Paliya Bible
फीलीपीयो 4:19
Verse 19 is marked below, with the whole chapter around it. Read from the start
वेहवार मे लावण्याण ह़ीकापण
एतरे ए मारा मोंगाळ्ळा भायु अने बेन्या, मारो जीव तमारी हेर करे, जे मारी खुसी अने पागड़ी से, ए मोंगाळ्ळा भायु अने बेन्या, मालीक ईसु मे आहयी रीती सी टेकला रेवो।
मे युओदीया अने सुनतुखे ने बी, ह़मजाड़ु के तीहया मालीक ईसु मे एक मन रेवो। ए मारा खरला हाती, मे तने बी वीन्ती करीन केम के तु तीहया बयरा नी मदत कर, काहाके तीहया मारी ह़ाते खुस-खबर ह़मळाव्वा मे, कलेमेस अने मारा बीजा ह़ाती ह़ाते मेहनत कर्या, आमनु आखा नु नाम भगवान नी अमर जीवाय नी कीताप मे लीखला से।
मालीक मे जलम खुस रेवो; मे अळी केम, खुस रेवो।
तमारी नीचळाय आखा माणहु पोर उजन्ती हये। मालीक छोटोत आव्वा वाळो से। कानी बी वात नी फीकर ना करो; पण आखी वात मे तमारी वीन्ती अने रावण्या नी लारे घण वारु से केता जाय्न भगवान अगळ आवो। तत्यार भगवान नी सांती, जे आखी ह़मज गेथी अलग से, तमारा हीय्या मन ने मसी ईसु मे रखवाळी करहे।
एतरे ए भायु, अने बेन्या जे-जे वात ह़ाचली से, अने जे-जे वात ईज्जत करे एवी से, अने जे-जे वात वारु से, अने जे-जे वात चोखली से, अने जे-जे वात ह़ुबे एवी से, अने जे-जे वात मन ने गमे एवी से, काहाके, जे बी वारला गुण अने वारु केय एवी वात से, तीनी पोर ध्यान लगाड़्या करो। जे वात तमु मारी सी ह़ीक्या, अने आवरी लेदा, अने ह़मळ्या, तीनी पाळनी कर्या करो, तत्यार भगवान जे सांती नो झोर से तमारी ह़ाते रेहे।
दान नी जुगु घणु वारु केम
मे मालीक मे घणो खुस से, के हाव एतरा दाड़ान अळतेण तमारी फीकर मारा बारा मे अळी जाग जेली से; ह़ाचली तमने पेले बी आनु वीच्यार हतु, पण तमने टेम नी जड़ी। आहयु नी के मे आपणी कमी ना कारण आहयु केम; काहाके मे आहयु ह़ीकलु से के जे हालत मे से, तीनी मे, मे खुस से। मे नानो हयवा बी जाणत्लो से अने बड़वा बी जाणत्लो से; आखी वात अने आखी हालत मे आफरवा, भुकलो रेवा, अने बड़वा-घटवा ह़ीकलो से। जे मने सक्ती आपे, तीनी मे मे आखु कंय कर सकत्लो से।
ते बी तमु मारी वेला मे मारो भलो करीन मारा साजल्या बण्या। ए फीलीपीयो, तमु आह़फा बी जाणत्ला से के खुस-खबर पर्च्यार ना सुरु ना दाड़ा मे जत्यार मे मकीदुनीया सी आयो ता तमने सोड़ीन अने कानी मंडळी लेवा-आपवा ना बारा मे मारी मदत नी कर्या। 12आहयी रीते जत्यार मे थीसलुनीकीयो मे हतो; ते बी तमु मारी कमी पुरी करवा नी लेदे एक कावा नी पण वळ-वळीन मदत मोकल्ता र्या। आहयु नी के मे दान लेवा नी हेर करु, पण मे एसवु फोळ चाहु, जे तमारा फायदा नी लेदे बड़तु जाय। मारी पांह आखु कंय से, अने जादा बी से; जे चीज तमने ईपफ्रुदीतुस ना हात सी मोकल्ली हती तीने हात करीन मे धाप ज्यो, तीहयी ते सुख आपण्या गंदायण्या, आवरे एवी बादा से जे भगवान ने गमे। मारो भगवान बी आपणा तीहया धन नी लारे जे बड़ाय भेळ मसी ईसु मे से, तमारी आखी कमी ने पुरी करहे। अमारा भगवान अने बाह नी बड़ाय जलमकी हयतीत रेय। आमीन।
आखरी कावा वारला से के केम
आखा भगवान ना चोखला माणहु ने जे ईसु मसी मे से आवही अने आवजो केवो। जे भाय मार ह़ाते से तमने आवही अने आवजो केय। आखा भगवान ना चोखला माणहु, खास करीन जे केसर ना घोरल्या ना से तमने आवजो अने आवही केय।
अमारा मालीक ईसु मसी नी दया तमारी आत्मा नी ह़ाते रेय।
Source notes (2)
- Cross-reference नेवताळा ना काम 17:1
- Cross-reference 2 कुरन्थी 11:9
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.