Bhadrawahi Bible
1 इतिहास 12
दाऊदेरे बिन्यामीनी मद्दतगार
ज़ैस वक्ते दाऊद सिकलग नगरे मां कीशेरे मट्ठे शाऊल राज़े करां डेरतां छ़पोरो रहतो थियो, तैखन इनां सिपाही तैड़ी आए, ते इनां तैन शूरबीर बहादरन मरां थिये ज़ैना जंगी मां तैसेरी मद्दत केरनेबाले थिये। इनां तीर च़लानेबाले थिये, ज़ैना देइने-बांए, दूईये हथेइं सेइं छ़िंगलोटे सेइं घोड़ ते धनुषे सेइं तीर च़लेइ सखते थिये। ते एना शाऊलेरे भियालन मरां बिन्यामीनी थिये, प्रधान त अहीएजेर ते दूइयोवं योआश थियो ज़ैन गिबा नगरेरे रानेबाले शमाआरू मट्ठू थियूं। फिरी अज्मावेतेरां मट्ठां यजीएल ते पेलेत, फिरी बराका ते अनातोती येहू, ते गिबोनी यिशमायाह ज़ै 30 बहादरन सिपेहिन मरां अक थियो ते तैन केरो प्रधान भी थियो। फिरी यिर्मयाह, यहजीएल, योहानान, गदेरा नगरेरो रानेबालो योजाबाद, एलूजै, यरीमोत, बाल्याह, शेमर्याह, हारूपी शपत्याह, एल्काना, यिश्शिय्याह, अजरेल, योएजेर, याशोबाम, ज़ैना सारे कोरह खानदाने मरां थिये, ते गदोर नगरेरे यरोहामेरां मट्ठां योएला ते जबद्याह। ज़ैखन दाऊद सुनसान ठारारे क़िले मां रहतो थियो, तैखन इनां गाद गोट्ले मरां ज़ैना शूरबीर बहादर थिये, ते जंग केरनी शिखतां ते ढाल ते बलम इस्तेमाल केरनेबाले थिये, ते तैन केरां तुत्तरां शेरां केरां ज़ेरां थियां ते तैना पहाड़ी हिरनां केरे ज़ेरे तेज़ दौड़ने बाले थिये, इनां ते गादी लोकन अलग भोइतां तैस कां आए। प्रधान त एजेर, दूइयोवं ओबद्याह, ट्लेइयोवं एलीआब, च़ेवरोवं मिश्मन्ना, पंच़ोंव यिर्मयाह, शेइयोवं अत्तै, सत्तोवं एलीएल, अठोवं योहानान, नंव्वोवं एलजाबाद, दशोवं यिर्मयाह ते यारोवं मकबन्नै थियो, इनां गादी प्रधान शूरबीर बहादर थिये, तैन मरां ज़ै सेभन करां निकड़ो थियो तै 100 सिपेही केरो, ते ज़ै सेभन करां बड्डो थियो, तै 1000 सिपेही केरो सेनापति थियो। इना तैना आन, ज़ैना पेइले महीने मां ज़ैखन यरदन दरिया भरपूर बहावे पुड़ बगतो थियो, तैखन तैसेरे पार जे। ते पूर्व ते पश्चिम दूईये पासां केरे रानेबाले कढे। किछ बिन्यामीनी ते यहूदी भी दाऊदे कां क़िले मां आए। तैन सेइं मिलनेरे लेई दाऊद निस्सो ते तैन सेइं ज़ोवं, “अगर तुस मीं कां दोस्तेरे ज़ेरे मेरी मद्दत केरने एवरेथ, त मेरो मन तुसन सेइं लगोरो रालो। पन अगर तुस मीं धोखे सेइं दुश्मन्न करां ट्लुवांने एवरेथ, त इश्शे पूर्वजां केरो परमेशर इस पुड़ नज़र केरतां सज़ाह दे, किजोकि मीं कोई बुराई न कियोरी।” तैखन परमेशरेरो आत्मा अमासै पुड़ अव, ज़ै 30 बहादरां केरो प्रधान थियो, ते तैनी ज़ोवं,
“हे दाऊद! असां तेरे अहम।
हे यिशैरे मट्ठा! असां तेरे पासे अहम,
तीं सुखे सुख भोए, ते तेरे मद्दत केरनेबालन भी सुख भोए,
किजोकि तेरो परमेशर तेरी मद्दत केरि राहोरोए।”
