Bhadrawahi Bible
1 इतिहास 21
दाऊद राज़ेरे ज़िरिये इस्राएलेरी केरि गिनती
एक्सां शैताने इस्राएलेरे खलाफ उठतां, दाऊद उकसव कि इस्राएली केरि गिनती केरे। तैखन दाऊदे योआब ते इस्राएली केरे प्रधान्न हुक्म दित्तो, “तुस गेइतां बेर्शेबा नगरे करां लेइतां दान नगरे तगर इस्राएली केरि गिनती केरतां मीं सेइं ज़ोथ, ते मीं पतो च़ले कि तैना केत्रे आन।” पन योआबे ज़ोवं, “यहोवारे लोक चाए केत्रे किना भोन, तै तैन शौ गुणा बधाए। पन हे मेरे मालिक! हे राज़ा! कुन तैना सारे राज़ेरे अधीन नईं? मेरो मालिक एरी गल किजो चाते? तै इस्राएले पुड़ दोष लगनेरी वजा किजो बने?” फिरी भी राज़ेरो हुक्म योआबे मन्नो पेव। तैखन योआबे गेइतां सारे इस्राएल मुल्खे मां गेइतां गिनती की ते यरूशलेम नगरे जो वापस अव। तैखन योआबे लोकां केरि गिनती दाऊदे शुनाई ते सारे तलवार च़लनेबाले सिपाही इस्राएलेरे 1100000, ते यहूदारे 470000 निस्से। पन तैन मां योआबे लेवी ते बिन्यामीनी न गने, किजोकि योआब राज़ेरो हुक्म मन्ने सेइं राज़ी न थियो।
ते दाऊदेरो ऐह हुक्म परमेशरे बुरो लग्गो, एल्हेरेलेइ तैनी इस्राएले सज़ाह दित्ती। ते दाऊदे परमेशरे कां प्राथना की, “इन कम ज़ैन मीं कियूं, तै बड़ो पापे। पन हुनी अपने दासेरो अधर्म माफ़ केर। मीं त बड़ी बेवकूफी कियोरीए।” तैखन यहोवा दाऊदेरे नेबी गादे सेइं ज़ोवं, “गेइतां दाऊदे सेइं ज़ो, ‘यहोवा इन ज़ोते कि अवं तीं ट्लाई आफतां हिराताईं, तैन मरां अक च़ुन, कि अवं तैस तीं पुड़ छ़ेडी।’” तैखन गादे दाऊदे कां गेइतां तैस सेइं ज़ोवं, “यहोवा इन ज़ोते, कि इन ट्लाई आफतन मरां ज़ैस तू चास तैस च़ुन: या त ट्लाई साल काल पे; या ट्लाई महीन्न तगर तेरे दुश्मन तेरो पीछो केरते रान, ते तेरे दुश्मना केरि तलवार तीं पुड़ च़लती राए। या ट्लाई दिहाड़न तगर यहोवारी तलवार च़ले, मतलब तेरे मुल्खे मां मरी फैले ते यहोवारो दूत इस्राएलेरे च़ेवरे पासन नाश केरतो राए। हुनी सोच, कि अवं अपने भेज़ने बाले यहोवा कुन जुवाब देईं।” तैखन दाऊदे गादे सेइं ज़ोवं, “अवं बड़े मुसीबती मां फसोरोइं। अवं यहोवारे हथ्थे मां पेलो। किजोकि तैसेरी दया बड़ीए; पन मैन्हेरे हथ्थे मां न पेनू पे।”
तैखन यहोवा इस्राएले मां मरी फैलाई, ते 70000 इस्राएली मरे। फिरी यहोवा अक दूत यरूशलेम नगरेरो नाश केरनेरे लेई भी भेज़ो; ते तै नाश केरने पुड़ थियो, कि यहोवा तैस दुख देने करां अफ़सोस भोव, ते तैनी नाश केरनेबाले दूते सेइं ज़ोवं, “बस केर; हुनी अपनो हथ पत्रोवं केर।” ते यहोवारो दूत यबूसी ओर्नानेरे खलाड़ी मां खड़ो थियो। ते दाऊदे हेरू कि यहोवारो दूत अम्बर ते धेरतरे मझ़ाटे खड़ोए ते अक नग्गी तलवार तैसेरे हथ्थे मांए, ते यरूशलेम नगरेरे पासे