Bhadrawahi Bible
1 इतिहास 25
दाऊदेरे संगीतकार
फिरी दाऊद राज़े ते सेनापति लोकेईं आसाप, हेमान ते यदूतूनेरां किछ मट्ठां सेवकाई केरनेरे लेई अलग कियां कि तैना सितार, सैन्गी ते झ़ेल्ली बज़ेई-बज़ेइतां नबूवत केरन। ते एस सेवकाई केरनेरू कम केरनेबाले मैन्हु केरि गिनती ईए थी: आसापेरे मट्ठन मरां जक्कूर, यूसुफ, नतन्याह ते अशरेला, आसापेरां इनां च़ेवर मट्ठां आसापेरे हुक्मे पुड़ च़लतां थियां, ज़ै दाऊद राज़ेरे हुक्मेरे मुताबिक नबूवत केरतो थियो। फिरी यदूतूनेरे मट्ठन मरां गदल्याह, सरी, यशायाह, शिमी, हशब्याह, मत्तित्याह, एना शा अपने बाजी यदूतूनेरे हुक्मेरे मुताबिक ज़ै यहोवारू शुक्र ते तारीफ़ केरि-केरि नबूवत केरतो थियो, सितार बज़ाते थिये। हेमानेरे मट्ठन मरां, बुक्किय्याह, मत्तन्याह, उज्जीएल, शबूएल, यरीमोत, हनन्याह, हनानी, एलीआता, गिद्दलती, रोममतीएजेर, योशबकाशा, मल्लोती, होतीर ते महजीओत। परमेशरेरे वाधेरे मुताबिक ज़ै तैसेरू नवं उच्चु केरनेरे लेई थियो, इना सब हेमानेरां मट्ठां थियां ज़ै राज़ेरो दर्शी थियो। किजोकि परमेशरे हेमाने च़ेवधे मट्ठां ते ट्लाई कुइयां दित्तोरी थी। इन सब तैसेरां मट्ठां यहोवारे घरे मां गीतां ज़ोनेरे लेई ते अपने-अपने बाजी केरे अधीन रेइतां, परमेशरेरे भवनेरी सेवकाई मां झ़ेल्ली, सैन्गी ते सितार बज़ाते थिये। आसाप, यदूतून ते हेमान राज़ेरे अधीन रहते थिये। इन सेभी केरि गिनती तैन केरे भियालन सने ज़ैना यहोवारां गीतां शिखोरां थियां ते हर किसमे सेइं पूरे ज़ानकार थिये, 228 थिये। तैनेईं कुन बड्डो, कुन निकड़ो, कुन गुरू, कुन चेलो, अपनि-अपनि बारी लानेरे लेई चिट्ठी छ़डी।
पेइली चिट्ठी आसापेरे मट्ठन मरां यूसुफेरे नंव्वे पुड़ निस्सी ज़ैसेरां मट्ठां ते भियाल तैस समेत 12 थिये। दूइयोवं गदल्याहेरे नंव्वे पुड़ निस्सी, ज़ैसेरां मट्ठां ते भियाल तैस समेत 12 थिये। ट्लेइयोवं जक्कूरेरे नंव्वे पुड़ निस्सी, ज़ैसेरां मट्ठां ते भियाल तैन समेत 12 थिये। च़ेवरोवं यिस्री एरे नंव्वे पुड़ निस्सी, ज़ैसेरां मट्ठां ते भियाल तैस समेत 12 थिये। पंच़ोंव नतन्याहेरे नंव्वे पुड़ निस्सी, ज़ैसेरां मट्ठां ते भियाल तैस समेत 12 थिये। शेइयोवं बुक्किय्याहेरे नंव्वे पुड़ निस्सी, ज़ैसेरां मट्ठां ते भियाल तैस समेत 12 थिये। सत्तोवं यसरेलारे नंव्वे पुड़ निस्सी, ज़ैसेरां मट्ठां ते भियाल तैस समेत 12 थिये। अठोवं यशायाहेरे नंव्वे पुड़ निस्सी, ज़ैसेरां मट्ठां ते भियाल तैस समेत 12 थिये। नंवोवं मत्तन्याहेरे नंव्वे पुड़ निस्सी, ज़ैसेरां मट्ठां ते भियाल तैस समेत 12 थिये। दशोवं शिमी एरे नंव्वे पुड़ निस्सी, ज़ैसेरां मट्ठां ते भियाल तैस समेत 12 थिये। यारोवं अजरेलेरे नंव्वे पुड़ निस्सी, ज़ैसेरां मट्ठां ते भियाल तैस समेत 12 थिये। बारोवं हशब्याहेरे नंव्वे पुड़ निस्सी, ज़ैसेरां मट्ठां ते भियाल तैस समेत 12 थिये। तेरहोवं शूबाएलेरे नंव्वे पुड़ निस्सी, ज़ैसेरां मट्ठां ते भियाल तैस समेत 12 थिये। च़ेवधोवं मत्तित्याहेरे नंव्वे पुड़ निस्सी, ज़ैसेरां मट्ठां ते भियाल तैस समेत 12 थिये। परहनोवं यरेमोतेरे नंव्वे पुड़ निस्सी, ज़ैसेरां मट्ठां ते भियाल तैस समेत 12 थिये। शोड़ोवं हनन्याहेरे नंव्वे पुड़ निस्सी, ज़ैसेरां मट्ठां ते भियाल तैस समेत 12 थिये। सत्तहरोवं योशबकाशारे नंव्वे पुड़ निस्सी, ज़ैसेरां मट्ठां ते भियाल तैस समेत 12 थिये। अठारोवं हनानी एरे नंव्वे पुड़ निस्सी, ज़ैसेरां मट्ठां ते भियाल तैस समेत 12 थिये। उनियों मल्लोती एरे नंव्वे पुड़ निस्सी, ज़ैसेरां मट्ठां ते भियाल तैस समेत 12 थिये। बिहोवं एलियातहेरे नंव्वे पुड़ निस्सी, ज़ैसेरां मट्ठां ते भियाल तैस समेत 12 थिये। इकियोवं होतीरेरे नंव्वे पुड़ निस्सी, ज़ैसेरां मट्ठां ते भियाल तैस समेत 12 थिये। बाइयोवं गिद्दलती एरे नंव्वे पुड़ निस्सी, ज़ैसेरां मट्ठां ते भियाल तैस समेत 12 थिये। ट्लेबीयोवं महजीओतेरे नंव्वे पुड़ निस्सी, ज़ैसेरां मट्ठां ते भियाल तैस समेत 12 थिये। च़ौबियोवं चिट्ठी रोममतीएजेरे नंव्वे पुड़ निस्सी, ज़ैसेरां मट्ठां ते भियाल तैस समेत 12 थिये।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.