Bhadrawahi Bible
1 इतिहास 22
तैखन दाऊद ज़ोने लगो, “यहोवा परमेशरेरो भवन ईए आहे, ते इस्राएलेरे लेई होमबलि देनेरी वेदी ई आहे।”
भवन बनानेरी तियारी
तैखन दाऊद राज़े इस्राएलेरे मुल्खे मां ज़ैना परदेशी थिये तैना यरूशलेम नगरे मां अकोट्ठे केरनेरो हुक्म दित्तो, ते परमेशरेरो भवन बनानेरे लेई किछ घोड़ तराशने बाले च़ुने। फिरी दाऊदे फाटकां केरे दारां केरे किल्लां ते कब्ज़ां केरे लेई बड़ू लोंह, ते तोले करां जादे पितल, ते गिनती करां बेइर गैइड़ेरे बुट्टेरी लकड़ी अकोट्ठी की; किजोकि सीदोन ते सोर नगरेरे लोकेईं दाऊदे कां बड़े गैइड़ेरे बुट्टां केरि लकड़ी आनोरी थी। ते दाऊदे सोचू, “मेरू मट्ठू सुलैमान निकड़ू ते तैस कोई अनुभव नईं, ते ज़ै भवन यहोवारे लेई बनानो आहे, तै बड़ो शानदार ते सारे मुल्खन मां मुशूर ते शोभने बालो लोड़े। एल्हेरेलेइ अवं तैसेरे लेई तियारी केरेलो।” ते दाऊदे मरने करां पेइले भवन बनानेरे लेई बड़ू सामान अकोट्ठू कियूं।
फिरी एक्सां तैनी अपनु मट्ठू सुलैमान कुजेइतां इस्राएलेरे परमेशर यहोवारे लेई भवन बनानेरो हुक्म दित्तो। दाऊदे अपने मट्ठे सुलैमाने सेइं ज़ोवं, “मेरो इरादो त थियो कि अपने परमेशर यहोवारो अक भवन बनेइं। पन यहोवा मीं सेइं ज़ोवं, ‘तीं बड़ो खून बगेवरोए ते बेड़ी-बेड़ी जंगां लेड़ोरीन, एल्हेरेलेइ तू मेरो भवन न बनेई सकेलो, किजोकि तीं ज़मीनी पुड़ मेरी नज़री मां बड़ो खून बगेवरोए। हेर, तेरू अक मट्ठू भोल्हु, ज़ै शान्त मड़द भोल्हो। ते अवं तैस च़ेवरे पासां केरे दुश्मन्न करां आराम देइलो। तैसेरू नवं त सुलैमान भोल्हु, ते तैसेरे राज़ केरनेरे दिहाड़न मां अवं इस्राएले शान्ति ते आराम देइलो। तैए मेरो भवन बनालो। ते तैन्ने मेरू मट्ठू भोल्हु ते अवं तैसेरो बाजी भोल्हो, ते तैसेरो तखत अवं इस्राएले मां हमेशारे लेई कायम केरेलो।’ दाऊदे इन भी ज़ोवं, हुनी हे मेरा मट्ठा, यहोवा तीं सेइं साथी राए, ते तू तैस वचनेरे मुताबिक ज़ैन तेरे परमेशर यहोवा तेरे बारे मां ज़ोवरूए, तैसेरो भवन बनाने मां कामयाब भोस। हुनी यहोवा तीं अक्ल ते समझ़ दे ते इस्राएलेरो अधिकारी भोस, ते तू अपने परमेशर यहोवारो कानून मन्तो रास। ज़ैखन तू तैन विधन ते नियमन पुड़ च़लनेरी एहतियात केरेलो तैखन तू कामयाब भोल्हो, ज़ैन केरो हुक्म यहोवा इस्राएली लोकां केरे लेई मूसा दित्तोरो थियो। हिम्मत रख ते मज़बूत भो। डर न, ते तेरो मन उदास न भोए। शुन, मीं अपनि मेहनतरे वक्त यहोवारे भवनेरे लेई 35 लख किल्लो सोन्नू, ते ट्लाई करोड़ किल्लो चाँदी, ते पितल ते लोंह एत्रू अकोट्ठू कियूं, कि जादे भोनेरे वजाई सेइं तोले करां बेइरे; ते लकड़ी ते घोड़ मीं अकोट्ठे कियोरेन, ते तू होरे भी अकोट्ठे केरां। ते तीं कां बड़े कारीगिरन, मतलब घोड़ ते लकड़ी कटनेबाले ते तराशने बाले ते हर किसमेरे कम्मेरे लेई माहिर कारीगिर। सोन्नू, चाँदी, पितल ते लोंहेरी कोई गिनती नईं, त तू तैस कम्मे मां लेग्गी गा! यहोवा तीं सेइं साथी हर वक्त राए।”
फिरी दाऊदे इस्राएलेरे सारे प्रधान्न अपने मट्ठे सुलैमानेरी मद्दत केरनेरे लेई हुक्म एन ज़ोइतां दित्तो, “कुन तुश्शो परमेशर यहोवा तुसन सेइं साथी नईं? कुन तैनी तुसन च़ेवरे पासना अराम नईं दित्तोरो? तैनी त मुल्खेरे रानेबाले मेरे कब्ज़े मां कियोरेन। ते मुल्ख यहोवा ते तैसेरे लोकां केरे सामने दब्बो जेवरोए। हुनी तने मने सेइं अपने परमेशर यहोवा कां गांते राथ, ते मन लेइतां यहोवा परमेशरेरो पवित्र भवन बनानो, कि तुस यहोवारे करारेरो सन्दूख ते परमेशरेरां पवित्र भांडां तैस भवने मां आनां ज़ै भवन यहोवारे लेई बन्ने बालोए।”
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.