एल्हेरेलेइ दाऊदे तै रख्खो, ते एपनी सेनारे सेनापति बनाए। फिरी किछ मनश्शेई भी तैस मौके दाऊदे कां नेशतां आए, ज़ैखन तै पलिश्तन सेइं साथी भोइतां शाऊले सेइं जंग केरने जेव, पन तै तैसेरी किछ मद्दत न केरि सको, किजोकि पलिश्ती केरे राज़ेईं सलाह मुशोरो केरतां तै वापस भेज़ोरो थियो, “तै इश्शी क्रोड़ी कटेइतां अपने मालिक शाऊले सेइं फिरी मिलेलो।” ज़ैखन दाऊद सिकलग नगरे जो गेइ राहोरो थियो, तैखन इनां मनश्शेई तैस कां नेशतां एवरे थिये: अदनह, योजाबाद, यदीएल, मीकाएल, योजाबाद, एलीहू ते सिल्लतै ज़ैना मनश्शेई केरे हज़ार सिपेही केरे सेनापति थी। तैनेईं लुटेरां केरे टोली केरे खलाफ दाऊदेरी मद्दत कियोरी थी, किजोकि इना सब शूरबीर थिये, एल्हेरेलेइ तैना दाऊदेरे सेनारे प्रधान भी बेनि जे। एन्च़रे सेइं रोज़ लोक दाऊदेरी मद्दत केरनेरे लेई तैस कां एइते राए, इड़ी तगर कि परमेशरेरी सेनारी ज़ेरि अक बड़ी सेना बेनि जेई।
फिरी लोक लड़नेरे लेई हथियार बेन्धतां हेब्रोन नगरे मां दाऊदे कां एल्हेरेलेइ आए कि यहोवारे वचनेरे मुताबिक शाऊलेरू राज़ तैसेरे सुपुर्द केरन। तैन केरे प्रधानां केरि गिनती ई आहे। यहूदारे गोट्ले मरां ढाल ते भाले नेइतां 6800 हथियारन बाले लड़नेरे लेई आए। शिमोनेरे गोट्ले मरां 7100 तियार शूरबीर लड़ने जो आए। लेवी गोट्ले मरां 4600 आए। ते हारूनेरे घरानेरो प्रधान यहोयादा थियो, ते तैस सेइं साथी 3700 सिपाही आए। ते सादोक नंव्वेरो अक जुवान बहादर भी अव, ते तैसेरे बाजी केरे घरानेरे 22 प्रधान आए। ते शाऊलेरे भियाल बिन्यामीन गोट्लेरे सिपेहिन मरां 3000 आए, किजोकि तैस मौके तगर अधे बिन्यामीनी सिपेहिन करां जादे शाऊलेरे घरानेरे वफादार थिये। फिरी एप्रैम गोट्लेरे सिपेहिन मरां बड़े बहादर अपने-अपने पूर्वजां केरे घराने मां मुशूर 20800 जंग लड़नेबाले आए। मनश्शेरे अधे गोट्ले मरां दाऊद राज़ो बनानेरे लेई 18000 सिपाही आए, ज़ैन केरां नंव्वां ज़ोआं जेवरां थियां। इस्साकार गोट्लेरे सिपेहिन मरां ज़ैना वक्ते पिशानते थिये, कि इस्राएले कुन केरनू ठीके, तैन केरे प्रधान 200 थिये। ते तैन केरे सारे भियाल तैन केरो हुक्म मन्ते थिये। फिरी जबूलूनेरे गोट्ले मरां जंग केरनेरे लेई हर किसमेरे हथियार नेइतां ते जंग लड़नेरे लेई तिहार शूरबीर बहादर 50000 आए, तैना मुकाबलो केरनेबाले थिये ते चंचल न थिये। फिरी नप्ताली गोट्ले मरां 1000 सेनापति, ते तैन सेइं साथी ढाल ते भाले ट्लेइतां 37000 सिपाही आए। दानेरे गोट्ले मरां 28600 जंग लड़नेरे लेई तियार सिपाही आए। ते आशेरेरे गोट्ले मरां 40000 जंग लड़नेरे लेई तियार सिपाही आए। ते यरदन दरियारे पार रानेबाले रूबेन, गाद गोट्लन ते मनश्शेरे अधे गोट्ले मरां जंग केरनेरे हर किसमेरे हथियार ट्लेइतां 120000 सिपाही आए।
इन सब जंग केरनेरे लेई तियार दाऊदे सारे इस्राएली लोकां केरो राज़ो बनानेरे लेई हेब्रोन नगरे मां अपने मेर्ज़ी सेइं आए, ते बाकी सब इस्राएली भी दाऊदे राज़ो बनानेरे लेई राज़ी थिये। सिपाही तैड़ी ट्लाई दिहाड़े दाऊदे सेइं साथी खाते पीते राए, किजोकि तैन केरे भियालेईं तैन केरे लेई रोट्टरी तियार कियोरी थी। ते ज़ैना तैन केरे नेड़े बल्के इस्साकार, जबूलून ते नप्ताली प्रादेशन तगर रहते थिये, तैनेईं भी गधन, ऊँटन, खचरन ते दांतन पुड़ मैदो, फैगू ते किशमिशेरी टिकी, दाछ़रो रस, तेल ते खानेरी चीज़ां लेदतां एन्हीं, ते बड़े दांत ते बड़ां गब्बां आनां। किजोकि इस्राएल मुल्खे मां आनन्द मनाने लगोरे थिये।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.