Bhadrawahi Bible
1 इतिहास 11
दाऊद सारे इस्राएलेरो राज़ो बनाव जेव
तैखन सारे इस्राएली दाऊदे कां हेब्रोन नगरे मां अकोट्ठे भोइतां ज़ोने लगे, “शुन, तू ते अस लोक भियाल अहम। बीतोरे वक्ते मां ज़ैखन शाऊल राज़ो थियो, तैखन भी इस्राएली लोकां केरो अगुवो तूए थियो, ते तेरे परमेशर यहोवा तीं सेइं ज़ोवं, ‘मेरे लोक इस्राएलेरो पुहाल, ते मेरे लोक इस्राएली केरो प्रधान, तूए भोल्हो।’”1 एल्हेरेलेइ सारे इस्राएली प्रधान हेब्रोन नगरे मां दाऊद राज़े कां आए, ते तैनी तैन सेइं हेब्रोन नगरे मां यहोवारे सामने करार कियो। ते तैनेईं यहोवारे वचनेरे मुताबिक, ज़ैन तैनी शमूएल नेबी सेइं ज़ोवरू थियूं, इस्राएलेरो राज़ो बन्नेरे लेई दाऊदेरू अभिषेक कियूं।
तैखन सारे इस्राएली सेना समेत दाऊद यरूशलेम नगरे मां जेव, ज़ैस जो यबूस भी ज़ोते थिये, ते तैड़ी यबूसी लोक तैस मुल्खे मां रहते थिये। तैखन यबूसेरे रानेबालेईं दाऊदे सेइं ज़ोवं, “तू इड़ी एज्जी न बटेलो।” फिरी भी दाऊदे सिय्योन नंव्वेरे क़िले पुड़ कब्ज़ो कियो, तैखन करां तैस जो दाऊदपुर भी ज़ोतन। तैसेरां बाद दाऊदे ज़ोवं, “ज़ै कोई यबूसी लोकन सेभन करां पेइले हमलो केरेलो, तैए सेनारो प्रधान सेनापति भोल्हो,” तैखन सरूयाहेरे मट्ठे योआबे सेभन करां पेइलो हमलो कियो ते सेनापति बेनि जेव। तैखन दाऊद तैस क़िले मां राने लगो, एल्हेरेलेइ तैस क़िलेरू नवं दाऊदपुर पेवं। ते तैसेरां बाद तैनी नगरेरे च़ेवरे पासन, मतलब मिल्लो करां लेइतां च़ेवरे पासन अक दिवार खड़ी कराई, ते योआबे बाकी उज़ड़ोरे नगरेरी मरम्मत कराई। ते दाऊद मज़बूत भोतो जेव, ते सेनां केरो यहोवा तैस सेइं साथी थियो।
दाऊदेरे बहादर सिपाही
यहोवा इस्राएलेरे बारे मां ज़ैन वचन ज़ोवरू थियूं, तैसेरे मुताबिक दाऊदेरे ज़ैन शूरबीरेईं सारे इस्राएलन समेत तैसेरे राज़े मां तैसेरे हक्के मां भोइतां, तैस राज़ो बनानेरे लेई ज़ोर दित्तो, तैन मां प्रधान इना आन। दाऊदेरे शूरबीरां केरां नंव्वां इनां आन, अक हक्मोनी एरू मट्ठू याशोबाम ज़ै 30 सिपेही केरो प्रधान थियो, तैनी एक्की जंगी मां 300 दुश्मन भाले सेइं मारे।
तैसेरां बाद अहोही दोदोएरू मट्ठू एलीआजर ज़ैन ट्लाई महान शूरबीरन मरां अक थियूं। तै पसदम्मीम नंव्वेरी ठैरी ज़ैड़ी जौआं केरू अक ऊडार थियूं, दाऊदे सेइं साथी राव ज़ैड़ी पलिश्ती जंग केरनेरे लेई अकोट्ठे भोवरे थिये, ते इस्राएली सेना पलिश्ती सेनारे सामनेरां नेश्शी जेवरी थी। तैखन एलीआजर ते दाऊद तैस उडारेरे मझ़ाटे खड़े भोइतां तैसेरी हिफाज़त की, ते पलिश्ती मारे, ते यहोवा तैन ज़ींत दित्ती।
