Paliya Bible
फीलीपीयो 3
खरली सच्चाय
एतरे ए मारा भाय अने बेन्या, मालीक ईसु मे खुस रेवो। तीहयीत वात तमने वळ-वळीन लीखवा सी मने कंय दुख नी लागतो, अने आञेत तमारी रखवाळी अने भलाय से। कुतरा नी तेवा माणहु सी चेतीन रेवो, गळत काम करवा वाळा सी चेतीन रेवो, मार-कुट करवा वाळा सी चेतीन रेवो। काहाके खतना वाळा ते आमुत से जे भगवान नी आत्मा नी अगवाय ना लारे भगवान नी पुजा करतला, अने ईसु मसी पोर एतरी मोटाय करतला अने आपणा डील नी उपरली रीती-रीवाज पोर भरहो नी करतला। पण मे ते डील पोर बी भरहो राख सकु। कदी काना बीजा ने डील पोर भरहो राखवा नो वीच्यार हय, ता मे तीनी सी बड़ीन राख सकु। 1काहाके आंठवा दाड़े मारु खतनु हयु, मे ईस्रायली माणहु नो अवल्यात से, अने बीन्यामीन ना घोराणा नो से; ईब्रानी जाती नो से, कायदा ना बारा मे कदी केम ता फरीसी टोळा नो से 2हीम्मत ना बारा मे कदी केम ता मंडळी ने वेला पाड़वा वाळो, अने कायदा ना धरमपण ना बारा मे कदी केम ता गुनाळ्ळो नी हतो। पण जे-जे वात मारा फायदा नी हती, तीमनेत मे मसी ना कारण नुकसान ह़मज लेदो। आतरु नी पण ईसु मसी ने “मारो मालीक” से करीन जाणवा आखा मे गेथु वारु ह़मजीन, मे आखी बीजी वात ने नुकसान नी ह़मजी लेदो। तीना लेदे मे आखी चीज नो नुकसान झेल्यो, ईसु मसी ने हात करवा करीन, मे तीहयी आखी चीज ने कचरु ह़मजु। अने तीनी ह़ाते पुरोत एक हय जाम। मने आपणी सच्चाय पोर नी, जे कायदा ने पाळवा सी जड़े, पण तीहयी सच्चाय पोर भरहो से, जे ईसु मसी पोर भरहो करवा सी जड़े अने भगवान नी भणी गेथी भरहो करवा सी जड़े। जीनी सी मे ईसु मसी ने अने तीने पासो जीवतो करन्याण नी ताखत जाणु, अने तीनी ह़ाते दुख अने मोत मे एक हय जाम। काहाके मे बी कानी बी रीते मरलाम गेथु पासु जीवतु हयणु हात कर सकु।
ईसु ना माणहु नो ठीयो
आनु मतलब आहयु नी के मे हात कर लेदो, अने चोखलो हय ज्यो; पण तीहयी चीज ने हात करवा नी लेदे दवड़ीन जवा बाज र्यो, जीनी लेदे ईसु मसी मने टाळ्ळो हतो। ए मारा भाय अने बेन्या, मारो वीच्यार आहयो नी के मे हात कर लेदो, पण नीस्तु आहयु एक काम करु, के जे वात पसळ री जेली से तीने भुलीन, अगली वात नी भणी वदतो जाय्न, ठीया भणी दवड़ीन जवा बाज र्यो, के तीहयो ईलाम हात करु, जीनी लेदे भगवान मने ईसु मसी मे उपर बोलावलो से।
एतरे अमारी मे गेथा जेतरा चोखला से, तीहया आहयोत वीच्यार राखो, अने कदी कानी वात मे तमारो बीजी भाती नो वीच्यार हय ता भगवान तीने बी तमारी पोर उजन्तो कर देहे। एतरे आमु तीहया कायदा ना अनसारे अगा वदो तीहया कायदा ने आमु हमणे लग पाळ्या कर्या। 3
ए भाय अने बेन्या तमु आखा मेळीन मारीन तेम चालो, अने तीने ओळखो, जे आहयी रीती पोर चालत्ला से जीनो उदारण तमु अमारी मे देखत्ला से। मे तमने कंय वार पेलो बी की देदलो, अने हाव बी रड़तो जाय्न केम, आसवा कंय माणहु से तीमनी जीवाय तीमनेत कुरुस पोर मसी नी मोत ना वेरी बणावे। तीहया नरक मे खत्तम हयवा जवा बाज र्या, तीमनो भगवान तीमनु पेट से, अने वण-लाज्याण वात पोर मोटाय करे, अने धरती पोर नी चीजु पोर मन लगाड़्या करे। पण आपणु खास देस ते ह़रग मे से, तां गेथो आपणु ने सोड़ाव्वा वाळो ईसु मसी आव्वा वाळो से अने आमु तीनी वाट जोय र्या। तीहयो आपणी ताखत ना अनसारे आखी चीज ने आह़फा ना कब्जा मे करन्यो से, आपणा कमजोर डील ना सीका ने बदलीन, आह़फा ना बड़ाय भरला डील ना सीका मे बदली देहे।
Source notes (3)
- Cross-reference रोमीयो 11:1; नेवताळा ना काम 23:6; 26:5
- Cross-reference नेवताळा ना काम 8:3; 22:4; 26:9-11
- Cross-reference 1 कुरन्थी 4:16; 11:1
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.