Bhadrawahi Bible
1 इतिहास 24
याजकां केरि ज़िमेवारी
हारूनेरे खानदाने मरां टोली इनां थी। हारूनेरां मट्ठां त नादाब, अबीहू, एलीआजर ते ईतामार थिये। पन नादाब ते अबीहू अपने बाजी हारूने करां पेइले मरे तैन मट्ठां न थियां, एल्हेरेलेइ याजकेरू कम एलीआजर ते ईतामार केरते थिये।1 ते दाऊद राज़े एलीआजरेरे खानदाने मरां सादोक ते ईतामारेरे खानदाने मरां अहीमेलेकेरी मद्दती सेइं तैन अपनि-अपनि सेवारे मुताबिक टोली-टोली केरतां बन्टे।2 एलीआजरेरे खानदाने मां प्रधान मड़द, ईतामारेरे खानदानेरे प्रधान मड़दन करां जादे थिये। ते तैना एन्च़रे बन्टे जे: मतलब एलीआजरेरे खानदानेरे पूर्वजां केरे घरानेरे 16, ते ईतामारेरे पूर्वजां केरे घरानेरे अठ खास प्रधान थिये। तैखन तैना चिट्ठी छ़ेडतां बराबर-बराबर बन्टे जे, किजोकि एलीआजर ते ईतामार दूईयां केरे खानदाने मां पवित्र ठारारे हाकिम ते परमेशरे हाकिम च़ुने जेवरे थिये। ते नतनेलेरू मट्ठू शमायाह ज़ैन शास्त्री ते लेवी थियूं, तैन केरे नंव्वे राज़े ते हाकिमन ते सादोक याजक, ते एब्यातारे मट्ठे अहीमेलेक ते याजकां ते लेवी केरे पूर्वजां केरे घरानेरे प्रधानां केरे सामने लिखां। मतलब पूर्वजां केरो अक घरानो त एलीआजरेरे खानदाने मरां ते अक ईतामारेरे खानदाने मरां नेव जेव।
पेइली चिट्ठी त यहोयारीबेरे नंव्वेरे, ते दूइयोवं यदायाह, ट्लेइयोवं हारीमेरे, च़ेवरोवं सोरीमेरे, पंच़ोंव मल्किय्याहेरे, शेइयोवं मिय्यामीनेरे, सत्तोवं हक्कोसेरे, अठोवं अबिय्याहेरे, नोवोवं येशुअरे, दशोवं शकन्याहेरे, यारोवं एल्याशीबेरे, बारोवं याकीमेरे, तेरहोवं हुप्पारे, च़ेवधोवं येसेबाबेरे, परहनोवं बिल्गारे, शोड़ोवं इम्मेरेरे, सत्तहरोवं हेजीरेरे, अठारोवं हप्पित्सेसेरे, उनियों पतह्याहरे, बिहोवं यहेजकेलेरे, इकियोवं याकीनेरे, बैहियोवं गामूलेरे, ट्लेबीयोवं दलायाहेरे, ते च़ौबियोवं माज्याहरे नंव्वे पुड़ निस्सी। तैन केरि सेवारे लेई तैन केरो ऐह नियम रख्खो जेव कि तैना अपने तैस कानूनेरे मुताबिक ज़ै इस्राएलेरे परमेशर यहोवारे हुक्मेरे मुताबिक तैन केरे पूर्वज हारूने च़लेवरो थियो, यहोवारे भवने मां गाते रान।
बाकी लेवी
बच़ोरे लेवी लोकन मरां अम्रामेरे खानदाने मरां शूबाएल, ते शूबाएलेरे खानदाने मरां येहदयाह। बच़ोरे रहब्याह, रहब्याहेरे खानदाने मरां यिश्शिय्याह खास थियो। यिसहारी लोकन मरां शलोमोत ते शलोमोतेरे खानदाने मरां यहत। हेब्रोनेरे खानदाने मरां त प्रधान यरिय्याह, दूइयोवं अमर्याह, ट्लेइयोवं यहजीएल ते च़ेवरोवं यकमाम। उज्जीएलेरे खानदाने मरां मीका ते मीकारे खानदाने मरां शामीर थियो। मीकारो ढ्ला यिश्शिय्याह, यिश्शिय्याहेरे खानदाने मरां जकर्याह थियो। मरारी एरां मट्ठां महली ते मूशी, ते याजिय्याहेरू मट्ठू बिनो थियूं। मरारी एरे मट्ठे याजिय्याहेरू बिनो ते शोहम, जक्कूर ते इब्रि थिये। महलीएरू मट्ठू एलीआजर थियूं, ज़ैस कोई मट्ठू न थियूं। कीशेरे खानदाने मां यरहमेल थियो। ते मूशीएरां मट्ठां, महली, एदेर ते यरीमोत थियां। अपने-अपने पूर्वजां केरे घरानेरे मुताबिक इनां लेवी खानदाने मरां थिये। तैनेईं भी अपने ढ्ला हारूनेरे खानदानेरी ज़ेरि दाऊद राज़े ते सादोक ते अहीमेलेक ते याजक ते लेवी केरे पूर्वजां केरे घरानेरे प्रधानां केरे सामने चिट्ठी छ़ेडी, मतलब प्रधानां केरे घरानेरे तैसेरे निकड़े ढ्लाएरे पूर्वजेरे घरानेरे बराबर भोव।
Source notes (2)
- Cross-reference लैव्य. 10:1-2;गिन. 3:4.
- Cross-reference लूक. 1:5.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.