाही थिये। दशोवं महीनेरे लेई दशोवं सेनापति जेरही महरै, नतोपा नगरेरो ते तैसेरे टोली मां 24000 सिपाही थिये। यारोवं महीनेरे लेई यारोवं सेनापति एप्रैमेरे खानदाने मरां बनायाह, पिरातोन नगरेरो थियो, ते तैसेरे टोली मां 24000 सिपाही थिये। बारोवं महीनेरे लेई बारोवं सेनापति ओत्नीएलेरे खानदानेरो हेल्दै नतोपा नगरेरो थियो ते तैसेरे टोली मां 24000 सिपाही थिये। फिरी इस्राएली गोट्लां केरे इनां अधिकारी थिये: रूबेनी लोकां केरो प्रधान जिक्री एरू मट्ठू एलीएजेर। ते शिमोनी लोकन मरां माकारू मट्ठू शपत्याह थियूं। लेवी लोकन मरां कमूएलेरू मट्ठू हशब्याह। हारूनेरे खानदाने मरां सादोक। यहूदारो एलीहू नंव्वेरो दाऊदेरो अक ढ्ला, इस्साकारी लोकन मरां मीकाएलेरू मट्ठू ओम्री। जबूलूनेरे खानदाने मरां ओबद्याहेरू मट्ठू यिशमायाह, ते नप्ताली खानदाने मरां अज्रीएलेरू मट्ठू यरीमोत। एप्रैमे मरां अजज्याहेरू मट्ठू होशे, मनश्शेरे अधे गोट्लेरू, पदायाहेरू मट्ठू योएल। गिलादे मरां अधे गोट्ले मनश्शेरे मरां जकर्याहेरू मट्ठू इद्दो, बिन्यामीने मरां अब्नेरेरू मट्ठू यासीएल। ते दाने मरां यरोहामेरू मट्ठू अजरेल प्रधान थियूं। इन्ना इस्राएलेरे गोट्लां केरे प्रधान थिये। पन दाऊदे तैन केरि गिनती न की ज़ैना 20 सालन करां घट थिये, किजोकि यहोवा इस्राएलेरी गिनती अम्बरेरे तारां केरे बराबर बधानेरे लेई ज़ोवरू थियूं।1 सरूयाहेरू मट्ठू योआब गिनती केरने जेव, पन खतम न केरि सको किजोकि परमेशरेरो क्रोध इस्राएले पुड़ भड़को, ते ई गिनती दाऊदेरे राज़ेरे इतिहासे मां नईं लिखी जेवरी। फिरी अदीएलेरू मट्ठू अज्मावेत राज़ेरे भण्डारां केरो अधिकारी थियो, ते देहात ते नगरां ते ड्लाव्वां ते क़िलन ते भण्डारां केरो अधिकारी उज्जियाहेरू मट्ठू यहोनातान थियो। ते ज़ै ज़मीन आबाद केरतां ज़मीनदारी केरते थिये, तैन केरो अधिकारी कलूबेरू मट्ठू एज्री थियूं। ते दाछ़री बागां केरो अधिकारी रामाह नगरेरो शिमी ते दाछ़री बागां केरि पैदावार ज़ै दाछ़रो रस भण्डारन मां रखनेरे लेई थियो, तैसेरो अधिकारी शापाम नगरेरो जब्दी थियो। ते बुनीयें मुल्खेरे ज़ैतून ते गूलरेरे बुट्टां केरो अधिकारी गदेर नगरेरो बाल्हानान थियो ते तेलेरे भण्डारां केरो अधिकारी योआश थियो। ते शारोने मां च़ारने बालां केरो अधिकारी शारोनी शित्रै थियो ते वैदी केरो ते गोरू केरो अधिकारी अदलैरू मट्ठू शापात थियूं। ते ऊँटां केरो अधिकारी इश्माएली ओबील2 ते गेधी केरो अधिकारी मेरोनोत नगरेरो येहदयाह थियो। ते गब्बां केरो अधिकारी हग्री याजीज थियो। इनां सारे दाऊद राज़ेरे धन दौलतरे अधिकारी थिये। ते दाऊद राज़ेरो चाचो योनातान अक समझ़दार सलाहकार ते शास्त्री थियूं, ते अक हक्मोनी एरू मट्ठू यहीएल राज़ेरे मट्ठन सेइं रेइयां केरतो थियूं। ते अहीतोपेल राज़ेरो सलाहकार थियो, ते एरेकी हूशै राज़ेरो दोस्त थियो। ते अहीतोपेलेरे मरनेरे बाद बनायाहेरू मट्ठू यहोयादा ते एब्यातार मंत्री रख्खे जे। ते राज़ेरो प्रधान सेनापति योआब थियो।
Source notes (2)
- Cross-reference उत्प. 15:5;22:17;26:4.
- Footnote ओबील इब्रानी नवं “ओबील” मतलब ऊँट च़लानेबालो।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.