Bhadrawahi Bible
1 इतिहास 23
लेवी लोकन ज़िमेवारी बेंटतां दित्ती
दाऊद राज़ो त बड़ो बुढो भोइ जेवरो थियो, एल्हेरेलेइ तैनी अपनु मट्ठू सुलैमान इस्राएल मुल्खेरो राज़ो बनाव। बादे मां दाऊद राज़े इस्राएलेरे सारे प्रधान ते याजक ते लेवी अकोट्ठे किये। ते ज़ेत्रे लेवी 30 साल ते तैस करां जादे उमरारे थिये, तैन केरि गिनती की, ते तैना 38000 थी।1 तैन मरां 24000 त यहोवारे भवने मां कम च़लानेरे लेई च़ुन्ने जे, ते 6000 अधिकारी ते न्यायी च़ुने। ते 4000 भवनेरे पहरदार च़ुने, ते 4000 तैना बाज़े बज़ेइतां यहोवारी आराधना केरनेरे लेई च़ुने, ज़ैना दाऊदे आराधना केरनेरे लेई बनेवरे थिये।2 फिरी दाऊदे तैना गेर्शोन, कहात ते मरारी नंव्वेरे लेवी एरे मट्ठां केरे मुताबिक टोलन मां अलग-अलग किये।
गेर्शोनी लोकन मरां त लादान ते शिमी थिये। ते लादानेरां मट्ठां: बड्डो यहीएल, फिरी जेताम ते योएल, इना ट्लाई थियां। शिमीएरां मट्ठां: शलोमीत, हजीएल ते हारान, इनां ट्लाई थियां। लादानेरे कुलां केरे पूर्वजां केरे घरानेरे प्रधान इनां थिये। फिरी शिमीएरां मट्ठां: यहत, जीना, यूश, ते बरीआ, शिमीएरां इन्ना च़ेवर मट्ठां थियां। यहत बड्डो थियो, ते दूइयोवं जीजा। यूश ते बरीआरां हछां मट्ठां न भोआं, एस वजाई सेइं तैना सारे मिलेइतां पूर्वजां केरो अक घरानेरो भोव।
कहातेरां च़ेवर मट्ठां, अम्राम, यिसहार, हेब्रोन ते उज्जीएल थियां। अम्रामेरां मट्ठां हारून ते मूसा थिये। हारून त एल्हेरेलेइ अलग कियोरो थियो, कि तै ते तैसेरी औलाद हमेशा परमपवित्र चीज़ां च़ाढ़न, ते हमेशा यहोवारे सामने गुग्गल बालनेरे लेई ते तैसेरी सेवा केरन, ते तैसेरे नंव्वें सेइं बरकत देते रान। पन परमेशरेरे भक्त मूसेरां मट्ठां केरां नंव्वां लेवी केरे गोट्ले मां गना जेआं। मूसेरां मट्ठां, गेर्शोम ते एलीएजेर। ते गेर्शोमेरू मट्ठू शबूएल प्रधान थियूं। एलीएजेरेरां मट्ठां: रहब्याह प्रधान थियो। ते एलीएजेरू होरू कोई मट्ठू न भोवं, पन रहब्याहेरां बड़ां मट्ठां भोआं। यिसहारे मट्ठन मरां शलोमीत प्रधान थियो। हेब्रोनेरां मट्ठां: यरिय्याह प्रधान, दूइयोवं अमर्याह, ट्लेइयोवं यहजीएल ते च़ेवरोवं यकमाम। उज्जीएलेरां मट्ठन मरां प्रधान त मीका ते दूइयोवं यिश्शिय्याह थियो।
मरारी एरां मट्ठां, महली ते मूशी थियां। महली एरां मट्ठां एलीआजर ते कीश थियां। एलीआजर मेरि जेव, तैस कोई मट्ठू न भोवं सिर्फ कुइयां भोइ। ते कीशेरे मट्ठेईं ज़ैना तैन केरे रिश्तेदार थिये तैनेईं तैन कुइयन सेइं ड्लाह बनाव। मूशीएरां मट्ठां: महली, एदेर, ते यरेमोत, इनां ट्लाई थियां।
लेवी पूर्वजां केरे घराना केरे प्रधान मड़द एना थिये, इनां नंव्वां घिन्तां, हर एक्की मड़देरी गिनती की, ज़ैना 20 साल ते तैस करां जादे उमरारे थिये, ते यहोवारे भवने मां सेवा केरते थिये। किजोकि दाऊदे ज़ोवं, “इस्राएलेरे परमेशर यहोवा अपने लोकन आराम दित्तोरोए, कि तैना यरूशलेम नगरे मां हमेशा रेई बटन। ते लेवी लोकन तेम्बु ते तैसेरे सेवारू सामान फिरी छ़ूनू न पेलू।”3 किजोकि दाऊदेरे पेइले हुक्मेरे मुताबिक 20 साल या तैस करां जादे उमरारे लेवी केरि गिनती कियोरी थी। किजोकि तैन केरू कम त हारूनेरे खानदानेरी मद्दत केरनी थी, मतलब इन कि तैना अंगने मां ते कमरन मां, ते सारे पवित्र चीज़ां शुद्ध केरने ते परमेशरेरे भवनेरी सेवारे सारां कम्मां ते सेवा केरन। ते च़ाढ़नेरे रोट्टी केरि, अन्नबेलरे मैदेरो, ते बगैर खमीरेरी पैपड़ी केरि, ते तव्वे पुड़ पकानेरू ते सन्नोरू, ते नापनेरू ते तुलनेरू ते हर किसमेरू कम केरन। ते रोज़ झ़ेझ़ां ते ड्लवझ़ां यहोवारे सामने शुक्र ते तारीफ़ केरनेरे लेई खड़े रान। ते आरामेरे दिहाड़े ते नंव्वें चाँदेरे दिहाड़े, ते तिहारां केरि गिनतरे मुताबिक रोज़ यहोवारे लेई सब होमबलि च़ाढ़ते रान। ते यहोवारे भवनेरी सेवारे बारे मां मिलापे बाले तेम्बु ते पवित्र ठारारी हिफाज़त केरन, ते अपने ढ्लाए हारूनेरे खानदानेरे लोकन दित्तोरे कम्मे ध्याने सेइं केरन।4
Source notes (4)
- Cross-reference गिन. 4:3,23,30.
- Cross-reference निर्ग. 18:3-4.
- Cross-reference गिन. 1:50-53;3:21-37;4:15;व्यव. 10:8.
- Cross-reference गिन. 18:3-5.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.