रख्खोरीए, तैखन दाऊद ते इस्राएली बुज़ुर्ग टाट1 पलेटतां तुत्तरेरे भारे तल्ले मां झुके। तैखन दाऊदे परमेशरे कां प्राथना की, “ज़ैनी लोकां केरि गिनती केरनेरो हुक्म दित्तोरो थियो, तै कुन अवं नईं? हाँ, ज़ैनी पाप कियो ते बड़ी बुराई कियोरीए, तै त अवं आईं। पन एन बेकसूर लोकेईं कुन कियोरूए ज़ैना गब्बां केरे ज़ेरे आन? एल्हेरेलेइ हे मेरे परमेशर यहोवा! तेरो हथ मेरे बाजी केरे घरानेरे खलाफ भोए, पन तेरे लोकां केरे खलाफ न भोए, कि तैना मारे गान।”
तैखन यहोवारे दूते गाद नेबी दाऊदे सेइं एन ज़ोनेरो हुक्म दित्तो कि दाऊद यबूसी ओर्नानेरे खलाड़ी मां यहोवारे लेई अक वेदी बनाए। गादेरे इस वचनेरे मुताबिक ज़ै तैनी यहोवारे नंव्वे सेइं ज़ोवरो थियो, दाऊद उबरे जेव। तैखन ओर्नाने पत्रोवं मुड़तां तक्कू ते दूत लाव ते तैसेरां च़ेवरे मट्ठां ज़ैना तैस सेइं साथी थियां छ़ेप्पी जेआं, ओर्नान त गेहुं मडनेरे लगोरो थियो। ज़ैखन दाऊद ओर्नाने कां पुज़्ज़ो, तैखन ओर्नाने दाऊद लाव ते खलाड़ी करां बेइर गेइतां ज़मीनी पुड़ दाऊदे कां झुको। तैखन दाऊदे ओर्नाने सेइं ज़ोवं, “ई खलाड़ मीं मुल्ले दे, कि अवं इड़ी यहोवारे लेई अक वेदी बनेइं, तैसेरी पूरी कीमत नेइतां मीं दे, कि ई आफत लोकन पुड़ेरां दूर की गाए।” ओर्नाने दाऊदे सेइं ज़ोवं, “एस ने, ते मेरे मालिक राज़े ज़ैन किछ ठीक लगते तैन्ने केरे। शुन, अवं तीं होमबलि देनेरे लेई दांत ते कैड़ु ते मडनेरे लेई संदरां ते अन्नबलि देनेरे लेई गेहुं, इन सारू अवं तीं देताईं।” पन दाऊद राज़े ओर्नाने सेइं ज़ोवं, “नईं, अवं ज़रूर इसेरी पूरी कीमत देइतां नेइलो। ज़ैन तेरूए, तैस अवं यहोवारे लेई न नेइलो, ते मुफते मां होमबलि न च़ैढ़ेलो।” तैखन दाऊदे तैस जगारे लेई ओर्नाने लगभग सत किल्लो सोन्नू तुलतां दित्तू। तैखन दाऊदे तैड़ी यहोवारे लेई अक वेदी बनाई ते होमबलि ते मेलबलि च़ैढ़तां यहोवा कां प्राथना की, ते होमबलि देनेरे वेदी पुड़ सुर्गेरां अग उतैरतां तैसेरी प्राथना शुनी। तैखन यहोवा दूते हुक्म दित्तो। ते तैनी अपनि तलवार फिरी म्याने मां रख्खी।
एन हेरतां कि यहोवा यबूसी ओर्नानेरे खलाड़ी मां मेरी प्राथना शुनोरीए, दाऊदे तैस्से वक्ते तैड़ी बलिदान कियूं। यहोवारो तेम्बु ज़ै मूसा सुनसान ठैरी मां बनेवरो थियो, ते होमबलि देनेरी वेदी, इनां दूईये तैस मौके गिबोन नगरेरे उच्ची जगाई पुड़ थी। पन दाऊद परमेशरे कां तैसेरे सामने न गेइ बटो, किजोकि तै यहोवारे दूतेरी तलवारी करां डेरि जेवरो थियो।
Source notes (1)
- Footnote टाट टाट छ़ेल्ली केरे ज़ड़न सेइं बनाते थिये, तैस लानेरो ई मतलब थियो कि मातम या दुख बांदो केरनेरो निशान थियो।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.