Bhadrawahi Bible
1 इतिहास 13
पवित्र सन्दूख यरूशलेम नगरे मां पुज़व गानो
किछ वक्तेरां बाद दाऊद राज़े अपने सारे सेनापेतन ज़ैना 100 सिपेही ते 1000 सिपेही केरे सेनापति थिये ते सब प्रधान्न सेइं सलाह की। तैखन दाऊदे सारे इस्राएली लोकन सेइं ज़ोवं, “अगर एन तुसन रोड़ू लग्गे त इश्शे परमेशरेरी मर्ज़ी भोए, त इस्राएलेरे सारे इलाकन मां ज़ैना इश्शे भियाल राहोरे भोन ते तैन सेइं ज़ैना याजक ते लेवी अपने-अपने चरागान बाले नगरन मां रहते भोन, तैन जो भी ऐह समाद भेज़म कि असन कां अकोट्ठे भोथ, ते अस अपने परमेशरेरे करारेरो सन्दूख वापस आनम। किजोकि ज़ैस वक्ते शाऊल राज़ो थियो तैस वक्ते अस परमेशरे करां पुछ़नेरे लेई सन्दूखेरे नेड़े न थिये गाते।” ते सारे लोकेईं ज़ोवं, कि तैना एरू केरेले, किजोकि ऐह गल तैन सेभी लोकन ठीक लग्गी।
तैखन दाऊदे मिस्र मुल्खेरे शीहोर दरियाए करां लेइतां हमात नगरेरी वैदी तगर रानेबाले सारे इस्राएली एल्हेरेलेइ अकोट्ठे किये, कि परमेशरेरो सन्दूख किर्यत्यारीम नगरे मरां यरूशलेम नगरे मां आनम। तैखन दाऊद सारे इस्राएली लोकन साथी नेइतां बाला नगरे मां जेव, ज़ैस जो किर्यत्यारीम भी ज़ोते थिये, ते तै ठार यहूदा प्रदेशे मां थी, कि यहोवा परमेशरेरो सन्दूख तैट्ठां आनम। यहोवा त करूबन पुड़ बिशने बालोए, ते तैसेरू नवं भी एन्ने घिन्नू गाते। तैखन तैनेईं परमेशरेरो सन्दूख अबीनादाबेरे घरे मरां कढो ते एक्की नेव्वीं गेड्डी पुड़ च़ाढ़ो, ते उज्जा ते अह्यो तैस गेड्डी च़लाने लगे। दाऊद ते सारे इस्राएली परमेशरेरे सामने तने मने सेइं गीतां ज़ोते ते सितार, सैन्गी, डफली, झ़ेल्ली ते नरशिंगो बज़ाते थिये।
ज़ैखन तैना किदोन नंव्वेरी ठारारे खलाड़ी तगर आए, तैखन दांतन तैड़ी ठोकर लग्गी ते उज्जा अपनो हथ सन्दूख ठमनेरे लेई अग्रोवं कियो। तैखन यहोवारो क्रोध उज्जा पुड़ भड़को। ते यहोवा तै मारो किजोकि तैनी सन्दूखे सेइं हथ लेवरो थियो। तै तैट्ठी परमेशरे सामने मेरि जेव। तैखन दाऊदे बड़ी सरक अई, एल्हेरेलेइ कि यहोवा उज्जा मारोरो थियो। ते तैनी तैस ठारारू नवं पेरेसुज्जा1 रख्खू, इन नवं अज़ तगर आहे। तैस दिहाड़े दाऊद परमेशरे करां डेरतां ज़ोने लगो, “अवं परमेशरेरो सन्दूख अपने कां इड़ी केन्च़रे एन्हीं?” तैखन दाऊदे सन्दूख अपने नगर दाऊदपुरे मां न आनो, पन ओबेदेदोम नंव्वेरे गत नगरेरे राने बालेरे कां नेव। ते परमेशरेरो सन्दूख ओबेदेदोमेरे घरे मां ट्लाई महीने तगर राव, ते तैस दौरान यहोवा ओबेदेदोमेरे घराने पुड़ ते ज़ैन किछ तैसेरू थियूं तैस पुड़ भी बरकत दित्ती।
Source notes (1)
- Footnote पेरेसुज्जा मतलब उज्जारी सज़ाह
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.