एक्की बार 30 खास शूरबीरन मरां ट्लाई ज़ने दाऊदे कां चट्टानी कां अदुल्लाम कुढी मां आए, ते पलिश्ती केरे डेरे तैस वक्त रपाईम नंव्वेरे वैदी मां लगोरे थिये। तैस वक्ते दाऊद क़िले मां थियो, ते पलिश्ती केरि अक चौवकी बैतलहम नगरे मां थी। एक्सां दाऊदे बड़ी ट्लिश लग्गी ते तैने ज़ोवं, “कौन मीं बैतलहम नगरेरे फाटकेरे खुहेरू पानी पियालो।” एल्हेरेलेइ तैना ट्लाईए शूरबीर पलिश्ती केरे डेरन पुड़ ट्लुटी जे ते बैतलहम नगरेरे फाटकेरे खुहे मरां पानी भेरतां दाऊदे कां आए। पन दाऊदे पीने करां इन्कार कियो ते यहोवारे सामने च़ढ़तल केरतां उलटाव। ते तैनी ज़ोवं, “मेरो परमेशर मीं करां ऐन केरनू दूर रख्खे। इन पानी इन मैन्हु केरे खूनेरू ज़ेरू कीमतीए।” एल्हेरेलेइ तैनी तैन पानी पीने करां इन्कार कियो। इन ट्लाईए बहादरेईं एन बड्डू कम कियूं।
अबीशै ज़ै योआबेरो ढ्ला थियो, तै ट्लाई शूरबीरन मरां प्रधान थियो। तैनी अपने भाले सेइं 300 दुश्मन मारे ते ट्लाई शूरबीरन मां मुशूर भोइ जेव। दूइयोवं तैन ट्लिहन मां तै बड़ो इज़्ज़तदार थियो, ते तैन केरो प्रधान भोइ जेव, पन पेइले खास माहिर ट्लेइयां केरे पदे कां न पुज़्ज़ो।
यहोयादारू मट्ठू बनायाह थियूं, ज़ैन कबसेल नगरेरे एक्की बहादरेरू मट्ठू थियूं, ज़ैनी बडां-बडां कम्मां कियोरां थियां, तैनी शेरेरे ज़ेरे दूई मोआबी मारोरे थिये, ते एक्सां शेजाई मां एक्की खड्डे मां गेइतां अक शेर मारो। फिरी तैनी अक पंच़ हथ लम्मो झम्मो मिस्री मैन्हु मारो, ते तैस मिस्री मैन्हेरे हथ्थे मां ज़ुलाहेरे डण्डेरो ज़ेरो भालो थियो, पन बनायाह अक सोटी ट्लेइतां तैस कां जेव, ते मिस्री मैन्हेरे हथ्थे मरां भालो थुसोड़तां तैस्से भाले सेइं तै मारो। एरां-एरां कम्मां केरतां यहोयादारू मट्ठू बनायाह तैन ट्लाईए शूरबीरन मां नामी भोइ जेव। तै त 30 मां बड़ो मुशूर थियो, पन तै ट्लेइयां केरे दर्जे तगर न पुज़्ज़ो। तै दाऊदे अपने अंगरक्षकां केरो प्रधान बनाव।
फिरी दाऊदेरे सेनारे दलां केरे शूरबीर इनां थिये, योआबेरो ढ्ला असाहेल, बैतलहम नगरेरे रानेबाले दोदोएरू मट्ठू एल्हनान, हरोरी शम्मोत, पलोनी हेलेस, तकोई इक्केशेरू मट्ठू ईरा, अनातोती अबीएजेर, सिब्बकै हूशाई, अहोही ईलै, महरै नतोपाई, अक होरो नतोपाई बानाहरू मट्ठू हेलेद, बिन्यामीनी केरे गिबा नगरेरे रानेबाले रीबैरू मट्ठू इत्तै, पिरातोनी बनायाह, गाशेरे नालन कां रानेबाले हूरै, अराबा मां रानेबालो अबीएल, बहूरीमी अज्मावेत, शालबोनी एल्यहबा, गीजोई हाशेमेरां मट्ठां, फिरी हरारी शागेरू मट्ठू योनातान, हरारी साकारेरू मट्ठू अहीआम, ऊरेरू मट्ठू एलीपाल, मकेराई हेपेर, पलोनी अहिय्याह, कर्मेली हेस्रो, एज्बैरू मट्ठू नारै, नातानेरो ढ्ला योएल, हग्री एरू मट्ठू मिभार, अम्मोनी सेलेक, बेरोती नहरै ज़ैन सरूयाहेरू मट्ठू योआबेरे हथियार च़लानेबालू थियूं, येतेरी ईरा ते गारेब, हित्ती ऊरिय्याह, अहलैरू मट्ठू जाबाद, शूरबीर 30 समेत रूबेनी शीजारू मट्ठू अदीना ज़ै रूबेनी केरो प्रधान थियो। माकारू मट्ठू हानान, मेतेनी योशापात, अश्तारोत नगरेरे उज्जियाह, अरोएर नगरेरे होतामेरू मट्ठू शामा ते यीएल, शिम्री एरू मट्ठू यदीएल ते तैसेरो ढ्ला तीसी, योहा, महवीमी एलीएल, एलनामेरू मट्ठू यरीबै ते योशव्याह, मोआबी यित्मा, एलीएल, ओबेद ते मसोबाई यासीएल।
Source notes (1)
- Cross-reference मत. 2:6;भज. 78:71.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.